రాజకీయాల్లో మరో కొత్త అధ్యాయానికి తెరలేపేందుకు సిద్ధమవుతున్న రాజ్యసభ మాజీ సభ్యుడు విజయసాయిరెడ్డి.. వైసీపీ అధినేత వైఎస్ జగన్‌పై మరోసారి తీవ్రస్థాయిలో విమర్శలు చేశారు. వైసీపీ నుంచి తాను స్వచ్ఛందంగా బయటకు రాలేదని, తనను అవమానించి పార్టీ నుంచి వెళ్లిపోయేలా చేశారని ఆరోపించారు. ఒకటి, రెండు కాదు.. ఏకంగా 70కి పైగా అవమానాలను భరించానని చెబుతూ తన ఆవేదనను వ్యక్తం చేశారు.
ఈ నెల 11న కొత్త పార్టీ ఆవిర్భావం
ఈ నెల 11వ తేదీన తన కొత్త పార్టీ ఆవిర్భావం ఉంటుందని విజయసాయిరెడ్డి ప్రకటించారు. ఈ సందర్భంగా పలువురు నాయకులు ఆయన పార్టీలో చేరారు. విశ్వ హిందూ పరిషత్‌లో దశాబ్దాలుగా పనిచేసిన సుమతి రెడ్డి, అనకాపల్లికి చెందిన హిందూ ఎస్సీ, ఎస్టీ కులాల పరిరక్షణ సంఘం వ్యవస్థాపక అధ్యక్షుడు బోని గణేశ్ పార్టీలో చేరడం సంతోషంగా ఉందని తెలిపారు.
Highlights
- జగన్‌పై మరోసారి తీవ్ర ఆరోపణలు చేసిన విజయసాయిరెడ్డి.
- వైసీపీ నుంచి తనను అవమానించి బయటకు పంపించారని వ్యాఖ్య.
- ఒకటి, రెండు కాదు.. 70కి పైగా అవమానాలు భరించానని వెల్లడి.
- ఈ నెల 11న కొత్త పార్టీ ఆవిర్భావం ఉంటుందని ప్రకటన.
- సుమతి రెడ్డి, బోని గణేశ్ కొత్త పార్టీలో చేరిక.
- తిరుపతి జిల్లా నుంచి అసెంబ్లీకి పోటీ చేయనున్న సుమతి రెడ్డి.
- అన్ని కులాలు, మతాలు, వర్గాలకు సమన్యాయం చేస్తామని హామీ.
- రాష్ట్రంలో మూడో రాజకీయ ప్రత్యామ్నాయంగా ఎదుగుతామని ధీమా.
సుమతి రెడ్డి రాబోయే ఎన్నికల్లో తిరుపతి జిల్లా నుంచి అసెంబ్లీకి పోటీ చేస్తారని, ఏ నియోజకవర్గం నుంచి బరిలోకి దిగుతారనేది త్వరలో ప్రకటిస్తామని వెల్లడించారు. అన్ని కులాలు, మతాలు, వర్గాలకు సమన్యాయం చేయడమే తమ పార్టీ లక్ష్యమని చెప్పారు. యువతకు ప్రాధాన్యత ఇస్తూ, అంతర్గత ప్రజాస్వామ్యంతో పార్టీని నడిపిస్తామని స్పష్టం చేశారు.
జగన్ నన్ను బయటకు గెంటేశారు!
వైసీపీని వీడటానికి గల కారణాలను వివరిస్తూ విజయసాయిరెడ్డి తీవ్ర వ్యాఖ్యలు చేశారు. తాను పార్టీని వదిలి వెళ్లలేదని, తనను బయటకు వెళ్లేలా పరిస్థితులు కల్పించారని ఆరోపించారు. పొమ్మనకుండా పొగబెట్టి, అప్పుడప్పుడు అవమానిస్తూ భరించలేని పరిస్థితులు సృష్టించారని అన్నారు.
దివంగత వైఎస్ రాజశేఖర్ రెడ్డి తనను ఎప్పుడూ అవమానించలేదని, జగన్ హయాంలోనే ఇలాంటి పరిస్థితులు ఎదురయ్యాయని పేర్కొన్నారు. ఇతరుల మాటలు విని తనను దూరం పెట్టారని ఆరోపించారు. ఒకటి, రెండు కాదు.. 70కి పైగా అవమానాలను భరించానని, ఆత్మగౌరవాన్ని దెబ్బతీసినప్పుడు అక్కడ కొనసాగడం సాధ్యం కాలేదని ఆవేదన వ్యక్తం చేశారు.
హిందూత్వ ముద్రపై ఏమన్నారంటే?
తన కొత్త పార్టీలో కాషాయ రంగు ప్రభావం ఎక్కువగా ఉందన్న విమర్శలపైనా విజయసాయిరెడ్డి స్పందించారు. భారతమాత గురించి గొప్పగా మాట్లాడటం అంటే ఇతర మతాలను ద్వేషించడం కాదని స్పష్టం చేశారు. భారతదేశంలోని క్రైస్తవులు, ముస్లింలు సహా ప్రతి ఒక్కరికీ సమాన గౌరవం ఉండాలని పేర్కొన్నారు. హిందూ ధర్మం గురించి మాట్లాడటం ఇతర మతాలకు వ్యతిరేకం కాదని, అందరికీ సమన్యాయం చేయడమే తమ పార్టీ ఉద్దేశమని వివరించారు.
మూడో ప్రత్యామ్నాయంగా ఎదుగుతాం!
రాష్ట్రాన్ని రెండు కుటుంబాల చేతుల్లో పెట్టకూడదని విజయసాయిరెడ్డి అన్నారు. రాజ్యాంగబద్ధంగా ప్రతి ఒక్కరికీ వారి హక్కులు దక్కాలని, యువతకు రాజకీయాల్లో అధిక ప్రాధాన్యత కల్పిస్తామని తెలిపారు. అధికారంలో ఉన్నామని విర్రవీగితే ప్రజలు తగిన గుణపాఠం చెబుతారని వ్యాఖ్యానించారు.
స్థానిక సంస్థల ఎన్నికల్లో అధికార పార్టీ ఏకపక్ష వైఖరి ప్రజాస్వామ్యానికి విరుద్ధమని విమర్శించారు. తమ పార్టీలో ప్రతి ఒక్కరినీ గౌరవంగా చూస్తామని, ప్రజాస్వామ్యబద్ధంగా ముందుకు సాగుతామని హామీ ఇచ్చారు. రాష్ట్ర భవిష్యత్తును మార్చే మూడో రాజకీయ ప్రత్యామ్నాయంగా తమ పార్టీ నిలుస్తుందని విజయసాయిరెడ్డి ధీమా వ్యక్తం చేశారు.
Also Read- జనసేన రాజకీయ ప్రాతినిధ్యం 12–15 శాతమేనా? 2024 అసెంబ్లీ నుంచి 2026 స్థానిక సంస్థల ఎన్నికల వరకు పూర్తి విశ్లేషణ!