99TV News

    బీసీ రిజర్వేషన్లు: ఏపీ సర్కార్ కొత్త GO జారీ

    పట్టణ స్థానిక సంస్థల్లో బీసీ రిజర్వేషన్లు ఖరారు.. ఏపీ సర్కార్ కీలక ఉత్తర్వులు

    పట్టణ స్థానిక సంస్థల్లో బీసీ రిజర్వేషన్లపై ఏపీ ప్రభుత్వం ఉత్తర్వులు జారీ

    ఎస్సీ, ఎస్టీ, బీసీ రిజర్వేషన్లు కలిపి 50 శాతం మించరాదని జీవో ఎంఎస్ 251లో ప్రభుత్వం స్పష్టం చేసింది

    ఆంధ్రప్రదేశ్‌లో పట్టణ స్థానిక సంస్థల ఎన్నికల నిర్వహణ దిశగా రాష్ట్ర ప్రభుత్వం కీలక చర్య చేపట్టింది. మున్సిపాలిటీలు, నగర పంచాయతీలు, మున్సిపల్ కార్పొరేషన్లలో బీసీ రిజర్వేషన్ల ఖరారుకు కొత్త మార్గదర్శకాలతో జీవో ఎంఎస్ నంబర్ 251ను శనివారం జారీ చేసింది.

    మున్సిపల్, పట్టణాభివృద్ధి శాఖ ప్రిన్సిపల్ సెక్రటరీ ఎస్. సురేశ్ కుమార్ జారీ చేసిన ఉత్తర్వుల్లో ఎస్సీ, ఎస్టీ, బీసీ వర్గాలకు కలిపి కేటాయించే మొత్తం రిజర్వేషన్లు 50 శాతానికి మించకూడదని ప్రభుత్వం పేర్కొంది. సుప్రీంకోర్టు, ఏపీ హైకోర్టు గత తీర్పులకు అనుగుణంగా ఈ పరిమితిని తప్పనిసరి చేసినట్లు ఉత్తర్వుల్లో తెలిపింది. రిజర్వేషన్ల కేటాయింపులో ముందుగా ఎస్టీలకు, ఆ తర్వాత ఎస్సీలకు, చివరగా బీసీలకు ప్రాధాన్యత ఇవ్వాలని ప్రభుత్వం స్పష్టం చేసింది. ఈ మార్గదర్శకాల ప్రకారం తదుపరి చర్యలు చేపట్టాలని మున్సిపల్ పరిపాలన శాఖ కమిషనర్‌ను ఆదేశించింది.

    రిజర్వేషన్ల ఖరారులో సుప్రీంకోర్టు నిర్దేశించిన ట్రిపుల్ టెస్ట్ విధానాన్ని అనుసరించినట్లు ప్రభుత్వం తెలిపింది. రిటైర్డ్ ఐఏఎస్ అధికారి రాజీవ్ రంజన్ మిశ్రా నేతృత్వంలోని డెడికేటెడ్ కమిషన్ సమర్పించిన సిఫార్సులకు ఆమోదం తెలుపుతూ ఈ ఉత్తర్వులు జారీ చేసింది. పట్టణ ప్రాంతాల్లో బీసీ జనాభా, వారి రాజకీయ ప్రాతినిధ్యం అంశాలను పరిశీలించేందుకు యూనిఫైడ్ ఫ్యామిలీ సర్వే, ఎస్‌జీఎస్‌డబ్ల్యూ డేటాను ఆధారంగా తీసుకున్నట్లు ఉత్తర్వుల్లో పేర్కొంది.

    మేయర్లు, మున్సిపల్ ఛైర్‌పర్సన్లు, వార్డు సభ్యుల స్థానాలకు రొటేషన్ పద్ధతిలో రిజర్వేషన్లు వర్తింపజేయాలని ప్రభుత్వం ఆదేశించింది. 2021లో అమలైన రిజర్వేషన్ సర్కిల్‌ను ప్రాతిపదికగా తీసుకుని తదుపరి రిజర్వేషన్లు ఖరారు చేయాలని సూచించింది. అయితే పునర్విభజన జరిగిన వార్డుల విషయంలో రిజర్వేషన్ సైకిల్ కొత్తగా ప్రారంభమవుతుందని జీవోలో పేర్కొంది. దీనివల్ల డీలిమిటేషన్ జరిగిన స్థానాల్లో పాత రొటేషన్ క్రమం యథాతథంగా వర్తించదు.

    HIGHLIGHTS

    - జీవో ఎంఎస్ 251ను ప్రభుత్వం జారీ చేసింది

    - మొత్తం రిజర్వేషన్లు 50 శాతం మించరాదు

    - ట్రిపుల్ టెస్ట్ విధానాన్ని అనుసరించినట్లు ఉత్తర్వుల్లో స్పష్టం

    - రాజీవ్ రంజన్ మిశ్రా కమిషన్ సిఫార్సులకు ఆమోదం

    - పునర్విభజన వార్డుల్లో రిజర్వేషన్ సైకిల్ కొత్తగా ప్రారంభం

    గతంలో బీసీలకు 33.33 శాతం రిజర్వేషన్లు కల్పిస్తూ జారీ చేసిన ఉత్తర్వులపై హైకోర్టు నిలుపుదల ఇచ్చిన నేపథ్యంలో, తాజా మార్గదర్శకాలను న్యాయపరమైన అంశాలను దృష్టిలో ఉంచుకుని రూపొందించినట్లు ప్రభుత్వ వర్గాలు తెలిపాయి. రిజర్వేషన్ల పరిమితి, డేటా ఆధారిత నిర్ణయం, డెడికేటెడ్ కమిషన్ సిఫార్సులు అనే 3 అంశాలపై ప్రత్యేకంగా దృష్టి పెట్టినట్లు ఉత్తర్వుల ద్వారా స్పష్టమవుతోంది. పట్టణ స్థానిక సంస్థల ఎన్నికల ప్రక్రియలో రిజర్వేషన్ల ఖరారు కీలక దశ కావడంతో, ఈ ఉత్తర్వులకు పరిపాలనా ప్రాధాన్యత ఏర్పడింది.

    ప్రభుత్వం జారీ చేసిన మార్గదర్శకాల ప్రకారం మున్సిపల్ పరిపాలన శాఖ తదుపరి ప్రక్రియను ప్రారంభించనుంది. స్థానాల వారీ రిజర్వేషన్ వివరాలు, రొటేషన్ అమలు, పునర్విభజన జరిగిన వార్డుల గుర్తింపు వంటి అంశాలపై అధికారులు కసరత్తు చేపట్టనున్నారు. ఈ ప్రక్రియ పూర్తయిన తర్వాతే పట్టణ స్థానిక సంస్థల ఎన్నికల నిర్వహణకు సంబంధించిన తదుపరి షెడ్యూల్‌పై స్పష్టత వచ్చే అవకాశం ఉంది.