99TV News

    యుద్ధ్ అభ్యాస్ 2026 ప్రారంభం: భారత్-అమెరికా సైనిక విన్యాసం

    భారత్-అమెరికా సంయుక్త సైనిక విన్యాసం యుద్ధ్ అభ్యాస్ 2026 ప్రారంభం

    భారత్-అమెరికా ‘యుద్ధ్ అభ్యాస్ 2026’ ప్రారంభం

    ఉత్తరాఖండ్ ఔలి, రాజస్థాన్ మహాజన్ రేంజ్‌లలో ఏకకాలంలో విన్యాసాలు; 1,200 మంది సైనికుల భాగస్వామ్యం

    భారత్-అమెరికా సైనిక దళాల సంయుక్త విన్యాసం ‘యుద్ధ్ అభ్యాస్ 2026’ సెప్టెంబర్ 15న ఉత్తరాఖండ్‌లోని ఔలి ఫారిన్ ట్రైనింగ్ నోడ్‌లో ప్రారంభమైంది. ఇరు దేశాల మధ్య సమన్వయం, పరస్పర కార్యాచరణ సామర్థ్యం పెంపు లక్ష్యంగా ఈ విన్యాసాలు ఔలితో పాటు రాజస్థాన్ మహాజన్ ఫీల్డ్ ఫైరింగ్ రేంజ్‌లో జరుగుతున్నాయి.

    ఈ విన్యాసంలో భారత్, అమెరికా నుంచి చెరో 600 మంది చొప్పున మొత్తం 1,200 మంది సైనికులు పాల్గొంటున్నారని సైనిక అధికారులు తెలిపారు. ప్రారంభ కార్యక్రమంలో 14 ఇన్ఫెంట్రీ డివిజన్ జీఓసీ మేజర్ జనరల్ అమరేశ్ గుంజన్, అమెరికా ఆర్మీ 11వ ఎయిర్‌బోర్న్ డివిజన్‌కు చెందిన 1వ ఇన్ఫెంట్రీ బ్రిగేడ్ కాంబాట్ టీమ్ కమాండర్ కల్నల్ బెంజమిన్ జాక్‌మన్ పాల్గొన్నారు.

    పర్వత, పాక్షిక పర్వత ప్రాంతాల్లో ఇన్‌ఫెంట్రీ ఆధారిత ఆపరేషన్లను సమన్వయంతో నిర్వహించడం ఈ ఏడాది విన్యాసాల ప్రధాన అంశంగా అధికారులు చెప్పారు. కఠినమైన భౌగోళిక పరిస్థితుల్లో వ్యూహాల అమలు, కమాండ్ సమన్వయం, ఫీల్డ్ స్థాయి నిర్ణయాలపై రెండు దేశాల దళాలు ఉమ్మడి శిక్షణ పొందనున్నాయి.

    HIGHLIGHTS

    - సెప్టెంబర్ 15న ఔలిలో ప్రారంభం

    - భారత్, అమెరికా నుంచి చెరో 600 మంది సైనికులు

    - ఔలి, మహాజన్ రేంజ్‌లలో ఏకకాల విన్యాసాలు

    - డ్రోన్లు, ఆటానమస్ సిస్టమ్స్ వినియోగంపై దృష్టి

    విన్యాసాల్లో ఇంటిగ్రేటెడ్ బ్యాటిల్ గ్రూప్స్‌ను పర్వత ప్రాంతాల్లో సమర్థంగా వినియోగించే పద్ధతులను కూడా ప్రాక్టీస్ చేస్తున్నట్లు అధికారులు తెలిపారు. నిఘా, సమాచార సేకరణ కోసం డ్రోన్లు, ఆటానమస్ సిస్టమ్స్ వినియోగానికి ఈసారి ప్రాధాన్యం ఇచ్చారు. మహాజన్ ఫీల్డ్ ఫైరింగ్ రేంజ్‌లో ఆధునిక ఆయుధ వ్యవస్థల ప్రదర్శన కూడా కార్యక్రమంలో భాగంగా ఉంటుంది.

    ఆధునిక యుద్ధ విధానాల్లో చోటుచేసుకుంటున్న సాంకేతిక మార్పులపై ఇరు దేశాల సైనిక నిపుణులు చర్చించనున్నారు. మల్టీ-డొమైన్ వార్‌ఫేర్, డ్రోన్ల వినియోగం, ఆటానమస్ టెక్నాలజీల అనుసంధానం వంటి అంశాలపై అనుభవాలు పంచుకుంటారని రక్షణ వర్గాలు తెలిపాయి.

    తదుపరి రోజుల్లో ఫీల్డ్ డ్రిల్స్, టాక్టికల్ వ్యాయామాలు, సాంకేతిక చర్చలు కొనసాగనున్నాయి. విన్యాసాల చివరి దశలో ఇరు దేశాల దళాలు సంయుక్త ఆపరేషనల్ సన్నాహక ప్రదర్శనలు నిర్వహించే అవకాశముంది.