ఆంధ్రప్రదేశ్‌లో ఒకవైపు 'మురసు' తుపాను ప్రభావం.. మరోవైపు కరవు పరిస్థితులు ప్రభుత్వానికి సవాలుగా మారాయి. ఈ నేపథ్యంలో ముఖ్యమంత్రి చంద్రబాబు బుధవారం రెండు కీలక అంశాలపై దృష్టి సారించారు. తుపాను ప్రభావిత ప్రాంతాల్లో ఏరియల్ సర్వే నిర్వహించడంతో పాటు, రాష్ట్రంలో కరవు పరిస్థితులను అంచనా వేయడానికి వచ్చిన కేంద్ర బృందంతో సమీక్షా సమావేశం నిర్వహించారు.
'మురసు' తుపాను ప్రభావంతో నష్టపోయిన గుంటూరు, బాపట్ల, ప్రకాశం జిల్లాల్లో చంద్రబాబు ఏరియల్ సర్వే చేపట్టారు. కారంచేడు, కొత్తపట్నం, చీరాల, చిలకలూరిపేట, పర్చూరు తదితర ప్రాంతాల్లో ముంపు నీటిని వెంటనే తొలగించేందుకు చర్యలు తీసుకోవాలని అధికారులను ఆదేశించారు. రహదారులపై రాకపోకలకు అంతరాయం కలగకుండా చూడాలని జిల్లా కలెక్టర్లకు సూచించారు. ఏలూరు జిల్లాలోని గిరిజన ప్రాంతాల్లో భారీ వర్షాలు కొనసాగుతున్నాయని, కొన్ని ప్రాంతాల్లో చిన్న నీటిపారుదల చెరువులు పొంగిపొర్లుతున్నాయని అధికారులు ముఖ్యమంత్రికి వివరించారు.
అనంతరం రాష్ట్రంలోని కరవు పరిస్థితులను పరిశీలించేందుకు వచ్చిన అంతర్‌-మంత్రిత్వ కేంద్ర బృందం (IMCT) సభ్యులతో చంద్రబాబు సమావేశమయ్యారు. నవంబర్ 2, 3 తేదీల్లో కర్నూలు, నంద్యాల, అనంతపురం, శ్రీ సత్యసాయి జిల్లాల్లో పర్యటించిన బృందం.. క్షేత్రస్థాయిలో తాము గమనించిన పరిస్థితులను ముఖ్యమంత్రికి వివరించింది.
Highlights
- మురసు తుపాను ప్రభావిత గుంటూరు, బాపట్ల, ప్రకాశం జిల్లాల్లో సీఎం ఏరియల్ సర్వే.
- ముంపు నీటిని తొలగించి రహదారులపై రాకపోకలు సజావుగా సాగేలా చర్యలు తీసుకోవాలని ఆదేశాలు.
- కేంద్ర కరవు అంచనా బృందంతో చంద్రబాబు సమీక్ష.
- 21 జిల్లాల్లోని 388 మండలాలను కరవు ప్రాంతాలుగా ప్రకటించినట్లు వెల్లడి.
- ఖరీఫ్ పంటలకు నష్టం, సాగునీరు, తాగునీరు, పశుగ్రాసం కొరతపై ఆందోళన.
- ఉపాధి హామీ పథకం కింద పనిదినాలను 200 రోజులకు పెంచాలని కేంద్రానికి విజ్ఞప్తి.
ఈ సందర్భంగా చంద్రబాబు మాట్లాడుతూ.. రాష్ట్రంలో భిన్నమైన వాతావరణ పరిస్థితులు నెలకొన్నాయని తెలిపారు. కోస్తాంధ్ర ప్రాంతాలు తుపాను ప్రభావంతో ఇబ్బందులు ఎదుర్కొంటుంటే, రాయలసీమతో పాటు ఇతర ప్రాంతాలు ఎల్‌నినో ప్రభావంతో కరవు పరిస్థితులను ఎదుర్కొంటున్నాయని వివరించారు.
ఈ ఏడాది వర్షపాతం గణనీయంగా తగ్గడంతో ఖరీఫ్ పంటలకు తీవ్ర నష్టం వాటిల్లిందని కేంద్ర బృందం దృష్టికి తీసుకెళ్లారు. దేశంలోనే రెండో అత్యల్ప వర్షపాతం నమోదైన అనంతపురం జిల్లా పరిస్థితి ఆందోళనకరంగా ఉందని పేర్కొన్నారు. సాగునీరు, తాగునీరు, పశుగ్రాసం కొరతతో రైతులు ఇబ్బందులు పడుతున్నారని తెలిపారు. ఇప్పటికే 21 జిల్లాల్లోని 388 మండలాలను కరవు ప్రాంతాలుగా ప్రకటించి, నష్టాల అంచనాలతో కేంద్రానికి నివేదిక సమర్పించామని చెప్పారు. మరో వారం రోజుల్లో సమగ్ర నివేదిక పంపుతామని వెల్లడించారు.
ఈ సంక్షోభాన్ని అధిగమించేందుకు ప్రకృతి వ్యవసాయాన్ని విస్తృతంగా ప్రోత్సహించాల్సిన అవసరం ఉందని చంద్రబాబు పేర్కొన్నారు. ఉపాధి హామీ పథకం (VB-G RAM G) కింద పనిదినాలను 200 రోజులకు పెంచాలని, వ్యవసాయ పనులకు కూడా ఈ పథకాన్ని వినియోగించుకునేందుకు అనుమతి ఇవ్వాలని కేంద్ర బృందాన్ని కోరారు. దీనివల్ల వ్యవసాయ కూలీల కొరత తగ్గడంతో పాటు గ్రామీణ ప్రాంతాల్లో అదనపు ఉపాధి అవకాశాలు కలుగుతాయని అభిప్రాయపడ్డారు.
Also Read- ఉమ్మడి ఏపీ శాసనమండలి మాజీ ఛైర్మన్ కన్నుమూత.. చక్రపాణి సేవలను గుర్తు చేసుకున్న చంద్రబాబు, లోకేశ్