స్వచ్ఛ సర్వేక్షణ్ జాతీయ అవార్డుల్లో ఆంధ్రప్రదేశ్ మరోసారి గుర్తింపు సాధించింది. దేశవ్యాప్తంగా నిర్వహించిన స్వచ్ఛ సర్వేక్షణ్‌లో రాష్ట్రానికి మొత్తం ఆరు జాతీయ అవార్డులు దక్కాయి. ఐదు మున్సిపల్ కార్పొరేషన్లు, ఒక మున్సిపాలిటీ వివిధ విభాగాల్లో పురస్కారాలకు ఎంపికయ్యాయి.
ఢిల్లీలోని విజ్ఞాన్ భవన్‌లో నవంబర్ 11న నిర్వహించే అవార్డుల ప్రదానోత్సవంలో రాష్ట్రపతి ద్రౌపది ముర్ము చేతుల మీదుగా ఈ పురస్కారాలను అందించనున్నారు. రాష్ట్ర మున్సిపల్ పరిపాలన, పట్టణాభివృద్ధి శాఖ మంత్రి పొంగూరు నారాయణ రాష్ట్రం తరఫున అవార్డులను స్వీకరించనున్నారు.
ఏ నగరానికి ఏ అవార్డు?
విజయవాడ, గుంటూరు, తిరుపతి నగరపాలక సంస్థలు ప్రతిష్టాత్మకమైన 'సూపర్ స్వచ్ఛ లీగ్' విభాగంలో అవార్డులకు ఎంపికయ్యాయి. రాజమహేంద్రవరం నగరపాలక సంస్థ 'ప్రామిసింగ్ స్వచ్ఛ షెహర్' పురస్కారాన్ని దక్కించుకుంది.
గ్రేటర్ విశాఖపట్నం మున్సిపల్ కార్పొరేషన్ 'సఫాయి మిత్ర సురక్షిత్ షెహర్' విభాగంలో జాతీయ అవార్డుకు ఎంపికైంది. పారిశుద్ధ్య కార్మికుల భద్రత, సంక్షేమం, సురక్షిత పారిశుద్ధ్య నిర్వహణకు సంబంధించిన అంశాల్లో ఈ గుర్తింపు లభించింది.
ఇక 20 వేలలోపు జనాభా ఉన్న పట్టణాల విభాగంలో కుప్పం మున్సిపాలిటీ 'స్వచ్ఛ సిటీ' అవార్డును సాధించింది.
పారిశుద్ధ్య నిర్వహణకు గుర్తింపు
పట్టణాల్లో చెత్త సేకరణ, వ్యర్థాల శాస్త్రీయ నిర్వహణ, పారిశుద్ధ్య కార్మికుల భద్రత, ప్రజల భాగస్వామ్యం వంటి అంశాలను పరిగణనలోకి తీసుకుని స్వచ్ఛ సర్వేక్షణ్ అవార్డులను అందిస్తారు. రాష్ట్రంలో అమలవుతున్న 'స్వర్ణాంధ్ర - స్వచ్ఛాంధ్ర' కార్యక్రమం, స్థానిక సంస్థలు చేపట్టిన పారిశుద్ధ్య చర్యలు ఈ గుర్తింపులో కీలకమని అధికారులు పేర్కొన్నారు.
మొత్తంగా ఆరు జాతీయ అవార్డులతో ఆంధ్రప్రదేశ్ పట్టణ స్థానిక సంస్థలకు స్వచ్ఛ సర్వేక్షణ్‌లో గుర్తింపు లభించింది.