విజయవాడ సెంట్రల్ నియోజకవర్గంలో కూటమి సీట్ల కేటాయింపు వ్యవహారం తెలుగుదేశం పార్టీలో వివాదానికి దారితీసింది. కార్పొరేటర్ టికెట్ల విషయంలో పార్టీ నిర్ణయాలను ధిక్కరించి స్వతంత్ర అభ్యర్థులుగా పోటీ చేయడంతో పాటు, కూటమి అభ్యర్థులకు వ్యతిరేకంగా వ్యవహరిస్తున్న ఏడుగురు నేతలను టీడీపీ సస్పెండ్ చేసింది. ఈ మేరకు సెంట్రల్ ఎమ్మెల్యే బొండా ఉమామహేశ్వరరావు శుక్రవారం ఉత్తర్వులు జారీ చేశారు.
69వ డివిజన్‌లో వివాదం
కూటమి పొత్తులో భాగంగా విజయవాడలోని 69వ డివిజన్‌ను జనసేనకు కేటాయించారు. జనసేన అభ్యర్థిగా అడబాల కృష్ణాజీ పోటీలో ఉండగా, టీడీపీ నాయకుడు కాకొల్లు మహేంద్రనాథ్ (బాబి) స్వతంత్ర అభ్యర్థిగా బరిలో నిలిచారు. పార్టీ ఆదేశాలను పాటించకుండా నామినేషన్ ఉపసంహరించుకోకపోవడంతో మహేంద్రనాథ్‌పై సస్పెన్షన్ వేటు పడింది. ఆయనకు సహకరిస్తున్న దేవరపు మాల్యాద్రి, గెడ్డం శ్రీనివాసరావు, కోట నారాయణ, చంద్రశేఖర్‌లపైనా పార్టీ చర్యలు తీసుకుంది.
1వ డివిజన్‌లోనూ పోటీ
మరోవైపు, 1వ డివిజన్‌లో టీడీపీ తరఫున గుడిపాటి సౌజన్యకు పార్టీ టికెట్ కేటాయించింది. అయితే, డివిజన్ అధ్యక్షుడు కొమ్మినేని సురేష్ ఈ సీటును ఆశించారు. టికెట్ దక్కకపోవడంతో ఆయన భార్య కొమ్మినేని సునీత, టీడీపీ నాయకురాలు మాదాల సత్యవతి స్వతంత్ర అభ్యర్థులుగా పోటీకి దిగారు. పార్టీ క్రమశిక్షణను ఉల్లంఘించారనే కారణంతో వీరిపైనా సస్పెన్షన్ చర్యలు తీసుకున్నారు.
పార్టీతో సంబంధాలు తెగతెంపులు
ఈ రెండు డివిజన్లకు చెందిన మొత్తం ఏడుగురిని పార్టీ నుంచి సస్పెండ్ చేసినట్లు ఎమ్మెల్యే బొండా ఉమామహేశ్వరరావు వెల్లడించారు. సస్పెన్షన్‌కు గురైన నేతలకు టీడీపీతో ఎలాంటి సంబంధం లేదని, పార్టీ నాయకులు, కార్యకర్తలు, ప్రజలు ఈ విషయాన్ని గమనించాలని ఆయన పేర్కొన్నారు.
Also Read - జక్కంపూడి రాజాపై మరో కేసు నమోదు.. వైసీపీ నేతల్లో కలకలం