పతంజలి ఆవు నెయ్యిపై FDA చర్యలు.. ఒక బ్యాచ్‌ను వెనక్కి తీసుకోవాలని ఆదేశం
భోపాల్‌: పతంజలి ఫుడ్స్‌ లిమిటెడ్‌కు మధ్యప్రదేశ్‌ ఫుడ్ అండ్ డ్రగ్ అడ్మినిస్ట్రేషన్‌ (FDA) నుంచి ఆదేశాలు జారీ అయ్యాయి. కంపెనీకి చెందిన ఆవు నెయ్యి నమూనా ఆహార భద్రతా ప్రమాణాలకు అనుగుణంగా లేదని గుర్తించడంతో, ప్రభావిత బ్యాచ్‌ను వెనక్కి తీసుకోవాలని అధికారులు ఆదేశించారు. బుర్హాన్‌పూర్‌లో ఈ ఆదేశాలు అమలు చేయాలని నియంత్రణ సంస్థ సూచించింది.
ఆహార భద్రత, ప్రమాణాల చట్టానికి సంబంధించిన 2011 నిబంధనల ప్రకారం నమూనా ప్రమాణాలను అందుకోలేదని కంపెనీ స్టాక్ ఎక్స్ఛేంజీకి ఇచ్చిన సమాచారం ద్వారా వెల్లడించింది. అయితే, మధ్యప్రదేశ్‌ FDA నియమించిన అధికారి జారీ చేసిన ఆదేశాన్ని సవాలు చేస్తూ అప్పీల్‌ దాఖలు చేయనున్నట్లు పతంజలి ఫుడ్స్‌ తెలిపింది.
ప్రభావిత బ్యాచ్ విలువ మినహా కంపెనీ ఆర్థిక లేదా కార్యకలాపాలపై ఈ చర్య వల్ల గణనీయమైన ప్రభావం ఉండదని సంస్థ పేర్కొంది.
శుక్రవారం బీఎస్‌ఈలో పతంజలి ఫుడ్స్‌ షేరు ధర రూ.351 వద్ద ముగిసింది. గత ఏడాదిలో షేరు ధర దాదాపు 41 శాతం తగ్గినట్లు ఎక్స్ఛేంజీ గణాంకాలు సూచిస్తున్నాయి.
ఇంతకుముందు జూన్‌లో కేరళలోని కన్నూర్‌ జిల్లాలో పురుగుమందుల అవశేషాలు అనుమతించిన పరిమితులను మించాయనే కారణంతో పతంజలి ఫుడ్స్‌కు చెందిన ఒక నిర్దిష్ట జొన్న పిండి బ్యాచ్ విక్రయాలను ఆహార భద్రతా అధికారులు నిషేధించారు. తాజా నెయ్యి బ్యాచ్ వ్యవహారంలో కంపెనీ అప్పీల్‌ ప్రక్రియ తదుపరి పరిణామాలపై దృష్టి నెలకొంది.