ఆంధ్రప్రదేశ్ పురపాలక ఎన్నికల ఫలితాల్లో బాపట్ల జిల్లా చీరాల మున్సిపాలిటీ ప్రత్యేక ఆకర్షణగా నిలిచింది. రాష్ట్రవ్యాప్తంగా టీడీపీ కూటమి ఆధిక్యం కనిపించినప్పటికీ, చీరాలలో కాంగ్రెస్ పార్టీ అనూహ్య ఫలితాలు సాధించింది. శుక్రవారం వెలువడిన ఎన్నికల ఫలితాల్లో కాంగ్రెస్ ఏకంగా 10 వార్డులను కైవసం చేసుకుంది. దాదాపు దశాబ్ద కాలం తర్వాత చీరాల మున్సిపాలిటీలో కాంగ్రెస్ తన రాజకీయ ఉనికిని చాటుకోవడం ఆసక్తికరంగా మారింది.
మురసు తుపానుతో ఆలస్యంగా వెలువడిన ఫలితాలు
వాస్తవానికి రాష్ట్రవ్యాప్తంగా మున్సిపల్ ఎన్నికల ఓట్ల లెక్కింపు ఈ నెల 3న నిర్వహించారు. అయితే మురసు తుపాను ప్రభావంతో బాపట్ల జిల్లా చీరాల మున్సిపాలిటీ కౌంటింగ్‌ను నవంబర్ 6కి వాయిదా వేశారు. శుక్రవారం నిర్వహించిన ఓట్ల లెక్కింపులో పలు ఆసక్తికర ఫలితాలు వెలువడ్డాయి. ముఖ్యంగా కాంగ్రెస్ పార్టీ సాధించిన 10 వార్డుల విజయం రాజకీయ వర్గాల్లో చర్చనీయాంశంగా మారింది.
ఆమంచి కృష్ణమోహన్ ప్రభావంతో కాంగ్రెస్‌కు విజయాలు?
చీరాలలో కాంగ్రెస్ పార్టీ ఈ స్థాయిలో విజయం సాధించడం వెనుక మాజీ ఎమ్మెల్యే ఆమంచి కృష్ణమోహన్ ప్రభావం ఉందని రాజకీయ విశ్లేషకులు భావిస్తున్నారు. కాంగ్రెస్‌లో చేరిన ఆయన మద్దతుతో బరిలోకి దిగిన అభ్యర్థులు పలు వార్డుల్లో గట్టి పోటీ ఇచ్చారు. చివరకు 10 వార్డుల్లో విజయం సాధించారు.
Highlights
- బాపట్ల జిల్లా చీరాల మున్సిపాలిటీలో కాంగ్రెస్‌కు 10 వార్డులు
- దశాబ్ద కాలం తర్వాత కాంగ్రెస్‌కు గణనీయమైన విజయం
- మురసు తుపాను కారణంగా నవంబర్ 6కి వాయిదా పడిన కౌంటింగ్
- ఆమంచి కృష్ణమోహన్ ప్రభావంతో కాంగ్రెస్ అభ్యర్థులకు విజయాలు
- 1, 21, 25, 33వ వార్డులతో పాటు మరో ఆరు వార్డుల్లో గెలుపు
- 25వ వార్డులో వెంకట్రావు విజయం ప్రత్యేక ఆకర్షణ
- కాంగ్రెస్ విజయంపై హర్షం వ్యక్తం చేసిన ఏపీసీసీ
- విజేతలకు శుభాకాంక్షలు తెలిపిన ఆంధ్రప్రదేశ్ కాంగ్రెస్ కమిటీ
కాంగ్రెస్ అభ్యర్థులు 1, 21, 25, 33వ వార్డులతో పాటు మరో ఆరు వార్డుల్లో గెలుపొందారు. ముఖ్యంగా 25వ వార్డులో కాంగ్రెస్ అభ్యర్థి వెంకట్రావు బీజేపీ, వైసీపీ అభ్యర్థులను వెనక్కి నెట్టి విజయం సాధించడం ప్రత్యేకంగా నిలిచింది.
కాంగ్రెస్‌లో కొత్త ఉత్సాహం.. విజేతలకు ఏపీసీసీ అభినందనలు
రాష్ట్రంలో రాజకీయంగా తన ఉనికిని చాటుకునేందుకు ప్రయత్నిస్తున్న కాంగ్రెస్ పార్టీకి చీరాల ఫలితాలు కొత్త ఉత్సాహాన్ని ఇచ్చాయి. ఈ విజయంపై ఆంధ్రప్రదేశ్ కాంగ్రెస్ కమిటీ (ఏపీసీసీ) హర్షం వ్యక్తం చేసింది. సోషల్ మీడియా వేదికగా విజయం సాధించిన అభ్యర్థులకు శుభాకాంక్షలు తెలిపింది.
ప్రజలు తమపై ఉంచిన నమ్మకాన్ని నిలబెట్టుకుంటూ ప్రజాసేవలో ముందుండాలని, వార్డుల అభివృద్ధికి కృషి చేయాలని విజేతలకు సూచించింది. మొత్తంగా చీరాల మున్సిపాలిటీ ఎన్నికల్లో కాంగ్రెస్ సాధించిన 10 వార్డుల విజయం రాష్ట్ర రాజకీయాల్లో ఆసక్తికర పరిణామంగా మారింది.
Also Read- చీరాల మున్సిపల్ ఎన్నికల్లో కాంగ్రెస్‌కు 10 సీట్లు.. రాష్ట్రంలో ప్రత్యామ్నాయ శక్తిగా ఎదుగుతాం: వైఎస్ షర్మిల