సెప్టెంబర్ 24, 25న తొలి విడత; సెప్టెంబర్ 28, 29న వన్ టైమ్ స్పెషల్ స్పాట్ రౌండ్
రాష్ట్రంలోని డిగ్రీ కాలేజీల్లో ఖాళీగా ఉన్న మిగిలిన సీట్ల భర్తీకి దోస్త్ స్పాట్ అడ్మిషన్ల షెడ్యూల్ను విద్యాశాఖ విడుదల చేసింది. తెలంగాణ రాష్ట్ర ఉన్నత విద్యా మండలి ఛైర్మన్ బాలకిష్టారెడ్డి, కాలేజీ విద్యాశాఖ కమిషనర్ శ్రీదేవసేన బుధవారం వివరాలు వెల్లడించారు.
ప్రభుత్వ, యూనివర్సిటీ, ఎయిడెడ్ కాలేజీల్లోని రెగ్యులర్ కోర్సుల ఖాళీల వివరాలను సెప్టెంబర్ 23న సంబంధిత కాలేజీల నోటీస్ బోర్డులు, వెబ్సైట్లలో ప్రదర్శించనున్నట్లు అధికారులు తెలిపారు. తొలి విడత స్పాట్ అడ్మిషన్లు సెప్టెంబర్ 24, 25 తేదీల్లో ఆయా కాలేజీల్లో నిర్వహిస్తారు. సీట్లు పొందిన విద్యార్థుల వివరాలను కాలేజీ యాజమాన్యాలు సెప్టెంబర్ 26లోగా దోస్త్ పోర్టల్లో అప్లోడ్ చేయాలి.
రెండో విడతలో మిగిలిన సీట్ల భర్తీ కోసం సెప్టెంబర్ 28, 29 తేదీల్లో వన్ టైమ్ స్పెషల్ స్పాట్ రౌండ్ నిర్వహించనున్నారు. ఈ విడతలో అడ్మిషన్లు పొందిన వారి వివరాలను సెప్టెంబర్ 30లోగా పోర్టల్లో నమోదు చేయాలని విద్యాశాఖ ఆదేశించింది.
HIGHLIGHTS
- సెప్టెంబర్ 24, 25న తొలి విడత స్పాట్ అడ్మిషన్లు
- సెప్టెంబర్ 28, 29న స్పెషల్ స్పాట్ రౌండ్
- రిజిస్ట్రేషన్ ఫీజు రూ. 425
- ఫీజు రీయింబర్స్మెంట్ వర్తించదు
స్పాట్ అడ్మిషన్లలో పాల్గొనే విద్యార్థులు రిజిస్ట్రేషన్ ఫీజుగా రూ. 425ను నేరుగా కాలేజీలోనే చెల్లించాల్సి ఉంటుందని అధికారులు స్పష్టం చేశారు. అయితే స్పాట్ అడ్మిషన్ల ద్వారా ప్రవేశాలు పొందిన విద్యార్థులకు ప్రభుత్వ ఫీజు రీయింబర్స్మెంట్ సౌకర్యం వర్తించదని విద్యాశాఖ తెలిపింది.
విద్యార్థులు ఖాళీల వివరాలు చూసుకుని అవసరమైన సర్టిఫికెట్లతో సంబంధిత కాలేజీలను సంప్రదించాలి. కాలేజీలు నిర్ణీత గడువులోగా వివరాలు అప్లోడ్ చేయాల్సి ఉండగా, తదుపరి ప్రక్రియ సెప్టెంబర్ 30తో ముగియనుంది.
