ఆంధ్రప్రదేశ్ మున్సిపల్ ఎన్నికల ఫలితాలపై ఏపీ కాంగ్రెస్ కమిటీ అధ్యక్షురాలు వైఎస్ షర్మిల తీవ్రంగా స్పందించారు. టీడీపీ-జనసేన-బీజేపీ కూటమి సాధించిన విజయంపై సోషల్ మీడియా వేదికగా విమర్శలు గుప్పించారు. ఈ ఎన్నికల్లో వచ్చిన ఫలితాలు ప్రజా తీర్పు కాదని, అధికార మదంతో సాధించిన బలవంతపు గెలుపు అని ఆరోపించారు.
ఎన్నికల్లో ఓట్లు కూడా మీరే వేసుకుని, గెలుపు కూడా మీదేనని ప్రకటించుకున్నారని కూటమిని ఉద్దేశించి షర్మిల ప్రశ్నించారు. ప్రజలతో, ప్రజాస్వామ్యంతో ఇక పనేముందని వ్యాఖ్యానించారు. కూటమి విజయం ప్రజల నిజమైన తీర్పు కాదని, ప్రజల గొంతు నొక్కి, ప్రతిపక్షాలను అణచివేసి సాధించిన గెలుపు అని విమర్శించారు.
ఎన్నికల సంఘాన్ని కూటమి సంఘంగా మార్చారని, పోలీసు వ్యవస్థను తమ గుప్పిట్లోకి తీసుకున్నారని షర్మిల ఆరోపించారు. దేశం ముందు రాష్ట్ర పరువు తీశారని, ఇందుకు కూటమి పార్టీలు సిగ్గుపడాలని వ్యాఖ్యానించారు.
Highlights
- మున్సిపల్ ఎన్నికల ఫలితాలపై వైఎస్ షర్మిల తీవ్ర విమర్శలు.
- కూటమి విజయం ప్రజా తీర్పు కాదని ఆరోపణ.
- ఎన్నికల సంఘం, పోలీసు వ్యవస్థపై కూటమి ప్రభావం ఉందని విమర్శ.
- బలవంతపు ఏకగ్రీవాలు, ప్రతిపక్ష అభ్యర్థులపై బెదిరింపులు జరిగాయని ఆరోపణలు.
- ఓటరు తీర్పును తిరగరాయడం ప్రజాస్వామ్యానికి ప్రమాదకరమని వ్యాఖ్య.
రౌడీలు, గూండాలతో బలవంతపు ఏకగ్రీవాలకు పాల్పడ్డారని, ప్రతిపక్ష అభ్యర్థులను భయపెట్టి పోటీ నుంచి తప్పించారని ఆమె ఆరోపించారు. ఎన్నికలు జరిగిన చోట్ల దౌర్జన్యాలకు పాల్పడి బ్యాలెట్ బాక్సులను తమ ఆధీనంలోకి తీసుకున్నారని, ఓటు వేయకుండా ప్రజలను భయభ్రాంతులకు గురిచేశారని విమర్శించారు.
ఓటరు తీర్పును తిరగరాసే ఇలాంటి చర్యలు ప్రజాస్వామ్య మనుగడకే ప్రమాదకరమని షర్మిల పేర్కొన్నారు. వ్యవస్థల విధ్వంసానికి ఇవి పరాకాష్ట అని వ్యాఖ్యానించారు.
Also Read- స్థానిక ఎన్నికల ఫలితాలపై చంద్రబాబును కలిసిన పల్లా.. కూటమి విజయంపై ఏమన్నారంటే?