ఉమ్మడి ఆంధ్రప్రదేశ్ శాసనమండలి మాజీ ఛైర్మన్ ఏ. చక్రపాణి కన్నుమూశారు. ప్రజా జీవితంలో సుదీర్ఘ అనుభవం కలిగిన ఆయన మృతి పట్ల టీడీపీ అధినేత, ముఖ్యమంత్రి నారా చంద్రబాబు నాయుడు, పార్టీ జాతీయ ప్రధాన కార్యదర్శి నారా లోకేశ్ తీవ్ర దిగ్భ్రాంతి వ్యక్తం చేశారు. ఆయన కుటుంబ సభ్యులకు ప్రగాఢ సానుభూతి తెలియజేశారు.
చక్రపాణి మరణం తీరని లోటని చంద్రబాబు పేర్కొన్నారు. శాసనమండలి ఛైర్మన్‌గా ఆయన అందించిన సేవలు, శాసన వ్యవస్థ గౌరవ ప్రతిష్ఠలను కాపాడటంలో చూపిన నిబద్ధత చిరస్మరణీయమని కొనియాడారు. మండలి ఛైర్మన్‌గా శాసన వ్యవస్థపై తనదైన ప్రత్యేక ముద్ర వేశారని గుర్తు చేసుకున్నారు. ఆయన ఆత్మకు శాంతి చేకూరాలని భగవంతుడిని ప్రార్థిస్తున్నట్లు తెలిపారు.
Highlights
- ఉమ్మడి ఆంధ్రప్రదేశ్ శాసనమండలి మాజీ ఛైర్మన్ ఏ. చక్రపాణి కన్నుమూత.
- ఆయన మృతిపై చంద్రబాబు, నారా లోకేశ్ తీవ్ర దిగ్భ్రాంతి.
- శాసన వ్యవస్థ గౌరవాన్ని కాపాడటంలో చక్రపాణి సేవలను గుర్తు చేసుకున్న చంద్రబాబు.
- ఐదు దశాబ్దాల రాజకీయ ప్రస్థానంలో ప్రజలకు సేవ చేశారని లోకేశ్ ప్రశంసలు.
నారా లోకేశ్ కూడా చక్రపాణి మృతికి ప్రగాఢ సంతాపం ప్రకటించారు. పార్లమెంటరీ సంప్రదాయాల పరిరక్షణలో ఆయన విశేష కృషి చేశారని పేర్కొన్నారు. ఐదు దశాబ్దాల సుదీర్ఘ రాజకీయ ప్రస్థానంలో ఎంతో నిబద్ధతతో ప్రజలకు సేవలు అందించారని కొనియాడారు. ఆయన ఆత్మకు శాంతి కలగాలని కోరుకుంటూ, కుటుంబ సభ్యులకు తన సానుభూతిని తెలియజేశారు.
Also Read- ఉమ్మడి ఏపీ పాలనలో కీలక బాధ్యతలు.. రిటైర్డ్ ఐఏఎస్ అధికారి డీసీ రోశయ్య కన్నుమూత