రాయలసీమలో గ్లోబల్ హార్టికల్చర్ హబ్కు నేడు శంకుస్థాపన
మదనపల్లెలో రూ.1 లక్ష కోట్ల ప్రణాళికకు శ్రీకారం; రిలయన్స్ భాగస్వామ్యంతో తొలి ఇండియన్ స్కూల్ ఆఫ్ అగ్రికల్చర్ ఏర్పాటు
రాయలసీమ అభివృద్ధి లక్ష్యంగా అన్నమయ్య జిల్లా మదనపల్లెలో నేడు గ్లోబల్ హార్టికల్చర్ హబ్, ఇండియన్ స్కూల్ ఆఫ్ అగ్రికల్చర్కు శంకుస్థాపన జరగనుంది. కేంద్ర ఆర్థిక మంత్రి నిర్మలా సీతారామన్, ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కల్యాణ్ కార్యక్రమంలో పాల్గొంటారు.
ప్రభుత్వం ప్రతిష్టాత్మకంగా చేపట్టిన గ్లోబల్ హార్టికల్చర్ హబ్ను సుమారు రూ.1 లక్ష కోట్ల బృహత్ ప్రణాళికగా రూపొందించింది. ఇందులో ప్రభుత్వ వాటా రూ.40,352 కోట్లు కాగా, ప్రైవేట్ రంగం నుంచి రూ.60,000 కోట్ల పెట్టుబడులను ఆకర్షించాలని లక్ష్యంగా పెట్టుకుంది. రాయలసీమతో పాటు ఉమ్మడి ప్రకాశం జిల్లాలోని ఉద్యాన రైతులకు సాగు విస్తరణ, దిగుబడి పెంపు, కోల్డ్ స్టోరేజీలు, ప్రాసెసింగ్ యూనిట్లు, ఎగుమతి సదుపాయాలు కల్పించడమే ప్రధాన ఉద్దేశమని అధికారులు తెలిపారు.
HIGHLIGHTS
- మదనపల్లెలో నేడు రెండు ప్రధాన ప్రాజెక్టులకు శంకుస్థాపన
- గ్లోబల్ హార్టికల్చర్ హబ్ విలువ రూ.1 లక్ష కోట్లు
- ప్రభుత్వ వాటా రూ.40,352 కోట్లు
- రిలయన్స్ భాగస్వామ్యంతో తొలి ఇండియన్ స్కూల్ ఆఫ్ అగ్రికల్చర్
- కార్యక్రమానికి అనంత్ అంబానీ హాజరు
రైతులకు విత్తనం నుంచి ఎగుమతి వరకు సమగ్ర మద్దతు కల్పించేలా హబ్ పనిచేస్తుందని ప్రభుత్వం తెలిపింది. గత 6 నెలలుగా ముఖ్యమంత్రి చంద్రబాబు వ్యవసాయ, ఉద్యాన, ఆర్థిక, నీటిపారుదల శాఖలతో సమీక్షలు నిర్వహించారని అధికార వర్గాలు పేర్కొన్నాయి. పండ్ల ఎగుమతి, ఫుడ్ క్లస్టర్ల ఏర్పాటుపై యూఏఈతో ఇప్పటికే ఒప్పందం కుదిరిందని ప్రభుత్వం తెలిపింది.
ఇదే వేదికపై దేశంలోనే తొలి ఇండియన్ స్కూల్ ఆఫ్ అగ్రికల్చర్కు పునాది పడనుంది. రిలయన్స్ ఇండస్ట్రీస్ ఈ సంస్థ ఏర్పాటు, నిర్వహణలో భాగస్వామ్యం కానుంది. రిలయన్స్ ఎగ్జిక్యూటివ్ డైరెక్టర్ అనంత్ అంబానీ కార్యక్రమానికి హాజరుకానున్నారు. డిజిటల్ అగ్రికల్చర్, ప్రెసిషన్ ఫార్మింగ్, స్మార్ట్ ఇరిగేషన్, మార్కెట్ ఇంటెలిజెన్స్పై రైతులకు శిక్షణ ఇవ్వాలని ఐఎస్ఏ లక్ష్యంగా పెట్టుకుంది.
మంత్రి నారా లోకేశ్తో పాటు పలువురు మంత్రులు, ఎంపీలు, ఎమ్మెల్యేలు కార్యక్రమానికి హాజరుకానున్నారు. శంకుస్థాపన అనంతరం ప్రాజెక్టుల అమలు దశలు, పెట్టుబడుల సమీకరణ, సంస్థల భాగస్వామ్యంపై ప్రభుత్వం తదుపరి కార్యాచరణ ప్రకటించనుంది.
