అమరావతి:
స్థానిక సంస్థల ఎన్నికల్లో కూటమి ఐక్యతను కాపాడుతూ, క్షేత్రస్థాయి ఒత్తిళ్లను అధిగమించి సీట్ల సర్దుబాటు పూర్తి చేసుకున్నామని జనసేన అధినేత, ఆంధ్రప్రదేశ్ డిప్యూటీ సీఎం పవన్ కల్యాణ్ స్పష్టం చేశారు. 2024 సార్వత్రిక ఎన్నికల్లో ప్రజలు కూటమికి ఇచ్చిన చారిత్రాత్మక తీర్పును, కూటమి ధర్మాన్ని దృష్టిలో ఉంచుకునే ఈ నిర్ణయం తీసుకున్నామని తెలిపారు. సీఎం నారా చంద్రబాబు నాయుడు, భాజపా రాష్ట్ర అధ్యక్షుడు పీవీఎన్ మాధవ్‌లతో కలిసి ఉండవల్లిలోని సీఎం క్యాంపు కార్యాలయంలో నిర్వహించిన సంయుక్త విలేకరుల సమావేశంలో పవన్ కల్యాణ్ మాట్లాడారు.
రాష్ట్ర ప్రయోజనాలే పరమావధి
"జనసేన పార్టీ ప్రయాణం సుదీర్ఘమైనదని నేను మొదటి రోజే చెప్పాను. ఏ పార్టీ అయినా క్షేత్రస్థాయి నుంచి బలపడటానికి సమయం పడుతుంది. ప్రస్తుతం మూడు పార్టీల్లోనూ స్థానిక నేతల నుంచి ఒత్తిళ్లు ఉన్నప్పటికీ, రాష్ట్ర ప్రయోజనాలు మరియు భవిష్యత్తును దృష్టిలో ఉంచుకుని కూటమిగా కలసి సాగాలనే నిర్ణయానికి కట్టుబడి ఉన్నాం" అని పవన్ వ్యాఖ్యానించారు. క్లిష్ట పరిస్థితుల్లో అధికారంలోకి వచ్చినప్పటికీ, సీఎం చంద్రబాబు సమర్థ నాయకత్వంలో ప్రభుత్వం విజయవంతంగా ముందుకు సాగుతోందని కొనియాడారు.
Also Read - ట్రిపుల్ ఇంజిన్ సర్కార్ కావాలి.. గొడ్డలి పార్టీ విధ్వంసానికి పాల్పడుతోంది: సీఎం చంద్రబాబు!
గ్రామ స్వరాజ్యమే లక్ష్యం
గత రెండున్నరేళ్లలో తమ శాఖల పరిధిలోనే రూ.లక్షన్నర కోట్ల విలువైన అభివృద్ధి పనులు చేపట్టామని, గత ప్రభుత్వం నిర్వీర్యం చేసిన పలు సంక్షేమ పథకాలను పునరుద్ధరించామని డిప్యూటీ సీఎం వివరించారు. స్థానిక సంస్థలు బలోపేతమైనప్పుడే నిజమైన గ్రామ స్వరాజ్యం సాధ్యమవుతుందని, అన్ని సవాళ్లను దాటుకుని స్థానిక సమరానికి సిద్ధమయ్యామని చెప్పారు.
తుపాను ధాటికి ప్రభుత్వం సంసిద్ధం
మరోవైపు, స్థానిక ఎన్నికల పర్యవేక్షణ చూస్తూనే 'అర్నబ్' తుపాను ప్రభావాన్ని ఎదుర్కొనేందుకు ప్రభుత్వం అన్ని ముందస్తు చర్యలు చేపట్టిందని తెలిపారు. ప్రజలకు ఎలాంటి ఆస్తి, ప్రాణ నష్టం జరగకుండా తుపాను ముప్పును సమర్థంగా ఎదుర్కొనేందుకు అధికార యంత్రాంగం సంపూర్ణంగా సిద్ధంగా ఉందని పవన్ కల్యాణ్ హామీ ఇచ్చారు.
కూటమి సమన్వయం గొప్పది: పీవీఎన్ మాధవ్
అభివృద్ధికి స్థానిక సంస్థల ఎన్నికలు చాలా కీలకమని భాజపా రాష్ట్ర అధ్యక్షుడు పీవీఎన్ మాధవ్ అన్నారు. కూటమిలోని మూడు పార్టీల మధ్య ఉన్న సమన్వయం అభినందనీయమని పేర్కొన్నారు. సీట్ల సర్దుబాటు ప్రక్రియలో సీఎం చంద్రబాబు ఎంతో కృషి చేశారని, అందరం ఒక్కతాటిపైకి వచ్చి సమష్టిగా నిర్ణయాలు తీసుకున్నామని వెల్లడించారు.