శ్రీకాళహస్తి ఆలయ అన్నప్రసాద పోటులో అగ్నిప్రమాదం
నెయ్యి ఒలికిపడటంతో మంటలు చెలరేగినట్లు ప్రాథమిక అంచనా; ప్రాణనష్టం, గాయాలు లేకపోవడంతో ఊపిరిపీల్చుకున్న ఆలయ వర్గాలు
శ్రీకాళహస్తీశ్వర ఆలయ ప్రాంగణంలోని దక్షిణ గోపురం సమీపంలో ఉన్న అన్నప్రసాద పోటులో గురువారం అగ్నిప్రమాదం చోటుచేసుకుంది. స్వామివారికి లడ్డు, వడ, అన్నప్రసాదాలు తయారు చేస్తున్న సమయంలో నెయ్యి ఒలికిపడటంతో మంటలు చెలరేగినట్లు అధికారులు ప్రాథమికంగా అంచనా వేశారు.
మంటలు ఒక్కసారిగా ఎగసిపడటంతో పోటులో పనిచేస్తున్న సిబ్బంది, సమీపంలో ఉన్న భక్తులు భయంతో బయటకు వెళ్లారు. ఆలయ సిబ్బంది వెంటనే అప్రమత్తమై అగ్నిమాపక శాఖకు సమాచారం అందించారు. అక్కడికి చేరుకున్న అగ్నిమాపక సిబ్బంది మంటలను అదుపులోకి తెచ్చారు. ముందస్తు జాగ్రత్తగా సమీప మండపాలకు విద్యుత్ సరఫరా నిలిపివేశారు.
HIGHLIGHTS
- దక్షిణ గోపురం సమీపంలోని అన్నప్రసాద పోటులో ప్రమాదం
- నెయ్యి ఒలికిపడటంతో మంటలు చెలరేగినట్లు అంచనా
- ప్రాణనష్టం, గాయాలు లేవని ఆలయ వర్గాల సమాచారం
- ప్రసాదాల తయారీ తాత్కాలికంగా నిలిపివేత
ప్రమాద సమాచారం అందుకున్న ఆలయ ఈవో, ట్రస్ట్ బోర్డు ఛైర్మన్ ఘటనా స్థలానికి చేరుకుని పరిస్థితిని సమీక్షించారు. పోటులో మంటలు మళ్లీ చెలరేగే అవకాశం లేకుండా సిబ్బంది తనిఖీలు చేపట్టారు. ప్రసాదాల తయారీని తాత్కాలికంగా నిలిపివేసి, భద్రతా ఏర్పాట్లను పరిశీలిస్తున్నారు.
అధికారులు పూర్తి కారణాలపై ఆరా తీస్తున్నారు. వంట సామగ్రి, నెయ్యి నిల్వలు, విద్యుత్ కనెక్షన్లు, అగ్నిమాపక పరికరాల పనితీరును పరిశీలించిన తర్వాత తదుపరి చర్యలు తీసుకోనున్నారు. తనిఖీలు పూర్తయ్యాకే ప్రసాదాల తయారీ పునఃప్రారంభించే అవకాశం ఉంది.
Also Read - ఏపీ స్థానిక సంస్థల ఎన్నికలు: 19 మున్సిపాలిటీలు, 4 కార్పొరేషన్లకు 26న పోలింగ్