మురసు తుపాను ప్రభావం ఆంధ్రప్రదేశ్‌లో పరిషత్ ఎన్నికలపై పడింది. భారీ వర్షాలు, ఆకస్మిక వరదల పరిస్థితుల నేపథ్యంలో తూర్పు గోదావరి, ఏలూరు జిల్లాల్లోని ఆరు మండలాల్లో ఎంపీటీసీ, జెడ్పీటీసీ ఎన్నికలను అధికారులు వాయిదా వేశారు. తుపాను తీవ్రతను దృష్టిలో పెట్టుకుని ఆయా జిల్లాల కలెక్టర్లు సమర్పించిన నివేదికల ఆధారంగా ఎన్నికల యంత్రాంగం ఈ నిర్ణయం తీసుకుంది.
తూర్పు గోదావరి జిల్లాలోని గోపాలపురం మండలంలో పోలింగ్‌ను వాయిదా వేస్తున్నట్లు జిల్లా ఎన్నికల అధికారి, కలెక్టర్ కీర్తి చేకూరి ప్రకటించారు. ఆకస్మిక వరదల కారణంగా ప్రస్తుత పరిస్థితుల్లో ఎన్నికలు నిర్వహించడం సాధ్యం కాదని అధికారులు నిర్ణయించారు. ఈ మండలంలో నవంబర్ 6వ తేదీన ఉదయం 7 గంటల నుంచి సాయంత్రం 5 గంటల వరకు పోలింగ్ నిర్వహించనున్నట్లు కలెక్టర్ వెల్లడించారు. ఇందుకు సంబంధించి కొత్త షెడ్యూల్‌ను విడుదల చేశారు. గోపాలపురం మినహా జిల్లాలోని మిగిలిన మండలాల్లో ఎన్నికల ప్రక్రియ యథావిధిగా కొనసాగుతుందని స్పష్టం చేశారు.
Highlights
- మురసు తుపాను ప్రభావంతో ఏపీలో పరిషత్ ఎన్నికలకు ఆటంకం
- తూర్పు గోదావరి, ఏలూరు జిల్లాల్లో ఆరు మండలాల్లో పోలింగ్ వాయిదా
- గోపాలపురం మండలంలో నవంబర్ 6న పోలింగ్
- ఏలూరు జిల్లాలో ఐదు మండలాల్లో ఎన్నికలు నిలిపివేత
- వేలేరుపాడు, బుట్టాయగూడెం, జీలుగుమిల్లి మండలాల్లో వాయిదా
- పోలవరం, కొయ్యలగూడెం మండలాల్లోనూ పోలింగ్ వాయిదా
- కలెక్టర్ల నివేదికల ఆధారంగా నిర్ణయం తీసుకున్న ఎన్నికల యంత్రాంగం
మరోవైపు ఏలూరు జిల్లాలో తుపాను ప్రభావం ఎక్కువగా ఉన్న ఐదు మండలాల్లోనూ పోలింగ్ వాయిదా పడింది. వేలేరుపాడు, బుట్టాయగూడెం, జీలుగుమిల్లి, పోలవరం, కొయ్యలగూడెం మండలాల్లో ఎన్నికల ప్రక్రియను తాత్కాలికంగా నిలిపివేస్తున్నట్లు అధికారులు వెల్లడించారు. ఈ ప్రాంతాల్లో వాతావరణ పరిస్థితులను పరిశీలించిన తర్వాత ఎన్నికల నిర్వహణపై తదుపరి నిర్ణయం తీసుకోనున్నారు.
మొత్తంగా తూర్పు గోదావరి జిల్లాలో ఒకటి, ఏలూరు జిల్లాలో ఐదు.. ఇలా ఆరు మండలాల్లో పరిషత్ ఎన్నికల పోలింగ్ వాయిదా పడింది. తుపాను ప్రభావం తగ్గిన తర్వాత మిగిలిన ప్రాంతాల్లో ఎన్నికల ప్రక్రియను ఎలా కొనసాగించాలనే దానిపై అధికారులు నిర్ణయం తీసుకోనున్నారు.
Also Read -పరిషత్ ఎన్నికలపై వైసీపీ కీలక డిమాండ్.. పోలింగ్ కేంద్రాల్లో ఏం ఏర్పాటు చేయాలంటోంది?