యూకో బ్యాంక్‌లో 530 అప్రెంటిస్‌ పోస్టులకు నోటిఫికేషన్‌ విడుదల
డిగ్రీ అర్హతతో దరఖాస్తులకు అవకాశం; తెలంగాణ, ఆంధ్రప్రదేశ్‌లో తలా 8 ఖాళీలు, అక్టోబర్ 29 చివరితేదీ
యూకో బ్యాంక్ 2026 రిక్రూట్‌మెంట్‌లో భాగంగా 1961 అప్రెంటిస్‌ చట్టం కింద 530 అప్రెంటిస్‌ పోస్టుల భర్తీకి నోటిఫికేషన్‌ విడుదల చేసింది. డిగ్రీ పూర్తి చేసిన అభ్యర్థులు అక్టోబర్ 29లోపు దరఖాస్తు చేసుకోవాలని బ్యాంక్ తెలిపింది.
బ్యాంక్ విడుదల చేసిన నోటిఫికేషన్‌ ప్రకారం దేశంలోని పలు రాష్ట్రాల్లో ఈ అప్రెంటిస్‌ నియామకాలు చేపడుతున్నారు. తెలంగాణలో 8, ఆంధ్రప్రదేశ్‌లో 8 ఖాళీలు ఉన్నాయి. తెలంగాణ, ఆంధ్రప్రదేశ్‌లో ఎస్సీకి 1, ఓబీసీకి 2, అన్‌రిజర్వ్‌డ్‌కు 5 చొప్పున కేటాయించారు. పశ్చిమ బెంగాల్‌లో 86, ఉత్తరప్రదేశ్‌లో 45, ఒడిశాలో 41, రాజస్థాన్‌లో 37, బిహార్‌లో 34, మహారాష్ట్రలో 32, మధ్యప్రదేశ్‌లో 27, హిమాచల్‌ప్రదేశ్‌లో 25, అస్సాం, పంజాబ్‌లలో తలా 24, తమిళనాడులో 21, గుజరాత్‌లో 20 ఖాళీలు ఉన్నాయి.
అభ్యర్థులు ప్రభుత్వ గుర్తింపు పొందిన యూనివర్సిటీ నుంచి గ్రాడ్యుయేషన్‌ పూర్తి చేసి ఉండాలి. డిగ్రీ సర్టిఫికెట్‌ 2022 ఏప్రిల్‌ 1 లేదా ఆ తర్వాత జారీ అయినదిగా ఉండాలని బ్యాంక్ నోటిఫికేషన్‌లో పేర్కొంది. స్థానిక భాషలో ప్రావీణ్యం తప్పనిసరి. అభ్యర్థుల వయసు 2026 అక్టోబర్ 1 నాటికి 20 నుంచి 28 ఏళ్ల మధ్య ఉండాలి.
HIGHLIGHTS
- మొత్తం పోస్టులు 530
- తెలంగాణ, ఆంధ్రప్రదేశ్‌లో తలా 8 ఖాళీలు
- దరఖాస్తులకు చివరితేదీ అక్టోబర్ 29
- నెలవారీ స్టైపెండ్‌ రూ. 16,650
- పరీక్ష 100 మార్కులకు, సమయం 60 నిమిషాలు
వయోపరిమితిలో రిజర్వేషన్‌ నిబంధనల ప్రకారం సడలింపులు ఉన్నాయి. ఓబీసీ అభ్యర్థులకు 3 ఏళ్లు, ఎస్సీ, ఎస్టీ అభ్యర్థులకు 5 ఏళ్లు, జనరల్‌ దివ్యాంగులకు 10 ఏళ్లు, ఓబీసీ దివ్యాంగులకు 13 ఏళ్లు, ఎస్సీ, ఎస్టీ దివ్యాంగులకు 15 ఏళ్ల సడలింపు కల్పించారు. వితంతు, విడాకులు తీసుకున్న మహిళలకు కూడా వర్గాలవారీగా గరిష్ఠ వయోపరిమితి సడలింపు వర్తిస్తుంది.
దరఖాస్తు ఫీజు సాధారణ అభ్యర్థులకు రూ. 800గా నిర్ణయించారు. ఓబీసీ, ఈడబ్ల్యూఎస్‌ అభ్యర్థులకు రూ. 600, ఎస్సీ, ఎస్టీ అభ్యర్థులకు రూ. 200 ఫీజు ఉంటుంది. అభ్యర్థులు ఒక రాష్ట్రానికి మాత్రమే దరఖాస్తు చేసుకోవాలి. ముందుగా నేషనల్‌ అప్రెంటిస్‌షిప్‌ ట్రైనింగ్‌ స్కీమ్‌ పోర్టల్‌లో రిజిస్టర్‌ చేసుకుని, తర్వాత యూకో బ్యాంక్ వెబ్‌సైట్‌ ద్వారా దరఖాస్తు సమర్పించాలి.
ఎంపిక ఆన్‌లైన్‌ పరీక్ష, స్థానిక భాషా పరీక్ష, సర్టిఫికెట్ల పరిశీలన ఆధారంగా జరుగుతుంది. ఆన్‌లైన్‌ రాతపరీక్షను BFSI SSC నిర్వహిస్తుంది. పరీక్ష 100 మార్కులకు ఉంటుంది. జనరల్‌ లేదా ఫైనాన్స్‌ అవేర్‌నెస్‌, ఇంగ్లిష్‌ లేదా హిందీ భాష, రీజనింగ్‌ అండ్‌ కంప్యూటర్‌ ఆప్టిట్యూడ్‌, క్వాంటిటేటివ్‌ ఆప్టిట్యూడ్‌ విభాగాలకు తలా 25 మార్కులు కేటాయించారు. పరీక్ష సమయం 60 నిమిషాలు.
ఎంపికైన అభ్యర్థులకు నెలకు రూ. 16,650 స్టైపెండ్‌ చెల్లిస్తారు. అప్రెంటిస్‌ ట్రైనింగ్‌ కాలవ్యవధి 1 సంవత్సరం. దరఖాస్తు ప్రక్రియ ప్రారంభమైందని, అక్టోబర్ 29 తర్వాత దరఖాస్తులు స్వీకరించబడవని బ్యాంక్ తెలిపింది. పూర్తి నోటిఫికేషన్‌, దరఖాస్తు వివరాల కోసం అభ్యర్థులు www.uco.bank.in వెబ్‌సైట్‌ను పరిశీలించాలి.