ప్రత్యేక నామినేషన్‌ కేంద్రాలపై వైసీపీ పిటిషన్‌.. తీర్పు రిజర్వ్‌ చేసిన ఏపీ హైకోర్టు
ఆంధ్రప్రదేశ్‌లో స్థానిక సంస్థల ఎన్నికల నామినేషన్ల ప్రక్రియ స్వేచ్ఛగా, నిష్పక్షపాతంగా జరిగేలా జిల్లా కేంద్రాల్లో ప్రత్యేక నామినేషన్‌ కేంద్రాలు ఏర్పాటు చేయాలని కోరుతూ వైఎస్సార్‌ కాంగ్రెస్‌ పార్టీ దాఖలు చేసిన పిటిషన్‌పై హైకోర్టు తీర్పును రిజర్వ్‌ చేసింది. బుధవారం ఇరుపక్షాల వాదనలు విన్న న్యాయమూర్తి జస్టిస్‌ కిరణ్మయి ఈ నిర్ణయం తీసుకున్నారు.
ప్రతి జిల్లా కేంద్రంలో ఎన్నికల అధికారి పర్యవేక్షణలో అదనపు నామినేషన్‌ కేంద్రాలను ఏర్పాటు చేయాలని వైసీపీ రాష్ట్ర ప్రధాన కార్యదర్శి పిటిషన్‌ దాఖలు చేశారు. పిటిషనర్‌ తరఫున సీనియర్‌ న్యాయవాది వీరా రెడ్డి వాదిస్తూ, అభ్యర్థుల భద్రత, నామినేషన్ల స్వేచ్ఛాయుత దాఖలు కోసం ప్రత్యేక కేంద్రాలు అవసరమని పేర్కొన్నారు. ఈ అంశంపై రాష్ట్ర ఎన్నికల సంఘానికి వినతిపత్రం ఇచ్చినా స్పందన రాలేదని కోర్టుకు తెలిపారు.
ప్రభుత్వం, ఎన్నికల సంఘం తరఫు న్యాయవాదులు మాత్రం ప్రస్తుత నిబంధనల ప్రకారం ప్రత్యేక కేంద్రాల ఏర్పాటు ఎన్నికల అధికారి విచక్షణపై ఆధారపడి ఉంటుందని వాదించారు. నామినేషన్ల దాఖలుకు మూడు రోజుల గడువు ఉందని, ఎవరైనా అడ్డుకుంటే సంబంధిత ఎన్నికల అధికారికి ఫిర్యాదు చేయవచ్చని తెలిపారు. కేవలం అనుమానాల ఆధారంగా ఆదేశాలు జారీ చేయలేమని పేర్కొన్నారు. నామినేషన్‌, పోలింగ్‌ కేంద్రాల వద్ద భద్రత పెంచేందుకు పోలీసు ఉన్నతాధికారులకు ఆదేశాలు ఇచ్చినట్లు కోర్టుకు వివరించారు.
ఇదిలా ఉండగా, స్థానిక ఎన్నికల్లో కేంద్ర బలగాలను మోహరించాలని, కుల ధ్రువీకరణ పత్రాలు, నిరభ్యంతర పత్రాలను సకాలంలో జారీ చేయాలని కోరుతూ వైసీపీ దాఖలు చేసిన మరో రెండు పిటిషన్లపై విచారణను హైకోర్టు గురువారానికి వాయిదా వేసింది. ప్రత్యేక నామినేషన్‌ కేంద్రాల అంశంపై కోర్టు వెలువరించే తీర్పుపై రాజకీయ వర్గాల్లో ఆసక్తి నెలకొంది.