పోలవరం నిధుల విడుదల వేగవంతం చేయాలని సీఆర్ పాటిల్ను కోరిన చంద్రబాబు
జల్ జీవన్ మిషన్-అమరజీవి జలధారకు రూ.30 వేల కోట్ల పనుల వివరాలు కేంద్రానికి సమర్పించిన ముఖ్యమంత్రి
పోలవరం ప్రాజెక్టు పురోగతి, జల్ జీవన్ మిషన్-అమరజీవి జలధార పనులపై ముఖ్యమంత్రి చంద్రబాబు నాయుడు బుధవారం ఢిల్లీలో కేంద్ర జల్ శక్తి మంత్రి సీఆర్ పాటిల్తో భేటీ అయ్యారు. రెండు ప్రాజెక్టులకు నిధులు ఎప్పటికప్పుడు విడుదల చేయాలని ఆయన కోరారు.
వచ్చే గోదావరి పుష్కరాల నాటికి పోలవరం పూర్తి చేసి జాతికి అంకితం చేసేలా పనులు వేగంగా సాగుతున్నాయని ముఖ్యమంత్రి వివరించినట్లు అధికారులు తెలిపారు. ఒడిశా, ఛత్తీస్గఢ్లతో పెండింగ్లో ఉన్న అంశాల పరిష్కారానికి కేంద్ర జల మంత్రిత్వ శాఖ ఆధ్వర్యంలో 3 రాష్ట్రాల ముఖ్యమంత్రుల సమావేశం ఏర్పాటు చేయాలని ఆయన సూచించారు.
HIGHLIGHTS
- ఢిల్లీలో సీఆర్ పాటిల్తో చంద్రబాబు భేటీ
- పోలవరం, అమరజీవి జలధారపై సమీక్ష
- రూ.30 వేల కోట్ల జల్ జీవన్ పనుల వివరాలు
- స్టాప్ వర్క్ ఆర్డర్ ఉపసంహరణకు విజ్ఞప్తి
ప్రొటెక్టివ్ ఎంబాంక్మెంట్స్కు సంబంధించిన ప్రజాభిప్రాయ సేకరణ ఒడిశా, ఛత్తీస్గఢ్లలో పెండింగ్లో ఉందని, స్టాప్ వర్క్ ఆర్డర్ను శాశ్వతంగా ఉపసంహరించాల్సిన అవసరం ఉందని చంద్రబాబు కేంద్ర మంత్రికి తెలిపినట్లు అధికారులు చెప్పారు. 41.15 మీటర్ల కాంటూరు వరకు నీటి నిల్వకు అవసరమైన పునరావాసం, ఆర్ అండ్ ఆర్ పనులు వేగంగా చేపడుతున్నామని కూడా వివరించారు.
గోదావరి వరద జలాలను సద్వినియోగం చేసేందుకు పట్టిసీమ ద్వారా నీటి తరలింపు, నదుల అనుసంధాన ప్రయోజనాలను ముఖ్యమంత్రి ప్రస్తావించారు. పెండింగ్ అంశాలపై కేంద్రం తదుపరి సమన్వయ చర్యలు చేపట్టనుంది.
