99TV News

    భారత్ ఎకానమీ రికార్డు: Economic Resilienceలో 1వ ర్యాంకు

    చైనా, అమెరికాను వెనక్కి నెట్టి Economic Resilienceలో భారత్ 1వ ర్యాంకు

    ఆర్థిక నిలకడలో భారత్‌కు అగ్రస్థానం

    2026-30 కాలానికి 71 స్కోరుతో భారత్ మొదటి ర్యాంకు; చైనా, అమెరికా, జపాన్ వెనుకబాటు

    ప్రపంచ ఆర్థిక అనిశ్చితి కొనసాగుతున్న వేళ, 2026-30 కాలానికి ప్రధాన ఆర్థిక వ్యవస్థల్లో అత్యధిక ఎకనామిక్ రెసిలియన్స్ కలిగిన దేశంగా భారత్ నిలిచింది. అసోచామ్, ఐఎంఎఫ్‌ గణాంకాలను ఉటంకిస్తూ ఇన్ఫోఇన్‌డేటా బుధవారం విడుదల చేసిన వివరాల్లో భారత్ 100కి 71 స్కోరుతో మొదటి ర్యాంకు సాధించింది.

    ఈ ర్యాంకింగ్స్‌లో చైనా 66 స్కోరుతో రెండో స్థానంలో నిలవగా, జపాన్, రష్యా 60 స్కోరుతో సంయుక్తంగా మూడో స్థానంలో ఉన్నాయి. జర్మనీ 59, ఇటలీ, బ్రెజిల్ 53 చొప్పున, బ్రిటన్ 52, ఫ్రాన్స్ 40 స్కోరు సాధించాయి. అమెరికా 36 స్కోరుతో చివరి స్థానంలో నిలిచింది. బాహ్య ఆర్థిక ఒత్తిళ్లను తట్టుకునే సామర్థ్యంలో భారత్ స్థిరంగా మెరుగుపడుతోందని ఇన్ఫోఇన్‌డేటా తెలిపింది. రియల్ జీడీపీ వృద్ధి, తలసరి జీడీపీ వృద్ధి, గ్రాస్ సేవింగ్స్ విభాగాల్లో భారత్ నంబర్ 1 స్థానంలో నిలిచింది.

    HIGHLIGHTS

    - భారత్‌కు 71 స్కోరు, గ్లోబల్ ర్యాంక్ 1

    - చైనా 66 స్కోరుతో రెండో స్థానం

    - అమెరికా 36 స్కోరుతో చివరి స్థానం

    - రియల్ జీడీపీ వృద్ధిలో భారత్ ముందంజ

    - ఐఎంఎఫ్‌ భారత వృద్ధి అంచనా 7 శాతం

    గ్రాస్ క్యాపిటల్ ఫార్మేషన్, ఎగుమతుల వృద్ధిలో భారత్ రెండో ర్యాంకు సాధించగా, డెట్-టు-జీడీపీ నిష్పత్తిలో మూడో స్థానంలో నిలిచింది. పటిష్ఠ దేశీయ డిమాండ్, ఎగుమతుల వృద్ధి భారత ఆర్థిక వ్యవస్థకు బలం ఇచ్చాయని ఆర్‌బీఐ అక్టోబరులో పేర్కొంది. ప్రభుత్వ విధాన చర్యలు అంతర్జాతీయ సవాళ్ల ప్రభావాన్ని తగ్గించాయని కూడా ఆర్‌బీఐ తెలిపింది.

    2026-27 మొదటి అర్ధభాగంలో వాణిజ్య ఎగుమతులు రెండంకెల వృద్ధిని నమోదు చేయడంతో వాణిజ్య లోటు తగ్గింది. ఆగస్టులో ఎఫ్‌డీఐ, ఈసీబీలు, రెమిటెన్స్‌లు పుంజుకున్నాయి. ఐఎంఎఫ్‌ భారత వృద్ధి అంచనాను 60 బేసిస్ పాయింట్లు పెంచి 7 శాతానికి సవరించింది. తదుపరి గణాంకాలు, డిసెంబరు సమీక్షలపై మార్కెట్లు దృష్టి పెట్టనున్నాయి.