హైదరాబాద్‌ శివార్లలో 100 అడుగుల వెడల్పుతో 2 రోడ్డు కారిడార్లకు భూసేకరణ
శంషాబాద్‌, రాజేంద్రనగర్‌ పరిధిలో 23,496 చదరపు గజాల భూమి సేకరణకు జీహెచ్‌ఎంసీ నోటిఫికేషన్లు జారీ చేసింది
హైదరాబాద్‌ శివార్లలో పెరుగుతున్న ట్రాఫిక్‌ రద్దీని తగ్గించేందుకు జీహెచ్‌ఎంసీ శంషాబాద్‌, రాజేంద్రనగర్‌ ప్రాంతాల్లో 2 ప్రధాన రహదారి కారిడార్ల విస్తరణకు భూసేకరణ ప్రక్రియ ప్రారంభించింది. 100 అడుగుల వెడల్పుతో అభివృద్ధి చేయనున్న ఈ మార్గాల కోసం మొత్తం 23,496 చదరపు గజాల భూమి సేకరించనున్నారు.
జీహెచ్‌ఎంసీ జారీ చేసిన నోటిఫికేషన్ల ప్రకారం, కారిడార్‌ నంబర్‌ 15లో శంషాబాద్‌ మండలంలోని గొల్లపల్లి ఎన్‌హెచ్‌-40 జంక్షన్‌ నుంచి ఓఆర్‌ఆర్‌ సర్వీస్‌ రోడ్డు మీదుగా పెద్ద గోల్కొండ వరకు రహదారి విస్తరణ చేపట్టనున్నారు. ఈ మార్గంలో ఎడమ వైపు ఉన్న 59 ఆస్తుల నుంచి 10,387 చదరపు గజాల భూమి అవసరమని అధికారులు పేర్కొన్నారు. ఖాళీ స్థలాలు, వాణిజ్య భవనాలు, షెడ్లు, నివాస గృహాలు ఇందులో ఉన్నాయి.
కారిడార్‌ నంబర్‌ 19లో ఓఆర్‌ఆర్‌ సర్వీస్‌ రోడ్డు నుంచి బండ్లగూడ జాగీర్‌, కిస్మత్‌పూర్‌ మీదుగా చేవెళ్ల రోడ్డును కలిపే మార్గాన్ని 100 అడుగుల వెడల్పుతో అభివృద్ధి చేయనున్నారు. ఇందుకు 13,108 చదరపు గజాల భూమి సేకరణకు ప్రతిపాదించారు. ఈ కారిడార్‌ పూర్తయితే ఓఆర్‌ఆర్‌ నుంచి చేవెళ్ల రోడ్డుకు ప్రత్యామ్నాయ అనుసంధానం మెరుగుపడే అవకాశం ఉందని అధికారులు తెలిపారు.
HIGHLIGHTS
- 2 కారిడార్లు 100 అడుగుల వెడల్పుతో అభివృద్ధి
- మొత్తం 23,496 చదరపు గజాల భూసేకరణ
- కారిడార్‌ 15కు 10,387 చదరపు గజాలు
- కారిడార్‌ 19కు 13,108 చదరపు గజాలు
- అభ్యంతరాలకు 60 రోజుల గడువు
ఈ ప్రతిపాదనలు సుమారు 4 సంవత్సరాల క్రితమే సిద్ధమైనప్పటికీ, వివిధ కారణాలతో పనులు ముందుకు సాగలేదు. ఈలోగా శంషాబాద్‌, రాజేంద్రనగర్‌, బండ్లగూడ జాగీర్‌, కిస్మత్‌పూర్‌ ప్రాంతాల్లో నివాస, వాణిజ్య నిర్మాణాలు వేగంగా పెరిగాయి. కొన్ని ప్రాంతాల్లో 10 నుంచి 50 అంతస్తుల భవనాలు రావడంతో వాహనాల రద్దీ గణనీయంగా పెరిగింది. రహదారులు విస్తరించకపోవడంతో స్థానికులు ట్రాఫిక్‌ ఇబ్బందులు ఎదుర్కొంటున్నారు.
భూసేకరణ, నష్టపరిహారం, ఆస్తుల వివరాలపై అభ్యంతరాలు ఉన్న యజమానులు 60 రోజుల్లోగా లిఖితపూర్వకంగా దరఖాస్తు చేసుకోవాలని జీహెచ్‌ఎంసీ అధికారులు నోటిఫికేషన్లలో తెలిపారు. జీహెచ్‌ఎంసీ ప్రధాన కార్యాలయంలోని ల్యాండ్‌ అక్విజిషన్‌ స్పెషల్‌ కలెక్టర్‌ కార్యాలయంలో మ్యాప్‌లు, ప్రణాళికలను పరిశీలించవచ్చని పేర్కొన్నారు. అభ్యంతరాల పరిశీలన పూర్తయ్యాక పరిహారం ప్రక్రియను ముందుకు తీసుకెళ్లి, భూమి అందుబాటులోకి వచ్చిన వెంటనే రోడ్డు విస్తరణ పనులపై నిర్ణయం తీసుకోనున్నారు.