మచిలీపట్నం మేయర్‌ అభ్యర్థుల ఆస్తుల వివరాలు.. రూ.4.87 కోట్లతో లంకా జ్యోతి టాప్‌!
మచిలీపట్నం మేయర్‌ ఎన్నికల బరిలో నిలిచిన అభ్యర్థుల ఆస్తుల వివరాలు ఆసక్తికరంగా మారాయి. కూటమి తరఫున అబ్దుల్‌ అబీదా, వైకాపా నుంచి లంకా జ్యోతి, కాంగ్రెస్‌ తరఫున రహీమున్నీసా పోటీ చేస్తున్నారు. ఈ ముగ్గురు అభ్యర్థులు తమ కుటుంబాలకు సంబంధించిన స్థిర, చరాస్తుల వివరాలను అఫిడవిట్‌లలో వెల్లడించారు. అందులో వైకాపా అభ్యర్థి లంకా జ్యోతి కుటుంబానికి అత్యధికంగా రూ.4.87 కోట్ల ఆస్తులు ఉన్నట్లు పేర్కొన్నారు. మరోవైపు కాంగ్రెస్‌ అభ్యర్థి రహీమున్నీసా కుటుంబానికి మొత్తం రూ.20 వేల ఆస్తులు మాత్రమే ఉన్నట్లు వెల్లడైంది.
రూ.4.87 కోట్లతో లంకా జ్యోతి కుటుంబం టాప్‌
వైకాపా అభ్యర్థి లంకా జ్యోతి తన పేరుపై రూ.11,55,500 చరాస్తులు ఉన్నట్లు అఫిడవిట్‌లో పేర్కొన్నారు. ఆమె భర్త లంకా సూరిబాబు పేరుపై రూ.37,98,759 చరాస్తులు ఉన్నాయి. జ్యోతి పేరుపై స్థిరాస్తులు లేవని వెల్లడించగా, సూరిబాబు పేరుపై రూ.4.37 కోట్ల విలువైన స్థిరాస్తులు ఉన్నట్లు పేర్కొన్నారు. జ్యోతి పేరుపై రాయల్‌ ఎన్‌ఫీల్డ్‌ బైక్‌, యాక్టివా స్కూటీ ఉండగా, ఆమె భర్త పేరుపై ఇన్నోవా కారు ఉంది. కుటుంబ ఆస్తుల మొత్తం విలువ సుమారు రూ.4.87 కోట్లుగా ఉంది.
అబీదా కుటుంబ ఆస్తుల వివరాలు
కూటమి (టీడీపీ) అభ్యర్థి అబ్దుల్‌ అబీదా తన పేరుపై రూ.63,49,650 చరాస్తులు ఉన్నట్లు పేర్కొన్నారు. ఆమె భర్త హసీంబేగ్‌ పేరుపై రూ.88,49,659, కుమారుడు కరీంబేగ్‌ పేరుపై రూ.5,94,057, మరో కుమారుడు కాజిమ్‌ బేగ్‌ పేరుపై రూ.7 లక్షల చరాస్తులు ఉన్నట్లు అఫిడవిట్‌లో వివరించారు.
స్థిరాస్తుల విషయానికి వస్తే అబీదా పేరుపై రూ.18.95 లక్షల విలువైన ఆస్తులు, భర్త హసీంబేగ్‌ పేరుపై రూ.1,12,500 విలువైన ఆస్తులు ఉన్నట్లు పేర్కొన్నారు. ఆమె భర్తకు 2025 మోడల్‌ మహీంద్రా రాక్స్‌ కారు, గ్లామర్‌, హోండా ద్విచక్ర వాహనాలు ఉన్నాయి.
రహీమున్నీసా కుటుంబ ఆస్తులు రూ.20 వేలే!
కాంగ్రెస్‌ అభ్యర్థి రహీమున్నీసా అఫిడవిట్‌లో అత్యల్ప ఆస్తులు వెల్లడించారు. ఆమె పేరుపై రూ.10,000 చరాస్తులు ఉండగా, భర్త పేరుపై మరో రూ.10,000 ఉన్నట్లు పేర్కొన్నారు. మొత్తం కుటుంబ చరాస్తుల విలువ రూ.20,000 మాత్రమే. స్థిరాస్తులు లేవని అఫిడవిట్‌లో వెల్లడించారు.
ముగ్గురు మేయర్‌ అభ్యర్థులు సమర్పించిన అఫిడవిట్‌లలోని ఆస్తుల వివరాలు ఇప్పుడు ఎన్నికల చర్చలో ఆసక్తికర అంశంగా మారాయి.
Also Read - విశాఖ గ్రేటర్‌ ఎన్నికలు: జోరుగా కూటమి ప్రచారం.. పోలింగ్ గడువు పెంపుతో అభ్యర్థుల్లో టెన్షన్‌!