అబ్దుల్‌ కలాంకు చంద్రబాబు, పవన్‌ కల్యాణ్‌ నివాళులు
భారత మాజీ రాష్ట్రపతి, భారతరత్న డాక్టర్‌ ఏపీజే అబ్దుల్‌ కలాం జయంతి సందర్భంగా ఆంధ్రప్రదేశ్‌ ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్‌ కల్యాణ్‌ ఆయనకు ఘనంగా నివాళులర్పించారు. దేశానికి కలాం అందించిన సేవలను స్మరించుకుంటూ, ఆయన జీవితం యువతకు స్ఫూర్తిదాయకమని పేర్కొన్నారు.
చంద్రబాబు నాయుడు కలాంను స్ఫూర్తి శిఖరంగా అభివర్ణించారు. భారత అణు, సాంకేతిక రంగాలకు ఆయన అందించిన సేవలను గుర్తుచేసుకున్నారు. దేశాభివృద్ధికి కలాం చేసిన కృషిని ప్రతి ఒక్కరూ స్మరించుకోవాలని సామాజిక మాధ్యమం ‘ఎక్స్‌’ వేదికగా పిలుపునిచ్చారు.
పవన్‌ కల్యాణ్‌ తన సందేశంలో రామేశ్వరంలోని సాధారణ కుటుంబంలో జన్మించిన కలాం దేశం గర్వించే శాస్త్రవేత్తగా, ప్రజల రాష్ట్రపతిగా ఎదిగిన ప్రయాణాన్ని ప్రస్తావించారు. ఎస్‌ఎల్‌వీ-3, అగ్ని, పృథ్వి క్షిపణుల అభివృద్ధి, పోఖ్రాన్‌-2 అణు పరీక్షలు, టెక్నాలజీ విజన్‌ 2020లో ఆయన పాత్రను గుర్తుచేశారు.
సామాన్య నేపథ్యం ఉన్నత లక్ష్యాల సాధనకు అడ్డంకి కాదని కలాం జీవితం నిరూపించిందని పవన్‌ పేర్కొన్నారు. శాస్త్రీయ దృక్పథం, స్వయం సమృద్ధి, నిరంతర అభ్యాసం వంటి ఆయన ఆశయాలను ముందుకు తీసుకెళ్లడమే నిజమైన నివాళి అని తెలిపారు.