అగ్నివీర్ స్కీమ్: 2 ఏళ్ల అదనపు సర్వీస్ ఆప్షన్

అగ్నివీర్లకు మరో 2 ఏళ్ల సేవా అవకాశాన్ని కేంద్రం ప్రకటించింది

4 ఏళ్ల సేవ తర్వాత రెగ్యులర్ ఎంపిక కానివారికి అదనపు కాలం; పనితీరు ఆధారంగా మళ్లీ పరిశీలన

అగ్నిపథ్ పథకంలో కేంద్ర ప్రభుత్వం కీలక మార్పు చేసింది. ప్రారంభ 4 ఏళ్ల సేవ పూర్తి చేసిన అగ్నివీర్లలో రెగ్యులర్ సైనికులుగా ఎంపిక కాని వారికి మరో 2 ఏళ్ల పాటు సేవ చేసే అవకాశం కల్పించనున్నట్లు చీఫ్ ఆఫ్ డిఫెన్స్ స్టాఫ్ జనరల్ ఎన్.ఎస్. రాజా సుబ్రమణి బుధవారం న్యూఢిల్లీలో తెలిపారు.

కేంద్ర కేబినెట్ నిర్ణయాన్ని ప్రకటించిన ఆయన, ప్రస్తుతం 4 ఏళ్ల సేవ అనంతరం 25 శాతం అగ్నివీర్లను భారత సాయుధ దళాల్లో రెగ్యులర్ సైనికులుగా తీసుకుంటామని చెప్పారు. మిగిలిన 75 శాతం మందికి రెండో సేవా కాలంగా 2 ఏళ్ల అవకాశం ఇవ్వనున్నట్లు తెలిపారు. “75 శాతం అగ్నివీర్లకు 2 ఏళ్ల రెండో ఎంగేజ్‌మెంట్ పీరియడ్ ఆఫర్ చేస్తాం. ఆ 2 ఏళ్లు పూర్తి చేసిన తర్వాత అగ్నివీర్లందరికీ భారత సాయుధ దళాల్లో రెగ్యులర్ సైనికులుగా మారే అవకాశం ఉంటుంది” అని జనరల్ సుబ్రమణి ప్రెస్ కాన్ఫరెన్స్‌లో చెప్పారు.

అయితే ఈ అవకాశం 2 షరతులకు లోబడి ఉంటుందని ఆయన స్పష్టం చేశారు. “వారు చేరేందుకు సిద్ధంగా ఉండాలి. అలాగే నిర్దేశించిన ఎంపిక ప్రమాణాలను పూర్తి చేయాలి” అని సీడీఎస్ తెలిపారు. అదనపు 2 ఏళ్ల సేవ అనంతరం అగ్నివీర్ల పనితీరు, సామర్థ్యం, సేవలో సాధించిన పురోగతి, సాయుధ దళాల ఆపరేషనల్ అవసరాలు పరిశీలిస్తామని చెప్పారు.

HIGHLIGHTS

- మొదటి అగ్నివీర్ బ్యాచ్ ఈ నెల సేవ పూర్తిచేస్తోంది

- 25 శాతం మంది రెగ్యులర్ సైనికులుగా ఎంపిక

- మిగిలిన 75 శాతం మందికి 2 ఏళ్ల అదనపు అవకాశం

- ఎంపికకు పనితీరు, ఫిట్‌నెస్, క్రమశిక్షణ ప్రమాణాలు

అగ్నివీర్ల పనితీరును సేవా కాలంలో దశలవారీగా అంచనా వేస్తున్నామని జనరల్ సుబ్రమణి తెలిపారు. “శారీరక దారుఢ్యం, ప్రేరణ, మనోబలం, క్రమశిక్షణ, టెక్నికల్ నైపుణ్యం వంటి అంశాలను మూల్యాంకనంలో పరిగణిస్తాం” అని ఆయన చెప్పారు. రెండో సేవా కాలం ద్వారా అగ్నివీర్లకు నైపుణ్యాలు, అనుభవం పెంచుకునే అవకాశం లభిస్తుందని, సాయుధ దళాలకు శిక్షణ పొందిన మానవ వనరులను మరింత కాలం వినియోగించుకునే వీలు ఉంటుందని పేర్కొన్నారు.

అదనపు 2 ఏళ్ల కాలంలో అగ్నివీర్లకు ఎక్కువ వేతనం, పెరిగిన సేవా నిధి ప్రయోజనం లభిస్తుందని అధికారులు తెలిపారు. 4 ఏళ్ల ప్రారంభ సేవలో పొందిన సైనిక శిక్షణ, క్రమశిక్షణ, విభిన్న బాధ్యతల అనుభవం ఈ నిర్ణయంతో మరింత బలోపేతం అవుతుందని జనరల్ సుబ్రమణి చెప్పారు. మొదటి బ్యాచ్ సేవ ఈ నెల పూర్తవుతున్న నేపథ్యంలో, కొత్త నిబంధనల అమలు విధివిధానాలను రక్షణ వ్యవస్థలు త్వరలో ఖరారు చేయనున్నాయి.