ఆంధ్రప్రదేశ్‌లో జడ్పీటీసీ, ఎంపీటీసీ ఎన్నికల పోలింగ్ కొనసాగుతోంది. కొన్ని ప్రాంతాల్లో మినహా రాష్ట్రవ్యాప్తంగా మిగిలిన చోట్ల పోలింగ్ ప్రశాంతంగా జరుగుతోంది. ఈ క్రమంలో ప్రకాశం జిల్లా టంగుటూరు మండలం తూర్పు నాయుడుపాలెంలోని పోలింగ్ కేంద్రంలో మంత్రి బాల వీరాంజనేయస్వామి తన ఓటు హక్కును వినియోగించుకున్నారు.
ఓటు వేసిన అనంతరం మీడియాతో మాట్లాడిన మంత్రి.. ఇటీవల జరిగిన మున్సిపల్ ఎన్నికల ఫలితాలే పరిషత్ ఎన్నికల్లోనూ పునరావృతం కాబోతున్నాయని ధీమా వ్యక్తం చేశారు. ప్రజలు ఏకపక్షంగా కూటమి పార్టీలకు ఓట్లు వేస్తున్నారని తెలిపారు.
వైసీపీ అధినేత జగన్‌పై మంత్రి తీవ్ర విమర్శలు చేశారు. జగన్ బలవంతంగా ఆ పార్టీ నాయకులను ఎన్నికల బరిలో నిలబెట్టారని ఆరోపించారు. ఎన్నికల్లో పోటీ చేసి ఆర్థికంగా నష్టపోయామని వైసీపీ అభ్యర్థులే చెబుతున్నారని వ్యాఖ్యానించారు. ప్రజల తీర్పును చూసైనా ఆ పార్టీ నేతలు బుద్ధి తెచ్చుకోవాలని అన్నారు.
Highlights
- తూర్పు నాయుడుపాలెంలో ఓటు హక్కు వినియోగించుకున్న మంత్రి బాల వీరాంజనేయస్వామి.
- మున్సిపల్ ఎన్నికల ఫలితాలే పరిషత్ ఎన్నికల్లోనూ పునరావృతమవుతాయని మంత్రి ధీమా.
- కూటమి పార్టీలకు ప్రజలు ఏకపక్షంగా ఓట్లు వేస్తున్నారని వ్యాఖ్య.
- జగన్ బలవంతంగా వైసీపీ నేతలను ఎన్నికల బరిలో నిలబెట్టారని ఆరోపణ.
- రాష్ట్రవ్యాప్తంగా ఉదయం 9 గంటలకు 4.8 శాతం పోలింగ్ నమోదు.
- అనంతపురంలో అత్యధికంగా 9.44 శాతం, బాపట్లలో అత్యల్పంగా 1.38 శాతం పోలింగ్.
మరోవైపు రాష్ట్రవ్యాప్తంగా 28 జడ్పీల్లో 582 జడ్పీటీసీ స్థానాలకు, 659 ఎంపీపీల పరిధిలో 7,767 ఎంపీటీసీ స్థానాలకు ఎన్నికలు జరుగుతున్నాయి. జడ్పీటీసీ స్థానాలకు 2,169 మంది, ఎంపీటీసీ స్థానాలకు 18,843 మంది అభ్యర్థులు పోటీలో ఉన్నారు. ఉదయం నుంచే ఓటర్లు పోలింగ్ కేంద్రాలకు చేరుకుని తమ ఓటు హక్కును వినియోగించుకుంటున్నారు. సాయంత్రం 5 గంటల వరకు పోలింగ్ కొనసాగనుంది.
ఉదయం 9 గంటల సమయానికి రాష్ట్రవ్యాప్తంగా 4.8 శాతం పోలింగ్ నమోదైంది. అనంతపురం జిల్లాలో అత్యధికంగా 9.44 శాతం పోలింగ్ నమోదుకాగా, బాపట్ల జిల్లాలో అత్యల్పంగా 1.38 శాతం నమోదైనట్లు అధికారులు వెల్లడించారు.
Also Read -పోలింగ్ వేళ పార్నపల్లిలో హైడ్రామా.. వైఎస్ అవినాశ్ రెడ్డిని అడ్డుకున్న పోలీసులు, అక్కడ ఏం జరిగింది?