జర్మనీలో చోటుచేసుకున్న ఘోర అగ్నిప్రమాదం తీవ్ర విషాదాన్ని నింపింది. బోఖుమ్‌ నగరంలోని ఓ నివాస భవనంలో మంటలు చెలరేగడంతో ముగ్గురు భారతీయులు ప్రాణాలు కోల్పోయారు. ఈ ఘటనలో మరో ఐదుగురు గాయపడ్డారు. బుధవారం వెలుగులోకి వచ్చిన ఈ వార్త భారతీయుల కుటుంబాల్లో ఆందోళన కలిగించింది.
తెల్లవారుజామున చెలరేగిన మంటలు
జర్మనీలోని బోఖుమ్‌ నగరంలోని హోఫ్‌స్టెడే ప్రాంతంలో ఉన్న బహుళ అంతస్తుల నివాస భవనంలో అక్టోబర్‌ 13న తెల్లవారుజామున సుమారు 4:15 గంటలకు మంటలు చెలరేగాయి. మంటలు వేగంగా వ్యాపించడంతో సహాయక చర్యలకు ఆటంకం ఏర్పడింది. ముఖ్యంగా మెట్ల మార్గంలో మంటలు, పొగ వ్యాపించడంతో పై అంతస్తుల్లో ఉన్నవారిని బయటకు తీసుకురావడం అగ్నిమాపక సిబ్బందికి కష్టంగా మారింది.
మృతుల్లో ఇద్దరు మహిళలు, ఒక యువకుడు
ఈ ప్రమాదంలో మరణించిన ముగ్గురూ భారతీయులేనని స్థానిక పోలీసులు వెల్లడించారు. వారిలో 25, 27 ఏళ్ల ఇద్దరు మహిళలు, 26 ఏళ్ల యువకుడు ఉన్నారు. అయితే వారి పేర్లు, భారతదేశంలోని స్వస్థలాలకు సంబంధించిన వివరాలు ఇంకా వెల్లడించలేదు. గాయపడిన ఐదుగురికి పొగ పీల్చడం వల్ల ఇబ్బందులు తలెత్తడంతో ఆసుపత్రులకు తరలించి చికిత్స అందించారు.
హత్య అనుమానంతో ఒకరి అరెస్ట్‌
అగ్నిప్రమాదానికి గల కారణాన్ని గుర్తించేందుకు పోలీసులు, అగ్నిప్రమాద నిపుణులు విచారణ చేపట్టారు. ప్రాథమిక పరిశీలనలో సాంకేతిక లోపం కారణంగా మంటలు చెలరేగినట్లు కనిపించకపోవడంతో ఉద్దేశపూర్వకంగా నిప్పంటించారా అనే కోణంలో దర్యాప్తు చేస్తున్నారు. ఈ క్రమంలో అదే భవనంలో నివసించే 41 ఏళ్ల వ్యక్తిని పోలీసులు హత్య అనుమానంతో అదుపులోకి తీసుకున్నారు.
అయితే మంటలు ఉద్దేశపూర్వకంగా పెట్టారా, ప్రమాదవశాత్తూ చెలరేగాయా అనే విషయం ఇంకా నిర్ధారణ కాలేదు. ఈ ఘటనకు సంబంధించిన అన్ని కోణాల్లో అధికారులు విచారణ కొనసాగిస్తున్నారు. దర్యాప్తు పూర్తయిన తర్వాతే ప్రమాదానికి గల పూర్తి కారణాలు వెల్లడయ్యే అవకాశం ఉంది.