పిల్లల సోషల్ మీడియా భద్రతపై కేంద్రానికి సుప్రీంకోర్టు నోటీసులు
కనీస వయసు, తల్లిదండ్రుల అనుమతి, ప్రైవసీ సెట్టింగ్‌లపై స్పష్టమైన నియంత్రణ కోరిన పిటిషన్‌పై విచారణ
సోషల్ మీడియా ప్లాట్‌ఫామ్‌లలో పిల్లల భద్రతకు సమగ్ర నియంత్రణ వ్యవస్థ అవసరమని కోరుతూ దాఖలైన పిటిషన్‌పై సుప్రీంకోర్టు శుక్రవారం కేంద్ర ప్రభుత్వానికి నోటీసులు జారీ చేసింది. సీజేఐ జస్టిస్ సూర్యకాంత్, జస్టిస్ జాయ్ మాల్యా బాగ్చీల ధర్మాసనం ఈ వ్యవహారాన్ని పెండింగ్ కేసుతో జతచేసి, తదుపరి విచారణను డిసెంబర్ 3కు వాయిదా వేసింది.
ది ఎమరాల్డ్ హైట్స్ ఇంటర్నేషనల్ స్కూల్, దాని డైరెక్టర్ సిద్ధార్థ్ సింగ్ గిర్నార్ పిటిషన్ దాఖలు చేశారు. సోషల్ మీడియా వినియోగానికి కనీస వయసు నిబంధనలు, ఆన్‌లైన్ వేధింపుల నుంచి రక్షణకు మార్గదర్శకాలు అవసరమని వారు కోర్టును కోరారు. కేంద్ర ప్రభుత్వం, మహిళా శిశు అభివృద్ధి మంత్రిత్వ శాఖ, న్యాయ మంత్రిత్వ శాఖ, జాతీయ బాలల హక్కుల పరిరక్షణ కమిషన్‌ను ప్రతివాదులుగా చేర్చారు.
పిటిషనర్లు తమ పిటిషన్‌లో, చాలా సోషల్ మీడియా సంస్థలు 13 ఏళ్ల కనీస వయసును స్వీయ ధృవీకరణ ఆధారంగా అమలు చేస్తున్నాయని పేర్కొన్నారు. 2023 నాటి డిజిటల్ పర్సనల్ డేటా ప్రొటెక్షన్ యాక్ట్ ప్రకారం 18 ఏళ్లలోపు వారంతా పిల్లలేనని, వారికి అదనపు రక్షణ అవసరమని వాదించారు.
HIGHLIGHTS
- కేంద్రానికి సుప్రీంకోర్టు నోటీసులు
- సీజేఐ జస్టిస్ సూర్యకాంత్ ధర్మాసనం విచారణ
- తదుపరి విచారణ డిసెంబర్ 3కు వాయిదా
- 18 ఏళ్లలోపు వారిని పిల్లలుగా పరిగణించాలని పిటిషన్
పిల్లల ఖాతాలకు తప్పనిసరి ప్రైవసీ సెట్టింగ్‌లు, వయసుకు తగిన యాక్సెస్, హానికర కంటెంట్‌పై ఆంక్షలు విధించాలని పిటిషనర్లు కోరారు. తల్లిదండ్రుల ధృవీకరణతో కూడిన అనుమతి, పిల్లల ప్రవర్తనను ట్రాక్ చేయకుండా నిబంధనలు, లక్షిత ప్రకటనలపై పరిమితులు ఉండాలని పేర్కొన్నారు.
సోషల్ మీడియా వల్ల పిల్లలు సైబర్‌బుల్లీయింగ్, వేధింపులు, హానికర కంటెంట్, అపరిచితుల నుంచి ప్రమాదకర పరిచయాలకు గురవుతున్నారని పిటిషన్‌లో ఆందోళన వ్యక్తమైంది. అధిక వినియోగం వల్ల నిద్రలేమి, ఏకాగ్రత తగ్గడం, ఆందోళన, ఆత్మన్యూనత, చదువుపై శ్రద్ధ తగ్గడం వంటి సమస్యలు పెరుగుతున్నాయని పిటిషనర్లు తెలిపారు.
ప్రస్తుత చట్టాలు అసంపూర్తిగా ఉన్నాయని, వయసు నిర్ధారణ, తల్లిదండ్రుల ప్రమేయం, సోషల్ మీడియా సంస్థల జవాబుదారీతనంపై స్పష్టమైన విధానం లేదని పిటిషన్ పేర్కొంది. ఈ అంశంపై కేంద్రం స్పందన కోరిన ధర్మాసనం, ఇప్పటికే పెండింగ్‌లో ఉన్న కేసుతో పిటిషన్‌ను కలిపింది. కేసు తదుపరి దశలో డిసెంబర్ 3న కేంద్రం వైఖరి కోర్టు ముందు రానుంది.