రామ్‌లీలా మైదానంలో నిరసనలకు కొత్త రూల్స్ ప్రతిపాదించిన ఢిల్లీ పోలీసులు
గరిష్ఠంగా 50,000 మందికి అనుమతి, ఉదయం 10 నుంచి సాయంత్రం 5 వరకు మాత్రమే కార్యక్రమాలకు అవకాశం
దేశ రాజధాని ఢిల్లీలోని రామ్‌లీలా మైదానంలో నిరసనలు, ర్యాలీలు, బహిరంగ సభల నిర్వహణకు ఢిల్లీ పోలీసులు కొత్త మార్గదర్శకాల ముసాయిదాను సిద్ధం చేశారు. భద్రత, ట్రాఫిక్ నియంత్రణ, ప్రజా క్రమశిక్షణ దృష్ట్యా ఈ ప్రామాణిక నిర్వహణ విధానాన్ని ఉన్నతాధికారుల ఆమోదానికి పంపారు.
ప్రతిపాదిత నిబంధనల ప్రకారం ఏ కార్యక్రమానికైనా గరిష్ఠంగా 50,000 మంది మాత్రమే హాజరయ్యేందుకు అనుమతి ఉంటుంది. కార్యక్రమాలు ఉదయం 10 గంటల నుంచి సాయంత్రం 5 గంటల మధ్య పూర్తికావాలి. నిర్వాహకులు కనీసం 10 రోజుల ముందుగా పోలీసులకు దరఖాస్తు చేయాలి. దరఖాస్తుకు ముందుగా ఢిల్లీ మున్సిపల్ కార్పొరేషన్ నుంచి వేదిక లభ్యత సర్టిఫికెట్ తీసుకోవడం తప్పనిసరి.
భద్రతా ఏర్పాట్లు, జనసమ్మర్థం, కార్యక్రమ స్వభావాన్ని బట్టి తుది అనుమతి సంఖ్యను సంబంధిత పోలీస్ అధికారి నిర్ణయిస్తారు. ట్రాఫిక్, పార్కింగ్ ఏర్పాట్లపై నిర్వాహకులు పోలీసులతో సమన్వయం చేయాలి. అత్యవసర వాహనాల మార్గాలు, ఫుట్‌పాత్‌లు ఎట్టి పరిస్థితుల్లోనూ దిగ్బంధించరాదని ముసాయిదాలో పేర్కొన్నారు.
HIGHLIGHTS
- రామ్‌లీలా మైదానానికి గరిష్ఠ పరిమితి 50,000 మంది
- కార్యక్రమాల సమయం ఉదయం 10 నుంచి సాయంత్రం 5 వరకు
- 10 రోజుల ముందే దరఖాస్తు తప్పనిసరి
- డ్రోన్లకు ప్రత్యేక అనుమతి అవసరం
ప్రదర్శనలకు హాజరయ్యే వారు ఆయుధాలు, మండే పదార్థాలు, చట్టవిరుద్ధ వస్తువులు తీసుకురావడాన్ని నిషేధించారు. కార్యక్రమాన్ని చిత్రీకరించేందుకు డ్రోన్లు వినియోగించాలనుకుంటే ముందస్తు ప్రత్యేక అనుమతి తీసుకోవాలి. శాంతిభద్రతల పరిరక్షణ కోసం నిర్వాహకుల బాధ్యతలను స్పష్టంగా నిర్ణయించేలా ఈ మార్గదర్శకాలు రూపొందించినట్లు పోలీస్ వర్గాలు తెలిపాయి.
జంతర్ మంతర్‌ను నిరసనల నిర్దేశిత వేదికల జాబితా నుంచి తొలగించిన తర్వాత రామ్‌లీలా మైదానం, బురారీ మైదానం, సీబీడీ గ్రౌండ్‌లను ప్రత్యామ్నాయ వేదికలుగా గుర్తించారు. ఈ నేపథ్యంలో రామ్‌లీలా మైదానంలో జరిగే పెద్ద కార్యక్రమాలపై నియంత్రణ, ప్రజా భద్రతకు ఈ కొత్త విధానం కీలకమని అధికారులు భావిస్తున్నారు.
పోలీస్ హెడ్ క్వార్టర్స్ ఆమోదం వచ్చిన వెంటనే ఈ మార్గదర్శకాలు అమల్లోకి రానున్నాయి. ఆమోదం తర్వాత దరఖాస్తు విధానం, అనుమతి షరతులు, నిర్వాహకుల బాధ్యతలపై అధికారిక ఉత్తర్వులు జారీ కానున్నాయి.
Also Read - బాలల దినోత్సవం సందర్భంగా చిన్నారులకు చంద్రబాబు, లోకేశ్ శుభాకాంక్షలు