వైసీపీ అధినేత, మాజీ సీఎం వైఎస్ జగన్ హైకోర్టును ఆశ్రయించారు. పులివెందులలో తనపై నమోదైన క్రిమినల్ కేసును కొట్టివేయాలని కోరుతూ క్వాష్ పిటిషన్ దాఖలు చేశారు. రాజకీయ కారణాలతోనే తనపై కేసు నమోదు చేశారని, దానిని రద్దు చేయాలని ఆయన న్యాయస్థానాన్ని అభ్యర్థించారు.
స్థానిక సంస్థల ఎన్నికల పోలింగ్ రోజున పులివెందుల మున్సిపల్ కార్యాలయం ఎదుట జగన్ నిరసన వ్యక్తం చేశారు. వైసీపీ పోలింగ్ ఏజెంట్లను బూత్‌లలోకి అనుమతించకుండా అడ్డుకుంటున్నారనే ఆరోపణలతో అక్కడ ధర్నాకు దిగారు. అయితే ఎన్నికల ప్రవర్తనా నియమావళి అమల్లో ఉన్న సమయంలో ఎలాంటి అనుమతి లేకుండా ఆందోళన నిర్వహించారనే కారణంతో పోలీసులు కేసు నమోదు చేశారు.
HIGHLIGHTS
- పులివెందుల కేసును కొట్టివేయాలని హైకోర్టులో జగన్ పిటిషన్
- తనపై రాజకీయ కారణాలతోనే కేసు నమోదు చేశారని జగన్ వాదన
- జగన్‌తో పాటు వైఎస్ అవినాశ్ రెడ్డి, మరో 70 మందిపై కేసు
- ఎస్ఈసీ కార్యాలయం వద్ద నిరసన కేసులో వైసీపీ ఎమ్మెల్సీల క్వాష్ పిటిషన్లు
- జగన్, ఎమ్మెల్సీల పిటిషన్లపై విచారణ చేపట్టనున్న ఏపీ హైకోర్టు
ఈ కేసులో జగన్‌తో పాటు కడప ఎంపీ వైఎస్ అవినాశ్ రెడ్డి, మరో 70 మందిపై నిబంధనల ఉల్లంఘన కింద అభియోగాలు నమోదయ్యాయి. ఈ నేపథ్యంలో తనపై నమోదైన కేసును రద్దు చేయాలని జగన్ హైకోర్టులో పిటిషన్ వేశారు.
మరోవైపు వైసీపీకి చెందిన పలువురు ఎమ్మెల్సీలు కూడా హైకోర్టును ఆశ్రయించారు. ఎన్నికల సమయంలో రాష్ట్ర ఎన్నికల సంఘం కార్యాలయం వద్ద నిరసన తెలిపినందుకు ఎమ్మెల్సీలు లేళ్ల అప్పిరెడ్డి, కల్పలతారెడ్డి, మురుగుడు హనుమంతరావు, రుహుల్లాపై విజయవాడలోని సూర్యారావుపేట పోలీస్ స్టేషన్‌లో కేసు నమోదైంది. తమపై నమోదైన కేసులను కొట్టివేయాలని కోరుతూ వారు కూడా క్వాష్ పిటిషన్లు దాఖలు చేశారు.
జగన్‌తో పాటు వైసీపీ ఎమ్మెల్సీలు దాఖలు చేసిన పిటిషన్లపై ఏపీ హైకోర్టు విచారణ చేపట్టనుంది. ఈ కేసుల విషయంలో న్యాయస్థానం ఎలాంటి నిర్ణయం తీసుకుంటుందన్నది ఆసక్తికరంగా మారింది.
Also Read- ఏపీ కేబినెట్ కీలక భేటీ.. SIPB ప్రతిపాదనలు, విశాఖ పెట్టుబడుల సదస్సుపై చర్చ