Bangladesh | బంగ్లాదేశ్లో రిటైర్డ్ హిందూ టీచర్ కుటుంబం అనుమానాస్పద మృతి
బంగ్లాదేశ్లో ఓ హిందూ కుటుంబానికి చెందిన నలుగురు అనుమానాస్పద స్థితిలో మృతి చెందడం కలకలం రేపింది. మృతుల్లో రిటైర్డ్ ప్రభుత్వ ఉపాధ్యాయుడు, ఆయన భార్య, కుమార్తె, కుమారుడు ఉన్నారు. రంగ్పూర్ మెట్రోపాలిటన్ కొత్వాలి పోలీస్ స్టేషన్ పరిధిలో ఈ ఘటన చోటుచేసుకుంది.
ఇంట్లోనే నలుగురు మృతి
స్థానిక మీడియా, బంధువులు తెలిపిన వివరాల ప్రకారం.. గణపతి చక్రవర్తి (65) రంగ్పూర్ జిల్లా స్కూల్లో ఉపాధ్యాయుడిగా పనిచేసి గతేడాది డిసెంబర్ 31న పదవీ విరమణ చేశారు. ఇటీవల ఆయన సొంత ఇంటిని నిర్మించుకుని భార్య ప్రీతిలతా చక్రవర్తి (50), కుమార్తె అగామి చక్రవర్తి ప్రార్థి (23), కుమారుడు **ప్రియం చక్రవర్తి (12)**తో కలిసి నివసిస్తున్నారు.
అగామి ఇటీవల ఇంగ్లిష్లో మాస్టర్స్ పూర్తి చేయగా.. ప్రియం ఐదో తరగతి చదువుతున్నాడు. కుటుంబానికి స్థానికులతో ఎలాంటి విభేదాలు లేవని, అనుమానించదగ్గ శత్రువులు కూడా లేరని బంధువులు తెలిపారు.
ఫోన్లు స్విచ్ఛాఫ్ కావడంతో అనుమానం
గణపతి కుటుంబ సభ్యులతో బంధువులు చివరిసారిగా గత గురువారం ఫోన్లో మాట్లాడినట్లు సమాచారం. ఆ తర్వాత కుటుంబంలోని నలుగురి ఫోన్లు స్విచ్ఛాఫ్ రావడంతో బంధువులు ఆందోళన చెందారు. పలుమార్లు ఫోన్ చేసినప్పటికీ ఎవరూ స్పందించలేదు.
దీంతో శనివారం సాయంత్రం ప్రీతిలత సోదరి వారి ఇంటికి వెళ్లారు. అప్పటికే ఇల్లు పూర్తిగా లాక్ చేసి ఉండటంతోపాటు గేట్లు కూడా మూసి ఉన్నాయి. ఇంటి లోపలి తలుపులు కూడా గడియ పెట్టి ఉండటంతో ఆమె పోలీసులకు సమాచారం అందించారు.
తలుపులు బద్దలుకొట్టి చూడగా..
సమాచారం అందుకున్న పోలీసులు అక్కడికి చేరుకుని తలుపులు బద్దలుకొట్టి ఇంట్లోకి ప్రవేశించారు. లోపల పరిశీలించగా కుటుంబంలోని నలుగురూ మృతి చెందినట్లు గుర్తించారు.
గణపతి మృతదేహం పైకప్పుపై, ప్రీతిలత, అగామి మృతదేహాలు మెట్ల వద్ద, ప్రియం మృతదేహం బెడ్పై ఉన్నట్లు పోలీసులు గుర్తించారు.
హత్యా? ఆత్మహత్యా?
ఘటనపై గణపతి బంధువుల ఫిర్యాదుతో పోలీసులు కేసు నమోదు చేసి దర్యాప్తు ప్రారంభించారు. మృతదేహాలను పోస్టుమార్టం కోసం తరలించారు. ఫోరెన్సిక్ నిపుణులు ఘటనాస్థలిలో ఆధారాలను సేకరించారు.
కుటుంబ సభ్యుల మరణానికి అసలు కారణం ఏమిటనే దానిపై పోలీసులు దర్యాప్తు చేస్తున్నారు. ఇది హత్యా? ఆత్మహత్యా? అనే రెండు కోణాల్లో విచారణ కొనసాగుతోంది. పోస్టుమార్టం నివేదిక, ఫోరెన్సిక్ ఆధారాల ఆధారంగా మరణానికి గల కారణంపై స్పష్టత వచ్చే అవకాశం ఉంది.
తమ బంధువులది హత్యేనని గణపతి కుటుంబ సభ్యులు అనుమానం వ్యక్తం చేస్తూ.. నిందితులను గుర్తించి కఠిన చర్యలు తీసుకోవాలని కోరుతున్నారు.
ఈ ఘటనతో రంగ్పూర్లోని స్థానిక హిందూ సమాజంలో ఆందోళన నెలకొంది. అయితే కుటుంబ సభ్యుల మరణానికి కారణం, ఘటన వెనుక ఉన్న పరిస్థితులపై పోలీసుల దర్యాప్తు పూర్తయ్యే వరకు ఎలాంటి నిర్ధారణకు రావడం సాధ్యం కాదు.
