అర్నబ్ తుపాను బాధితులకు పరిహార ప్యాకేజీ ప్రకటించిన చంద్రబాబు
ఇళ్లు, పంటలు, పశువులు, వ్యాపారాల నష్టాలకు వేర్వేరు సాయం; కేంద్ర బృందం పంపాలని రాష్ట్రం విజ్ఞప్తి
అర్నబ్ తుపాను వల్ల నష్టపోయిన కుటుంబాలు, రైతులు, మత్స్యకారులు, వ్యాపారులకు పరిహారం అందించేందుకు రాష్ట్ర ప్రభుత్వం గురువారం భారీ ప్యాకేజీ ప్రకటించింది. తుపాను అనంతర సహాయక చర్యలపై ఉన్నతాధికారులతో సమీక్ష అనంతరం ముఖ్యమంత్రి నారా చంద్రబాబు నాయుడు ఈ నిర్ణయాలు వెల్లడించారు.
తుపాను ప్రభావిత ప్రతి కుటుంబానికి తక్షణ సాయం అందిస్తామని ముఖ్యమంత్రి చెప్పారు. ఇళ్లలోకి నీరు చేరిన కుటుంబాలకు 25 కేజీల బియ్యం, మత్స్యకారులు, చేనేత కార్మికులకు 50 కేజీల బియ్యం ఇస్తామని తెలిపారు. అదనంగా కందిపప్పు, పామాయిల్, ఉల్లిపాయలు, చక్కెర, బంగాళదుంపలు పంపిణీ చేస్తామని చెప్పారు. తక్షణ ఖర్చుల కోసం ఒక్కో కుటుంబానికి రూ. 1000 నుంచి రూ. 3000 వరకు ఆర్థిక సహాయం అందించనున్నట్లు వివరించారు. పాక్షికంగా ఇల్లు దెబ్బతింటే రూ. 10,000 సాయం, తుపాను కారణంగా మరణించిన వారి కుటుంబాలకు రూ. 5 లక్షల ఎక్స్‌గ్రేషియా ఇవ్వనున్నట్లు పేర్కొన్నారు. “నష్టపోయిన చివరి వ్యక్తికి కూడా న్యాయం జరిగేలా చూస్తాం,” అని ముఖ్యమంత్రి చంద్రబాబు సమీక్ష అనంతరం మీడియాతో అన్నారు.
జీవనోపాధి నష్టాలకు కూడా ప్రభుత్వం వేర్వేరు పరిహారాలు ఖరారు చేసింది. చిన్న కిరాణా షాపులు, రెస్టారెంట్లు, సర్వీస్ షాపులకు రూ. 25,000, చేతివృత్తుల వారికి రూ. 25,000, తోపుడు బండ్లకు రూ. 20,000 చొప్పున సాయం ప్రకటించింది. రూ. 40 లక్షల టర్నోవర్ వరకు ఉన్న ఎంఎస్ఎంఈలకు రూ. 50,000, రూ. 40 లక్షల నుంచి రూ. 1.5 కోట్ల వరకు టర్నోవర్ ఉన్న పరిశ్రమలకు రూ. 1 లక్ష, ఆపై టర్నోవర్ ఉన్న పరిశ్రమలకు రూ. 1,50,000 సాయం ఇవ్వనున్నట్లు ప్రభుత్వం తెలిపింది. దెబ్బతిన్న ద్విచక్ర వాహనానికి రూ. 3000, ఆటోకు రూ. 10,000 అందించనుంది.
HIGHLIGHTS
- మరణించిన వారి కుటుంబాలకు రూ. 5 లక్షల ఎక్స్‌గ్రేషియా
- ఇళ్లలోకి నీరు చేరిన కుటుంబాలకు 25 కేజీల బియ్యం
- చిన్న వ్యాపారాలకు రూ. 25,000 సాయం
- ఆవు లేదా గేదె నష్టానికి రూ. 50,000
- కేంద్ర బృందం పంపాలని రాష్ట్రం విజ్ఞప్తి
మత్స్యకారులకు వలలు, బోట్లు దెబ్బతిన్న స్థాయిని బట్టి పరిహారం నిర్ణయించారు. వలలు పాక్షికంగా దెబ్బతింటే మరమ్మతులకు రూ. 5000, రీప్లేస్‌మెంట్‌కు రూ. 10,000 ఇస్తారు. మెకనైజ్డ్ కాని బోటు, వలలు పూర్తిగా దెబ్బతింటే రూ. 20,000, మెకనైజ్డ్ బోటు, వలలు పూర్తిగా దెబ్బతింటే రూ. 25,000 అందిస్తారు. చేపల చెరువుల పునరుద్ధరణకు రూ. 18,000 సాయం ప్రకటించారు. పశువుల నష్టాల్లో ఆవు లేదా గేదె మరణిస్తే రూ. 50,000, దూడలకు రూ. 25,000, గొర్రె లేదా మేకకు రూ. 7,500, కోడికి రూ. 100 చొప్పున, ఒక లబ్ధిదారునికి గరిష్ఠంగా రూ. 10,000 వరకు సాయం ఇవ్వనున్నారు. పశువుల షెడ్ దెబ్బతింటే రూ. 5000 చెల్లిస్తారు.
వ్యవసాయ, ఉద్యాన పంటల నష్టాలకు హెక్టారుకు పరిహారం ప్రకటించారు. తమలపాకుకు రూ. 75,000, అరటి, పసుపు, యమ్, మిరప, జామ, బొప్పాయి, మామిడి, కాఫీ, యాపిల్ బేర్, సపోటా, కాజు, డ్రాగన్ ఫ్రూట్‌కు రూ. 35,000 చొప్పున సాయం ఇస్తారు. పత్తి, వేరుశనగ, వరి, కూరగాయలు, టమాటో, పూలు, ఉల్లి, పుచ్చ, నర్సరీ, దానిమ్మ, కొత్తిమీరకు రూ. 25,000 నిర్ణయించారు. చెరకు మొదటి పంటకు రూ. 25,000, సజ్జ, మినుములు, పెసలు, మొక్కజొన్న, రాగి, కంది, నువ్వులు, సోయాబీన్, పొద్దుతిరుగుడు, పొగాకు, జనుము, కొర్ర, సామ పంటలకు రూ. 15,000 చొప్పున ఇస్తారు. ఆయిల్ పామ్, కొబ్బరి చెట్లకు ఒక్కో చెట్టుకు రూ. 1500 చెల్లిస్తారు.
“నా మొదటి ప్రాధాన్యత ప్రాణనష్టాన్ని నివారించడం. అయినప్పటికీ 5 మంది మరణించడం బాధాకరం. వారి కుటుంబాలకు నా ప్రగాఢ సానుభూతి,” అని ముఖ్యమంత్రి చంద్రబాబు అన్నారు. 3 రోజుల్లో 8 సార్లు సమీక్షలు నిర్వహించి, టెక్నాలజీ సహాయంతో అధికార యంత్రాంగాన్ని సమాయత్తం చేయడం వల్ల నష్టాన్ని తగ్గించగలిగామని చెప్పారు. తుపాను తీరం దాటిన వెంటనే పునరుద్ధరణ పనులు ప్రారంభించామని ఆయన పేర్కొన్నారు. “బాధ్యత గల ప్రభుత్వంగా ప్రజల కష్టాల్లో సర్వశక్తులు ఒడ్డి అండగా నిలుస్తాం,” అని ఆయన అన్నారు.
విద్యుత్, రోడ్లు, తాగునీరు, పారిశుద్ధ్యంపై ప్రత్యేక దృష్టి పెట్టినట్లు ప్రభుత్వం తెలిపింది. కోనసీమ, పశ్చిమ గోదావరి మినహా అన్ని జిల్లాల్లో 2 నుంచి 3 రోజుల్లో విద్యుత్ సరఫరా పునరుద్ధరిస్తామని ముఖ్యమంత్రి చెప్పారు. రోడ్లపై పడిన చెట్లను తొలగించి రవాణా అంతరాయం తగ్గించామని, ప్రభావిత ప్రాంతాల్లో పారిశుద్ధ్య చర్యలు కొనసాగుతున్నాయని వివరించారు. తుపాను నష్టంపై ప్రాథమిక నివేదికను కేంద్రానికి పంపి, కేంద్ర బృందాన్ని పంపాలని కోరినట్లు ఆయన తెలిపారు. “రేపు, ఎల్లుండి క్షేత్రస్థాయిలో పర్యటించి వాస్తవ పరిస్థితులను పరిశీలించి బాధితులకు భరోసా కల్పిస్తా,” అని ముఖ్యమంత్రి చంద్రబాబు చెప్పారు.
Also Read- ఏపీకి వర్ష గండం.. మరో 7 రోజులు భారీ వానలు!