మురసు తుపాను ఆంధ్రప్రదేశ్‌లో భారీ నష్టాన్ని మిగిల్చింది. ముఖ్యంగా రాష్ట్రంలోని రహదారులు తీవ్రంగా దెబ్బతిన్నాయి. రోడ్లు, భవనాల శాఖ పరిధిలోని 10 జిల్లాల్లో సుమారు 1,302 కిలోమీటర్ల మేర రహదారులు ధ్వంసమైనట్లు ప్రభుత్వం ప్రాథమికంగా అంచనా వేసింది. వీటి పునరుద్ధరణకు రూ.870.90 కోట్లు అవసరమవుతాయని రాష్ట్ర రోడ్లు, భవనాల శాఖ మంత్రి బీసీ జనార్దన్ రెడ్డి వెల్లడించారు.
తుపాను కారణంగా దెబ్బతిన్న రహదారులను తిరిగి అందుబాటులోకి తీసుకురావడానికి ప్రభుత్వం చర్యలు చేపట్టింది. తాత్కాలిక మరమ్మతుల కోసం రూ.98.70 కోట్లు, శాశ్వత పునరుద్ధరణ పనుల కోసం రూ.772.22 కోట్లు అవసరమవుతాయని మంత్రి వివరించారు. క్షేత్రస్థాయిలో అధికారుల నుంచి అందిన ప్రాథమిక నివేదికల ఆధారంగా ఈ నష్టం అంచనాలను రూపొందించినట్లు తెలిపారు.
Highlights
- ఏపీలో మురసు తుపానుతో 1,302 కిలోమీటర్ల రోడ్లు దెబ్బతిన్నాయి.
- రహదారుల మరమ్మతులకు రూ.870.90 కోట్లు అవసరమని అంచనా.
- తాత్కాలిక పనులకు రూ.98.70 కోట్లు కేటాయింపు అవసరం.
- శాశ్వత పనులకు రూ.772.22 కోట్లు అవసరం.
- అత్యధికంగా బాపట్ల జిల్లాలో 332 కి.మీ రోడ్లు ధ్వంసం.
- 158 చోట్ల రోడ్లు కోతకు గురికాగా 141 చోట్ల మరమ్మతులు పూర్తి.
- 31 చోట్ల రోడ్లు కొట్టుకుపోగా 30 చోట్ల రాకపోకలు పునరుద్ధరణ.
మురసు తుపాను ప్రభావంతో రాష్ట్రవ్యాప్తంగా 158 ప్రాంతాల్లో రోడ్లు కోతకు గురయ్యాయి. అధికారులు యుద్ధప్రాతిపదికన చర్యలు చేపట్టి ఇప్పటికే 141 ప్రాంతాల్లో మరమ్మతులు పూర్తి చేశారు. మరోవైపు 31 ప్రాంతాల్లో రహదారులు పూర్తిగా కొట్టుకుపోగా, వాటిలో 30 చోట్ల రాకపోకలను పునరుద్ధరించారు. అలాగే 207 ప్రాంతాల్లో రోడ్లపై పడిపోయిన చెట్లను తొలగించి వాహనాల రాకపోకలకు అంతరాయం లేకుండా చర్యలు తీసుకున్నారు.
జిల్లాల వారీగా రోడ్ల నష్టం వివరాలు పరిశీలిస్తే.. బాపట్ల జిల్లాలో అత్యధికంగా 332 కిలోమీటర్ల మేర రహదారులు దెబ్బతిన్నాయి. గుంటూరులో 266 కిలోమీటర్లు, ఎన్టీఆర్ జిల్లాలో 202 కిలోమీటర్ల మేర రోడ్లు పాడయ్యాయి. పశ్చిమ గోదావరి జిల్లాలో 122 కిలోమీటర్లు, పల్నాడులో 93 కిలోమీటర్లు, ఏలూరులో 75 కిలోమీటర్లు, తూర్పు గోదావరిలో 68 కిలోమీటర్లు, నెల్లూరులో 66 కిలోమీటర్లు, కృష్ణా జిల్లాలో 59 కిలోమీటర్లు, ప్రకాశం జిల్లాలో 17 కిలోమీటర్ల మేర రహదారులు దెబ్బతిన్నట్లు అధికారులు గుర్తించారు.
వరద ప్రభావం తగ్గిన వెంటనే శాశ్వత రహదారి పునరుద్ధరణ పనులను వేగవంతం చేస్తామని మంత్రి బీసీ జనార్దన్ రెడ్డి స్పష్టం చేశారు. ప్రజలకు రవాణా ఇబ్బందులు కలగకుండా అవసరమైన చర్యలు తీసుకుంటున్నట్లు తెలిపారు. మొత్తంగా మురసు తుపాను కారణంగా రాష్ట్రంలో రహదారుల వ్యవస్థకు భారీ నష్టం వాటిల్లగా, వాటి పునరుద్ధరణ ప్రభుత్వానికి పెద్ద సవాలుగా మారింది.
Also Read- ఎన్నికల బరిలో అభ్యర్థికి ఒక్కటే ఓటు.. ఏపీలో ఆసక్తికర ఘటన!