ప్రాణనష్టం జరగకుండా ముందస్తు చర్యలు
తుపాను ప్రభావిత ప్రాంతాల్లో ప్రజలకు ఎలాంటి ప్రమాదం జరగకుండా చర్యలు చేపట్టాలని హోంమంత్రి అధికారులను ఆదేశించారు. జిల్లా కలెక్టర్లు, పోలీసు అధికారులు, క్షేత్రస్థాయి సిబ్బంది అప్రమత్తంగా ఉండాలని సూచించారు. అవసరమైన చోట్ల ప్రజలను సురక్షిత ప్రాంతాలకు తరలించేందుకు ఏర్పాట్లు చేయాలని, సహాయక చర్యలకు సంబంధించిన బృందాలను సిద్ధంగా ఉంచాలని తెలిపారు.
అత్యవసర పరిస్థితులు తలెత్తితే వెంటనే స్పందించేలా విపత్తు నిర్వహణ శాఖ, పోలీసు విభాగం, ఇతర సంబంధిత శాఖలు సమన్వయంతో పనిచేయాలని ప్రభుత్వం సూచించింది.
అక్టోబర్‌ 28న తీరం దాటే అవకాశం
భారత వాతావరణ శాఖ తాజా బులెటిన్‌ ప్రకారం, ‘అర్నబ్‌’ తుపాను అక్టోబర్‌ 28 ఉదయం బాపట్ల, విశాఖపట్నం మధ్య యానాం సమీపంలో తీరం దాటే అవకాశం ఉంది. ఆ సమయంలో గంటకు 115 నుంచి 125 కిలోమీటర్ల వేగంతో గాలులు వీచే అవకాశం ఉండగా, గాలివేగం అప్పుడప్పుడు గంటకు 140 కిలోమీటర్ల వరకు చేరవచ్చని అంచనా వేసింది.
హైలైట్స్:
‘అర్నబ్‌’ తుపానుపై ఏపీ ప్రభుత్వం అప్రమత్తం
అధికారులను అప్రమత్తంగా ఉండాలని ఆదేశించిన హోంమంత్రి అనిత
తుపాను ప్రభావిత ప్రాంతాలపై నిరంతర పర్యవేక్షణ
మత్స్యకారులు సముద్రంలోకి వెళ్లొద్దని హెచ్చరికలు
ప్రాణనష్టం జరగకుండా ముందస్తు చర్యలకు ప్రాధాన్యం
తుపాను ప్రభావంతో కోస్తాంధ్రలోని పలు ప్రాంతాల్లో భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. తీరప్రాంతాల్లో సముద్రం అలజడిగా ఉండే అవకాశమున్నందున మత్స్యకారులు సముద్రంలోకి వెళ్లకూడదని అధికారులు సూచించారు.
ప్రజలకు అధికారుల సూచనలు
తుపాను హెచ్చరికల నేపథ్యంలో ప్రజలు అధికారిక సమాచారం మాత్రమే నమ్మాలని, సామాజిక మాధ్యమాల్లో వచ్చే నిర్ధారణలేని వార్తలను ఇతరులకు పంపించవద్దని అధికారులు సూచిస్తున్నారు. తీరప్రాంతాల్లో నివసించే ప్రజలు స్థానిక యంత్రాంగం ఇచ్చే సూచనలను పాటించాలి. అత్యవసర పరిస్థితుల్లో అధికారులు సూచించిన సురక్షిత ప్రాంతాలకు వెళ్లేందుకు సిద్ధంగా ఉండాలి.
తుపాను కదలికలు, వర్షపాతం అంచనాలు మారే అవకాశం ఉన్నందున భారత వాతావరణ శాఖ, ఆంధ్రప్రదేశ్‌ రాష్ట్ర విపత్తు నిర్వహణ సంస్థ విడుదల చేసే తాజా హెచ్చరికలను ఎప్పటికప్పుడు గమనించాలి.
Also Read- గుంటూరు మేయర్‌ పీఠంపై ఆసక్తికర పోరు.. కోవెలమూడి లక్ష్మీ అపర్ణ X తాడికొండ పద్మశ్రీదేవి!