ఆంధ్రప్రదేశ్‌లో జడ్పీటీసీ, ఎంపీటీసీ ఎన్నికల ఓట్ల లెక్కింపు ప్రక్రియ కొనసాగుతోంది. కౌంటింగ్ పూర్తయిన వెంటనే తుది ఫలితాలు వెల్లడించేందుకు అధికారులు ఏర్పాట్లు చేస్తున్నారు. ఈ నేపథ్యంలో సాయంత్రం 4 గంటలకల్లా ఫలితాలు వెలువడే అవకాశం ఉందని రాష్ట్ర ఎన్నికల కమిషనర్ అనిల్ చంద్ర పునేఠా తెలిపారు. గుంటూరులోని ఆచార్య నాగార్జున యూనివర్సిటీలో ఏర్పాటు చేసిన కౌంటింగ్ కేంద్రాన్ని సందర్శించిన ఆయన.. అక్కడి ఏర్పాట్లను పరిశీలించారు.
సీసీటీవీ కెమెరాల పర్యవేక్షణలో కౌంటింగ్
కౌంటింగ్ ప్రక్రియ పూర్తిగా పారదర్శకంగా జరుగుతోందని పునేఠా స్పష్టం చేశారు. మొత్తం ప్రక్రియను సీసీటీవీ కెమెరాల ద్వారా పర్యవేక్షిస్తున్నట్లు తెలిపారు. రాజకీయ పార్టీల కౌంటింగ్ ఏజెంట్ల సమక్షంలోనే బ్యాలెట్ బాక్సులను తెరిచామని వివరించారు. ఓట్ల లెక్కింపు తీరుపై ఏజెంట్లు సంతృప్తి వ్యక్తం చేసినట్లు పేర్కొన్నారు.
Highlights
- ఏపీ జడ్పీటీసీ, ఎంపీటీసీ కౌంటింగ్‌పై ఎస్ఈసీ కీలక ప్రకటన.
- సాయంత్రం 4 గంటలకల్లా తుది ఫలితాలు వచ్చే అవకాశం.
- గుంటూరులోని నాగార్జున యూనివర్సిటీ కౌంటింగ్ కేంద్రాన్ని పరిశీలించిన పునేఠా.
- సీసీటీవీ కెమెరాల పర్యవేక్షణలో ఓట్ల లెక్కింపు.
- ఏజెంట్ల సమక్షంలోనే బ్యాలెట్ బాక్సులు తెరిచినట్లు వెల్లడి.
- సీసీటీవీ ఫుటేజ్‌ను 60 రోజుల పాటు భద్రపరచనున్న అధికారులు.
- కలెక్టర్ నివేదిక ఆధారంగానే రీపోలింగ్‌పై నిర్ణయం.
- పరిషత్ ఎన్నికల తర్వాత గ్రామ పంచాయతీ ఎన్నికలు నిర్వహించే యోచన.
కౌంటింగ్‌కు సంబంధించిన సీసీటీవీ ఫుటేజ్‌ను 60 రోజుల పాటు భద్రపరుస్తామని చెప్పారు. ఏవైనా కోర్టు కేసులు ఉంటే అవసరాన్ని బట్టి అంతకంటే ఎక్కువ కాలం ఫుటేజ్‌ను భద్రపరుస్తామని వెల్లడించారు.
బ్యాలెట్ బాక్సులో కరపత్రాలు.. స్పందించిన ఎస్ఈసీ
పల్నాడు జిల్లా కంకణాలపల్లి గ్రామస్థులు తమ ప్రాంతంలో రైల్వే అండర్‌పాస్ బ్రిడ్జికి బదులుగా ఫ్లైఓవర్ నిర్మించాలని కోరుతూ బ్యాలెట్ బాక్సులో కరపత్రాలు వేశారు. ఈ అంశంపై మీడియా అడిగిన ప్రశ్నకు పునేఠా స్పందిస్తూ.. అది స్థానిక జిల్లా యంత్రాంగం పరిధిలోని విషయమని తెలిపారు.
రీపోలింగ్‌పై కీలక స్పష్టత
ఎక్కడైనా రిగ్గింగ్ జరిగినట్లు ఆరోపణలు వస్తే వెంటనే రీపోలింగ్ నిర్వహించబోమని పునేఠా స్పష్టం చేశారు. సంబంధిత జిల్లా కలెక్టర్ రిగ్గింగ్ జరిగినట్లు నివేదిక సమర్పిస్తేనే రీపోలింగ్ నిర్వహించే అంశాన్ని పరిశీలిస్తామని చెప్పారు. ఎన్నికల ప్రక్రియలో వచ్చిన ఫిర్యాదులను నిబంధనల ప్రకారం పరిశీలిస్తామని వెల్లడించారు.
త్వరలో గ్రామ పంచాయతీ ఎన్నికలు
జడ్పీటీసీ, ఎంపీటీసీ ఎన్నికల ప్రక్రియ పూర్తయిన వెంటనే రాష్ట్రంలో గ్రామ పంచాయతీ ఎన్నికలు నిర్వహించేందుకు చర్యలు చేపడతామని పునేఠా తెలిపారు. దీంతో పరిషత్ ఎన్నికల తర్వాత పంచాయతీ ఎన్నికలపై కూడా రాజకీయ వర్గాల్లో ఆసక్తి నెలకొంది.
Also Read- కౌంటింగ్ కేంద్రానికి వెళ్లబోతుండగా అడ్డుకున్న పోలీసులు.. వైసీపీ నేత బైరెడ్డి సిద్ధార్థ్ రెడ్డి హౌస్ అరెస్ట్!