ఆంధ్రప్రదేశ్‌లో ఎంపీటీసీ, జెడ్పీటీసీ ఎన్నికల పోలింగ్‌ ఉదయం 7 గంటలకు ప్రశాంతంగా ప్రారంభమైంది. రాష్ట్రవ్యాప్తంగా ఓటర్లు తమ ఓటు హక్కును వినియోగించుకునేందుకు పోలింగ్‌ కేంద్రాలకు చేరుకుంటున్నారు. సాయంత్రం 5 గంటల వరకు పోలింగ్‌ కొనసాగనుంది. ఇటీవల జరిగిన మున్సిపల్ ఎన్నికల తర్వాత నిర్వహిస్తున్న పరిషత్‌ ఎన్నికలు రాష్ట్ర రాజకీయాల్లో ప్రాధాన్యత సంతరించుకున్నాయి.
ఈ ఎన్నికల్లో మొత్తం 582 జెడ్పీటీసీ స్థానాలు, 7,767 ఎంపీటీసీ స్థానాలకు పోలింగ్‌ జరుగుతోంది. ఈ స్థానాల కోసం 21,012 మంది అభ్యర్థులు బరిలో నిలిచారు. రాష్ట్రవ్యాప్తంగా సుమారు 2.61 కోట్ల మంది ఓటర్లు తమ ఓటు హక్కును వినియోగించుకోనున్నారు. ఇప్పటికే 2,000కు పైగా స్థానాలు ఏకగ్రీవమైనట్లు సమాచారం.
Highlights
- ఏపీ వ్యాప్తంగా ఎంపీటీసీ, జెడ్పీటీసీ ఎన్నికల పోలింగ్‌ ప్రారంభం
- 582 జెడ్పీటీసీ, 7,767 ఎంపీటీసీ స్థానాలకు ఎన్నికలు
- 21,012 మంది అభ్యర్థులు బరిలో
- సుమారు 2.61 కోట్ల మంది ఓటర్లు
- 31,460 పోలింగ్‌ కేంద్రాల్లో ఓటింగ్‌
- తుఫాను ప్రభావంతో ఐదు మండలాల్లో పోలింగ్‌ వాయిదా
- ఈ నెల 7న ఓట్ల లెక్కింపు
పోలింగ్‌ సజావుగా నిర్వహించేందుకు రాష్ట్ర ఎన్నికల సంఘం విస్తృత ఏర్పాట్లు చేసింది. మొత్తం 31,460 పోలింగ్‌ కేంద్రాలను ఏర్పాటు చేయగా, రెండు లక్షల మందికి పైగా అధికారులు, సిబ్బంది విధుల్లో పాల్గొంటున్నారు. ఎలాంటి అవాంఛనీయ ఘటనలు జరగకుండా రాష్ట్రవ్యాప్తంగా పోలీసు బందోబస్తు ఏర్పాటు చేశారు. సమస్యాత్మక ప్రాంతాల్లో అదనపు బలగాలను మోహరించారు. పోలింగ్‌ కేంద్రాల వద్ద నిఘా పెంచి ఎన్నికలను స్వేచ్ఛగా, నిష్పక్షపాతంగా నిర్వహించాలని విపక్షాలు కోరుతున్నాయి.
మరోవైపు, తుఫాను ప్రభావంతో ఏర్పడిన ప్రతికూల వాతావరణం కారణంగా ఏలూరు, తూర్పు గోదావరి జిల్లాల్లోని ఐదు మండలాల్లో పోలింగ్‌ను శుక్రవారానికి వాయిదా వేశారు. ఆయా ప్రాంతాల్లో శుక్రవారం ఓటింగ్‌ నిర్వహించనున్నారు. మిగిలిన ప్రాంతాల్లో పోలింగ్‌ యథావిధిగా కొనసాగుతోంది.
పోలింగ్‌ పూర్తయిన అనంతరం ఈ నెల 7న ఓట్ల లెక్కింపు చేపట్టి ఫలితాలను వెల్లడించనున్నారు. పరిషత్‌ ఎన్నికల ఫలితాలు రాష్ట్రంలోని రాజకీయ పార్టీలకు కీలకంగా మారనున్నాయి.
Also Read- ఏపీ మున్సిపల్ ఎన్నికల్లో ప్రధాన పార్టీలకు రెబల్స్ షాక్