99TV News

    బ్రిక్స్ సదస్సులో జిన్‌పింగ్ ప్రసంగం, గ్లోబల్ సౌత్‌కు 5 సూత్రాలు సూచన

    బ్రిక్స్ సదస్సులో జిన్‌పింగ్ ప్రసంగం, గ్లోబల్ సౌత్‌కు 5 సూత్రాలు సూచన

    బ్రిక్స్ సదస్సులో జిన్‌పింగ్ కీలక ప్రసంగం.. ఐదు అంశాలపై ఫోకస్ పెట్టాలని సూచన

    న్యూఢిల్లీ: బ్రిక్స్ సదస్సు రెండో రోజు చైనా అధ్యక్షుడు షీ జిన్‌పింగ్ కీలక ప్రసంగం చేశారు. గ్లోబల్ సౌత్ దేశాల మధ్య సహకారం, సంబంధాలను మరింత బలోపేతం చేయాల్సిన అవసరం ఉందని పేర్కొన్నారు. ముఖ్యంగా మారుతున్న సాంకేతిక, ఆర్థిక పరిస్థితులకు అనుగుణంగా బ్రిక్స్ దేశాలు పరస్పర సహకారాన్ని పెంచుకోవాలని సూచించారు.

    ఢిల్లీలోని భారత్ మండపంలో జరిగిన ప్రత్యేక కార్యక్రమంలో జిన్‌పింగ్ ప్రసంగించారు. ఈ సందర్భంగా బ్రిక్స్ దేశాల అభివృద్ధికి ఉపయోగపడేలా ఐదు కీలక అంశాలపై దృష్టి పెట్టాలని ప్రతిపాదించారు.

    AIలో సహకారం పెంచుకోవాలి

    బ్రిక్స్ దేశాల మధ్య AI ఓపెన్ సోర్స్ కమ్యూనిటీ ఏర్పాటు చేయాలని జిన్‌పింగ్ సూచించారు. ఈ కార్యక్రమానికి చైనా బాధ్యత తీసుకుంటుందని తెలిపారు. AI అభివృద్ధితో పాటు బహుభాషా మోడళ్లకు సంబంధించిన అప్లికేషన్ల రూపకల్పన, AI సెమినార్లు, శిక్షణ కార్యక్రమాలు నిర్వహించేందుకు చర్యలు తీసుకుంటామని చెప్పారు.

    పెట్టుబడులు, వాణిజ్యానికి ప్రాధాన్యం

    బ్రిక్స్ దేశాల మధ్య స్పెషల్ ఎకనామిక్ జోన్ భాగస్వామ్యం అవసరమని చైనా అధ్యక్షుడు పేర్కొన్నారు. దీనివల్ల సభ్య దేశాల మధ్య పెట్టుబడులు, వాణిజ్య సహకారం మరింత పెరుగుతుందని అన్నారు.

    అలాగే బ్రిక్స్ ఇంటెలిజెంట్ పోర్టల్ ఏర్పాటు చేసి, పరస్పర సహకారానికి అనుగుణంగా విధానాలను రూపొందించాలని సూచించారు.

    డిజిటల్ ఎకానమీపై దృష్టి

    బ్రిక్స్ దేశాల మధ్య బలమైన డిజిటల్ ఎకోసిస్టమ్‌ను అభివృద్ధి చేసేందుకు క్లౌడ్ ప్లాట్‌ఫాం ఏర్పాటు చేయాలని జిన్‌పింగ్ ప్రతిపాదించారు. డిజిటల్ ఎకానమీకి ప్రాధాన్యం ఇవ్వడంతో పాటు డిజిటల్ నైపుణ్యాల్లో శిక్షణ, సాంకేతిక పరిజ్ఞాన మార్పిడిని ప్రోత్సహించాలని సూచించారు.

    స్మార్ట్ ఫ్యాక్టరీలకు ప్రోత్సాహం

    తయారీ రంగంలో ఆధునిక సాంకేతికతను విస్తృతంగా వినియోగించుకోవాల్సిన అవసరం ఉందని జిన్‌పింగ్ అన్నారు. కాలానికి అనుగుణంగా స్మార్ట్ ఫ్యాక్టరీలను అభివృద్ధి చేయాలని, ఇందుకోసం అవసరమైన ప్రమాణాలు, నిబంధనలు రూపొందించాలని సూచించారు. తయారీ రంగంలో ఇంటెలిజెన్స్‌ను ప్రవేశపెట్టడం ద్వారా ఉత్పాదకతను మరింత పెంచుకోవచ్చని పేర్కొన్నారు.

    సైన్స్, టెక్నాలజీలో సంయుక్తంగా ముందుకు

    సైన్స్ అండ్ టెక్నాలజీ రంగంలో బ్రిక్స్ దేశాలు సంయుక్త అభివృద్ధికి ప్రాధాన్యం ఇవ్వాలని చైనా అధ్యక్షుడు పిలుపునిచ్చారు. ఇన్నోవేషన్‌ను ప్రోత్సహించేందుకు చైనా బ్రిక్స్ యూత్ ఎక్స్ఛేంజ్ ప్రోగ్రామ్ నిర్వహిస్తుందని తెలిపారు.

    మారుతున్న ప్రపంచ మార్కెట్ అవసరాలకు అనుగుణంగా బ్రిక్స్ దేశాలు పరస్పరం సహకరించుకోవాలని జిన్‌పింగ్ సూచించారు. ఆర్థిక, సాంకేతిక, డిజిటల్ రంగాల్లో సహకారాన్ని మరింత విస్తరించడం ద్వారా గ్లోబల్ సౌత్ దేశాల అభివృద్ధికి తోడ్పడవచ్చని ఆయన పేర్కొన్నారు.