ఆర్టిఫిషియల్ ఇంటెలిజెన్స్ (ఏఐ) రంగంలో ప్రాక్టికల్ నైపుణ్యాలు పెంచుకోవాలనుకునే ఉద్యోగులకు ఐఐటీ హైదరాబాద్ కొత్త అవకాశాన్ని అందిస్తోంది. వాస్తవ వ్యాపార అవసరాలకు అనుగుణంగా ఏఐ వ్యవస్థలను అభివృద్ధి చేయడం, వాటిని అమలు చేయడంపై శిక్షణ ఇచ్చేందుకు **ఫార్వర్డ్ డిప్లాయ్డ్ ఇంజినీరింగ్ (FDE) ప్రాక్టీషనర్ ప్రోగ్రామ్**ను ప్రారంభించింది. మూడు నెలల పాటు సాగే ఈ ప్రొఫెషనల్ సర్టిఫికెట్ ప్రోగ్రామ్‌కు రిజిస్ట్రేషన్లు ప్రస్తుతం అందుబాటులో ఉన్నాయి.
ఈ ప్రోగ్రామ్ 2026 డిసెంబర్ 5న ప్రారంభం కానుంది. మొత్తం 13 వారాల పాటు జరిగే కోర్సులో 52 సెషన్లు, 156 గంటల లైవ్ శిక్షణ ఉండనున్నాయి. ఆన్‌లైన్‌లో తరగతులు నిర్వహిస్తారు. ఐఐటీ హైదరాబాద్ క్యాంపస్‌లో జరిగే కొన్ని సెషన్లలో ఐచ్ఛికంగా పాల్గొనే అవకాశం కూడా కల్పిస్తున్నారు.
HIGHLIGHTS
- ఐఐటీ హైదరాబాద్‌లో మూడు నెలల FDE ప్రాక్టీషనర్ ప్రోగ్రామ్.
- డిసెంబర్ 5, 2026 నుంచి తరగతులు ప్రారంభం.
- 13 వారాల్లో 52 సెషన్లు, 156 గంటల లైవ్ శిక్షణ.
- ఏజెంటిక్ ఏఐ, వర్క్‌ఫ్లో ఆటోమేషన్‌పై ప్రాక్టికల్ శిక్షణ.
- ఆన్‌లైన్ తరగతులతో పాటు ఐచ్ఛిక క్యాంపస్ సెషన్లు.
- కోర్సు పూర్తి చేసిన వారికి ఐఐటీ హైదరాబాద్ సర్టిఫికెట్.
ఏఐ ప్రాజెక్టులను కేవలం ప్రయోగాలు, నమూనాల దశలోనే నిలిపివేయకుండా.. కంపెనీల్లో వాస్తవంగా ఉపయోగపడే వ్యవస్థలుగా ఎలా మార్చాలో ఈ కోర్సులో నేర్పిస్తారు. ఏజెంటిక్ ఏఐ, వర్క్‌ఫ్లో ఆటోమేషన్, ఏఐ మోడళ్లను సంస్థల డేటా, సాఫ్ట్‌వేర్, డేటాబేస్‌లు, ఏపీఐలతో అనుసంధానించడం వంటి అంశాలపై ప్రాక్టికల్ శిక్షణ ఇస్తారు. ఏఐ పరిష్కారాలను అభివృద్ధి చేయడం నుంచి వాటిని అమలు చేయడం, పర్యవేక్షించడం వరకు అవసరమైన నైపుణ్యాలను అందించడమే ఈ ప్రోగ్రామ్ లక్ష్యం.
ఐఐటీ హైదరాబాద్ కంప్యూటర్ సైన్స్ అండ్ ఇంజినీరింగ్ విభాగానికి చెందిన డాక్టర్ ప్రవీణ్ తమ్మన, డాక్టర్ ఆశిష్ మిశ్రా, డాక్టర్ అనుపమ్ సంఘీ, డాక్టర్ అభిజిత్ దాస్ ఈ ప్రోగ్రామ్‌కు నాయకత్వం వహిస్తున్నారు. ఎన్.వి.ఎస్.ఎస్. కౌండిన్య ఇండస్ట్రీ లీడ్‌గా వ్యవహరిస్తున్నారు. సాఫ్ట్‌వేర్, ఏఐ/ఎంఎల్, డేటా ఇంజినీరింగ్, ప్లాట్‌ఫామ్, డెవ్‌ఆప్స్ రంగాల్లో పనిచేస్తున్న వారికి ఈ కోర్సు ఉపయోగకరంగా ఉంటుంది. సాధారణంగా 2–3 ఏళ్లు లేదా అంతకంటే ఎక్కువ అనుభవం ఉన్నవారిని లక్ష్యంగా చేసుకుని రూపొందించారు.
కోర్సును విజయవంతంగా పూర్తి చేసి, నిర్దేశించిన అర్హతలను సాధించిన వారికి ఐఐటీ హైదరాబాద్ ధ్రువపత్రం అందజేయనుంది. ఆసక్తి ఉన్నవారు ailaunchpad.cse.iith.ac.in అధికారిక వెబ్‌సైట్ ద్వారా కోర్సు వివరాలు తెలుసుకుని రిజిస్ట్రేషన్ చేసుకోవచ్చు.
Also Read- తాగునీటిని ఫ్లోర్ క్లీనింగ్‌కు వాడిన డెయిరీ సంస్థ.. రూ.20 వేల జరిమానా విధించిన జలమండలి