డోన్‌లో కోట్ల సుజాతమ్మ ప్రచారం.. తల్లి గెలుపు కోసం కుమార్తె నివేదితమ్మ ఇంటింటికీ పర్యటన
నంద్యాల జిల్లా డోన్ మున్సిపల్ ఎన్నికల ప్రచారం ఊపందుకుంది. టీడీపీ మున్సిపల్ ఛైర్మన్ అభ్యర్థి, మాజీ ఎమ్మెల్యే కోట్ల సుజాతమ్మ పట్టణంలోని 9వ వార్డులో ప్రచారం నిర్వహించారు. స్థానిక టీడీపీ అభ్యర్థి వెంకట రాముడుతో కలిసి ఇంటింటికీ వెళ్లి ప్రజలను కలిశారు. వారి సమస్యలను అడిగి తెలుసుకున్నారు.
ఈ సందర్భంగా కోట్ల సుజాతమ్మ మాట్లాడుతూ డోన్ పట్టణ అభివృద్ధి, ప్రజా సమస్యల పరిష్కారం, సంక్షేమ కార్యక్రమాల అమలే తమ ప్రధాన లక్ష్యాలని తెలిపారు. మున్సిపల్ ఎన్నికల్లో కూటమి అభ్యర్థులకు మద్దతు ఇవ్వాలని ఓటర్లను కోరారు.
మరోవైపు, సుజాతమ్మ పెద్ద కుమార్తె కోట్ల నివేదితమ్మ కూడా ప్రచారంలో పాల్గొన్నారు. పట్టణంలోని 8వ వార్డులో ఇంటింటికీ తిరుగుతూ తన తల్లికి మద్దతు ఇవ్వాలని ప్రజలను అభ్యర్థించారు. గతంలో తన తల్లి డోన్ ఎమ్మెల్యేగా పనిచేశారని, ప్రస్తుతం తన తండ్రి కోట్ల జయసూర్య ప్రకాష్ రెడ్డి డోన్ ఎమ్మెల్యేగా ఉన్నారని ప్రజలకు వివరించారు.
తన తల్లి మున్సిపల్ ఛైర్మన్‌గా ఎన్నికైతే డోన్ పట్టణం, నియోజకవర్గ అభివృద్ధికి మరింత కృషి చేస్తారని నివేదితమ్మ ప్రచారంలో పేర్కొన్నారు. మున్సిపల్ ఎన్నికల నేపథ్యంలో ప్రధాన పార్టీల అభ్యర్థులు ఇంటింటి ప్రచారంతో ఓటర్లను ఆకట్టుకునే ప్రయత్నం చేస్తున్నారు.