అమెరికా నేవీకి శుభాకాంక్షలు.. భారత, రష్యా యుద్ధనౌకల ఫొటోలతో నేతల పొరపాటు
అమెరికా నేవీ 251వ వార్షికోత్సవం సందర్భంగా శుభాకాంక్షలు తెలిపిన పలువురు అమెరికా రాజకీయ నాయకులు పొరపాటున భారత, రష్యా యుద్ధనౌకల చిత్రాలను ఉపయోగించారు. జార్జియా గవర్నర్ బ్రయాన్ కెంప్ భారత నేవీ యుద్ధనౌకలు వరుసగా ప్రయాణిస్తున్న ఫొటోను సామాజిక మాధ్యమంలో పోస్టు చేశారు. జర్నలిస్ట్ డేవ్ బ్రౌన్ ఈ పొరపాటును గుర్తించి, అవి భారత యుద్ధనౌకలని పేర్కొన్నారు.
కాంగ్రెస్ సభ్యుడు టిమ్ మూర్, రిపబ్లికన్ సంస్థ ఫ్రీడమ్ కాకస్ ఫౌండేషన్ కూడా భారత నేవీ నౌకల చిత్రాలను ఉపయోగించాయి. మరోవైపు, అమెరికా నేవీకి శుభాకాంక్షలు తెలుపుతూ కొందరు నేతలు రష్యా యుద్ధనౌకల ఫొటోలను పోస్టు చేశారు.
అమెరికా నేవీ స్థాపనకు 1775 అక్టోబర్ 13న కాంటినెంటల్ కాంగ్రెస్ ఆమోదం తెలిపింది. ప్రస్తుతం ఈ నేవీకి వందలాది నౌకలు, వేలాది విమానాలు ఉన్నాయి. విమాన వాహక నౌకల సంఖ్య, మొత్తం నౌకాదళ సామర్థ్యం పరంగా ప్రపంచంలోనే అత్యంత శక్తివంతమైన నౌకాదళాల్లో ఒకటిగా కొనసాగుతోంది.