రాబోయే మైథలాజికల్ మూవీ 'మహాకాళి' టీజర్ విడుదలైంది. దేవతలు, అసురుల మధ్య యుగయుగాలుగా ఉన్న పురాతన సంఘర్షణను సరికొత్త కోణంలో ఈ చిత్రం ఆవిష్కరిస్తోంది. 'హనుమాన్' ఘన విజయం తర్వాత ప్రశాంత్ వర్మ సినిమాటిక్ యూనివర్స్ (PVCU) నుంచి వస్తున్న లేటెస్ట్ మూవీ ఇది.
ఎప్పుడూ 'చెడు'గా భావించే వర్గానికి కూడా తమదైన ఓ కథ ఉంటే ఎలా ఉంటుందనే ఆసక్తికరమైన పాయింట్ చుట్టూ ఈ టీజర్ సాగుతుంది.
అసురులకు ఎందుకు అన్యాయం జరిగింది?
సముద్ర మథనం, అమృతం కోసం జరిగిన పోరాటాన్ని టీజర్లో చూపించారు. సముద్ర మథనంలో దేవతలు, అసురులు ఇద్దరూ పాల్గొన్నారు. కానీ, అమృతం మాత్రం దేవతలకే దక్కింది. ఇంద్రుడి సింహాసనంపై అసురులకు ఎందుకు హక్కు లేకుండా చేశారు? వారిని పాతాళానికి ఎందుకు పంపించారనే బలమైన ప్రశ్నలను టీజర్ లేవనెత్తింది.
అక్షయ్ ఖన్నా పోషిస్తున్న అసురుల గురువు 'శుక్రాచార్యుడి' పాత్ర ద్వారా ఈ ప్రశ్నలు వ్యక్తమవుతాయి. కేవలం మంచి, చెడుల మధ్య జరిగే పోరాటంగా కాకుండా, అసురులు తిరిగి దండెత్తడానికి గల కారణాన్ని ఈ టీజర్ జస్టిఫై చేస్తూ చూపించింది.
మానవ జాతికి పొంచి ఉన్న ముప్పు..
ఆ తర్వాత ఈ సంఘర్షణ పురాణాలను దాటి వెళుతుంది. అసురులు త్వరలోనే తమ అణచివేత నుంచి విముక్తి పొందుతారని శుక్రాచార్యుడు ప్రకటిస్తాడు. అనంతరం 'రక్తబీజుడు' ఎంట్రీతో మానవ జాతికి పొంచి ఉన్న ముప్పును టీజర్ సూచిస్తుంది.
"రక్తబీజ్! మానవ్ జాతి కా సర్వనాశ్ కర్దో" (మానవ జాతిని సర్వనాశనం చేయి) అంటూ శుక్రాచార్యుడు రక్తబీజుడిని ఆదేశించే కీలక ఘట్టం ఇందులో ఉంది. దీన్ని బట్టి చూస్తే, సినిమాలో పోరాటం కేవలం దేవతలు, అసురుల మధ్యకే పరిమితం కాదని అర్థమవుతోంది.
పసికందు మిస్టరీ..
టీజర్లో అప్పుడే పుట్టిన ఓ పసికందు చుట్టూ ఓ మిస్టరీ నెలకొంది. ఆ బిడ్డను గుడిలో వదిలిపెట్టే దృశ్యంతో టీజర్ మొదలవుతుంది. మళ్లీ చివర్లో అదే బిడ్డ సాక్షాత్తూ మహాకాళి అమ్మవారి చేతుల్లో కనిపిస్తుంది. ఆ బిడ్డకు, మహాకాళికి, ఈ మహాసంగ్రామానికి మధ్య ఉన్న సంబంధం ఏమిటన్నది ఇంకా రివీల్ చేయలేదు.
"ది ఎండ్ బిగిన్స్" (అంతం మొదలైంది) అనే క్యాప్షన్తో 2027 జనవరి 8న ఈ చిత్రాన్ని విడుదల చేయనున్నట్లు టీజర్ చివర్లో ప్రకటించారు. ఈ సినిమాలో అక్షయ్ ఖన్నాతో పాటు శ్రియా రెడ్డి, భూమి శెట్టి, రోహిత్ సరాఫ్, రాకేశ్ బేడీ, సముద్రఖని, రజత్ కపూర్, మురళీ శర్మ, నాజర్, పృథ్వీరాజ్ తదితరులు కీలక పాత్రలు పోషిస్తున్నారు.
పీవీసీయూ (PVCU) సృష్టికర్త ప్రశాంత్ వర్మ కాగా, ఈ 'మహాకాళి' చిత్రానికి పూజా అపర్ణ కొల్లూరు దర్శకత్వం వహించారు. ఆర్కేడీ స్టూడియోస్ బ్యానర్పై ఆర్.కె. దుగ్గల్ సమర్పణలో రివాజ్ రమేష్ దుగ్గల్ ఈ చిత్రాన్ని నిర్మిస్తున్నారు.
