ఆంధ్రప్రదేశ్ మంత్రివర్గ సమావేశం సందర్భంగా అమరావతిలోని వెలగపూడి సచివాలయంలో ఆసక్తికర సన్నివేశం చోటుచేసుకుంది. ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కల్యాణ్‌కు మంత్రులు ఘన స్వాగతం పలికారు. వీరిద్దరూ కేబినెట్ సమావేశ మందిరంలోకి అడుగుపెట్టగానే మంత్రులంతా లేచి నిలబడి చప్పట్లు కొడుతూ అభినందనలు తెలిపారు. దీంతో కేబినెట్ హాల్ హర్షధ్వానాలతో మార్మోగిపోయింది.
చంద్రబాబు, పవన్ ఆప్యాయ పలకరింపు
సమావేశం ప్రారంభానికి ముందు ముఖ్యమంత్రి చంద్రబాబు, ఉప ముఖ్యమంత్రి పవన్ కల్యాణ్ ఒకరికొకరు ఆప్యాయంగా కరచాలనం చేసుకున్నారు. అనంతరం ఇద్దరూ కలిసి కేబినెట్ హాల్‌లోకి ప్రవేశించారు. ఈ సమయంలో అక్కడ ఉన్న మంత్రులంతా ఒక్కసారిగా లేచి నిలబడి చప్పట్లతో స్వాగతం పలికారు.
HIGHLIGHTS
- చంద్రబాబు, పవన్ కల్యాణ్‌కు మంత్రుల ఘన స్వాగతం.
- కేబినెట్ హాల్‌లో చప్పట్లతో అభినందనలు.
- సమావేశానికి ముందు ఇరువురు నేతల ఆప్యాయ పలకరింపు.
- స్థానిక సంస్థల ఎన్నికల విజయంతో మంత్రుల్లో ఉత్సాహం.
- 'హిట్ కొట్టాం' అంటూ మంత్రుల నినాదాలు.
- 30కి పైగా అంశాలపై కేబినెట్ సమావేశంలో చర్చ.
స్థానిక ఎన్నికల విజయోత్సాహం
ఇటీవల జరిగిన స్థానిక సంస్థల ఎన్నికల్లో కూటమి సాధించిన విజయంతో మంత్రుల్లో ఉత్సాహం కనిపించింది. ఎన్నికల్లో కూటమి మంచి స్ట్రైక్ రేట్ సాధించిందంటూ పలువురు మంత్రులు సంతోషం వ్యక్తం చేశారు. ఈ సందర్భంగా 'హిట్ కొట్టాం' అంటూ ఉత్సాహంగా నినాదాలు చేస్తూ చంద్రబాబు, పవన్ కల్యాణ్‌కు శుభాకాంక్షలు తెలిపారు.
30కి పైగా అంశాలపై కేబినెట్ చర్చ
మరోవైపు ఎన్నికల విజయోత్సాహం మధ్య ప్రారంభమైన మంత్రివర్గ సమావేశంలో రాష్ట్ర అభివృద్ధికి సంబంధించిన పలు అంశాలపై చర్చ కొనసాగింది. పారిశ్రామిక అభివృద్ధి, కొత్త పెట్టుబడుల ఆకర్షణ, యువతకు ఉపాధి అవకాశాల కల్పనతో పాటు 30కి పైగా అంశాలు సమావేశం అజెండాలో ఉన్నాయి. కీలక విధానాలకు ఆమోదం తెలిపే అంశాలు కూడా కేబినెట్ పరిశీలనకు వచ్చినట్లు సమాచారం.
Also Read- పీవీ సింధుకు అరుదైన గౌరవం.. అభినందనలు తెలిపిన మాజీ సీఎం జగన్