స్థానిక ఎన్నికల్లో మంత్రి కుటుంబం నుంచి నలుగురి నామినేషన్లు
ఆంధ్రప్రదేశ్‌లో స్థానిక సంస్థల ఎన్నికల నేపథ్యంలో మంత్రి మండిపల్లి రాంప్రసాద్‌రెడ్డి కుటుంబానికి చెందిన నలుగురు నామినేషన్లు దాఖలు చేయడం చర్చనీయాంశంగా మారింది. చిన్నమండెం మండలంలోని పడమటికోన ఎంపీటీసీ స్థానం నుంచి మంత్రి తల్లి సుశీలమ్మ గురువారం నామినేషన్‌ దాఖలు చేయగా, ఆయన సతీమణి హరితమ్మ శుక్రవారం నామినేషన్‌ వేశారు.
మంత్రి సోదరుడు లక్ష్మీప్రసాద్‌రెడ్డి తెలుగుదేశం పార్టీ తరఫున జడ్పీటీసీ అభ్యర్థిగా నామినేషన్‌ దాఖలు చేశారు. మరోవైపు, మంత్రి వరుసకు సోదరుడైన పి.దేవనాథరెడ్డి వైఎస్సార్‌ కాంగ్రెస్‌ పార్టీ తరఫున జడ్పీటీసీ స్థానానికి నామినేషన్‌ వేశారు.
నామినేషన్ల పరిశీలన, ఉపసంహరణ ప్రక్రియ అనంతరం ఎవరు బరిలో నిలుస్తారనే అంశంపై నియోజకవర్గంలో ఆసక్తి నెలకొంది. సుశీలమ్మ, హరితమ్మల్లో ఎవరు పోటీలో ఉన్నా వారే చిన్నమండెం ఎంపీపీ అభ్యర్థిగా ఉంటారని పార్టీ వర్గాలు తెలిపాయి. తుది అభ్యర్థులపై స్పష్టత రావాలంటే పరిశీలన, ఉపసంహరణ ప్రక్రియ పూర్తయ్యే వరకు వేచి చూడాల్సి ఉంటుంది.