ఆంధ్రప్రదేశ్‌లో పరిషత్ ఎన్నికల కౌంటింగ్ వేళ శ్రీకాకుళం, నంద్యాల జిల్లాల్లో వాహనాల దహనం ఘటనలు కలకలం రేపాయి. శ్రీకాకుళం జిల్లా పాలకొండ నియోజకవర్గంలో కూటమి అభ్యర్థి ప్రచార రథానికి గుర్తుతెలియని వ్యక్తులు నిప్పంటించగా.. నంద్యాల జిల్లా ఆళ్లగడ్డలో మూడు కార్లు, ఒక ద్విచక్ర వాహనాన్ని దగ్ధం చేశారు. వరుస ఘటనలతో ఆయా ప్రాంతాల్లో ఉద్రిక్త వాతావరణం నెలకొంది.
పాలకొండలో ప్రచార రథానికి నిప్పు
శ్రీకాకుళం జిల్లా పాలకొండ నియోజకవర్గ పరిధిలోని వీరఘట్టం మండలం నీలానగరం గ్రామంలో ఈ ఘటన చోటుచేసుకుంది. కూటమి అభ్యర్థి ఎన్నికల ప్రచారం కోసం ప్రత్యేకంగా రూపొందించిన ప్రచార రథాన్ని గుర్తుతెలియని వ్యక్తులు అర్ధరాత్రి లక్ష్యంగా చేసుకున్నారు. మాజీ మంత్రి కిమిడి కళా వెంకటరావు, పాలకొండ జనసేన ఎమ్మెల్యే నిమ్మక జయకృష్ణ చిత్రాలతో అలంకరించిన ఆ వాహనంపై పెట్రోల్ పోసి నిప్పంటించినట్లు సమాచారం. దీంతో కారు పూర్తిగా దగ్ధమైంది.
Highlights
- శ్రీకాకుళం జిల్లా నీలానగరంలో కూటమి ప్రచార రథం దగ్ధం.
- మాజీ మంత్రి కళా వెంకటరావు, ఎమ్మెల్యే నిమ్మక జయకృష్ణ చిత్రాలతో ఉన్న వాహనానికి నిప్పు.
- నంద్యాల జిల్లా ఆళ్లగడ్డలో మూడు కార్లు, ఒక బైక్ దహనం.
- రెండు కార్లు, బైక్ పూర్తిగా కాలిపోయినట్లు సమాచారం.
- ఘటనలతో రెండు ప్రాంతాల్లో ఉద్రిక్తత.
ఈ ఘటనపై కూటమి శ్రేణులు, స్థానికులు ఆగ్రహం వ్యక్తం చేస్తున్నారు. రాజకీయ కక్షలతోనే ఈ దాడికి పాల్పడి ఉంటారని బాధితులు అనుమానం వ్యక్తం చేస్తున్నారు. ఘటనపై పోలీసులు విచారణ జరిపి బాధ్యులపై చర్యలు తీసుకోవాలని డిమాండ్ చేస్తున్నారు.
ఆళ్లగడ్డలో మూడు కార్లు, బైక్ దగ్ధం
మరోవైపు నంద్యాల జిల్లా ఆళ్లగడ్డలోనూ వాహనాల దహనం ఘటన చోటుచేసుకుంది. ఏఎన్ఆర్ మహబూబ్ బాషా ఇంటి వెలుపల పార్క్ చేసి ఉన్న వాహనాలపై గుర్తుతెలియని వ్యక్తులు దాడి చేసినట్లు సమాచారం. మూడు కార్లు, ఒక ద్విచక్ర వాహనానికి నిప్పంటించారు.
ఈ ఘటనలో రెండు కార్లు, ఒక బైక్ పూర్తిగా దగ్ధం కాగా.. మరో కారు సగానికి పైగా కాలిపోయింది. కౌంటింగ్ సమయంలో చోటుచేసుకున్న ఈ ఘటనతో ఆళ్లగడ్డలో ఉద్రిక్తత నెలకొంది.
రాజకీయ కక్షలా? తెరవెనుక కుట్రలా?
ఒకే సమయంలో రెండు జిల్లాల్లో వాహనాల దహనం ఘటనలు చోటుచేసుకోవడంతో స్థానికంగా అనుమానాలు వ్యక్తమవుతున్నాయి. అయితే ఈ ఘటనల వెనుక ఎవరున్నారు? రాజకీయ కక్షలే కారణమా? అనే విషయాలు పోలీసుల విచారణలో తేలాల్సి ఉంది. ఘటనలకు సంబంధించిన పూర్తి వివరాలు, నిందితుల గుర్తింపు ఇంకా వెల్లడికావాల్సి ఉంది.
Also Read- పల్లె, పట్టణం తేడా లేకుండా కూటమికి ప్రజా పట్టం.. జగన్ విమర్శలపై ఎమ్మెల్యే గద్దె రామ్మోహన్ ఫైర్!