99TV News

    బీజేపీ ఇంచార్జ్‌లు: 28 రాష్ట్రాలు, 8 యూటీలకు కొత్త జట్టు

    28 రాష్ట్రాలు, 8 కేంద్రపాలిత ప్రాంతాలకు కొత్త ఇంచార్జ్‌లను ప్రకటించిన బీజేపీ

    28 రాష్ట్రాలు, 8 కేంద్రపాలిత ప్రాంతాలకు బీజేపీ కొత్త ఇంచార్జ్‌లు

    ఎన్నికల వ్యూహాలపై దృష్టి సారించిన బీజేపీ అధిష్ఠానం రాష్ట్రాలు, కేంద్రపాలిత ప్రాంతాల వారీగా బాధ్యతలు కేటాయించింది

    రాబోయే అసెంబ్లీ, సార్వత్రిక ఎన్నికలను దృష్టిలో పెట్టుకుని బీజేపీ అధిష్ఠానం 28 రాష్ట్రాలు, 8 కేంద్రపాలిత ప్రాంతాలకు కొత్త ఇంచార్జ్‌లు, సహ ఇంచార్జ్‌లను గురువారం ప్రకటించింది. పార్టీ సంస్థాగత సమన్వయం, ప్రాంతీయ వ్యూహాల అమలును వేగవంతం చేయడమే లక్ష్యంగా ఈ నియామకాలు చేసినట్లు పార్టీ వర్గాలు తెలిపాయి.

    బీజేపీ జాతీయ అధ్యక్షుడు నితిన్ నబీన్ ప్రకటించిన జాబితాలో దక్షిణాది రాష్ట్రాలకు ప్రత్యేక ప్రాధాన్యం కనిపించింది. తెలంగాణకు సునీల్ భన్సల్ ఇంచార్జ్‌గా నియమితులయ్యారు. అభయ్ పాటిల్, రేఖా శర్మ సహ ఇంచార్జ్‌లుగా వ్యవహరించనున్నారు. సునీల్ భన్సల్ పశ్చిమ బెంగాల్ బాధ్యతలను కూడా కొనసాగించనున్నారు. ఆంధ్రప్రదేశ్‌కు అర్వింద్ భదౌరియా ఇంచార్జ్‌గా, తమిళనాడు మాజీ ఎమ్మెల్యే వనతి శ్రీనివాసన్ సహ ఇంచార్జ్‌గా నియమితులయ్యారు.

    తమిళనాడుకు రామ్ మాధవ్ ఇంచార్జ్‌గా ఎంపికయ్యారు. ఆయనతో పాటు డీకే అరుణ, నిర్మల్ కుమార్ సురాణా కో ఇంచార్జ్‌లుగా బాధ్యతలు చేపట్టనున్నారు. ఒడిశాలో దగ్గుబాటి పురందేశ్వరి ఇంచార్జ్‌గా, డాక్టర్ స్వదేశ్ సింగ్ సహ ఇంచార్జ్‌గా నియమితులయ్యారు. కర్ణాటకలో హరీశ్ ద్వివేది ఇంచార్జ్‌గా, తెలంగాణకు చెందిన డాక్టర్ కాసం వెంకటేశ్వర్లు సహ ఇంచార్జ్‌గా పనిచేయనున్నారు.

    HIGHLIGHTS

    - 28 రాష్ట్రాలు, 8 కేంద్రపాలిత ప్రాంతాలకు కొత్త బాధ్యతలు

    - తెలంగాణకు సునీల్ భన్సల్ ఇంచార్జ్

    - ఆంధ్రప్రదేశ్‌కు అర్వింద్ భదౌరియా నియామకం

    - తమిళనాడుకు రామ్ మాధవ్ బాధ్యతలు

    - యూపీకి వినోద్ తావ్డే ఇంచార్జ్

    ఉత్తరప్రదేశ్‌కు జాతీయ ప్రధాన కార్యదర్శి వినోద్ తావ్డే ఇంచార్జ్‌గా ఎంపికయ్యారు. దేశ రాజకీయాల్లో కీలకమైన ఈ రాష్ట్రానికి నలుగురు సహ ఇంచార్జ్‌లను కూడా నియమించినట్లు పార్టీ ప్రకటించింది. మహారాష్ట్రకు బైజయంత్ జయ్ పాండా ఇంచార్జ్‌గా వ్యవహరిస్తారు. అమిత్ మాలవీయ, సదానంద్ షెట్ తనవాడే, కమల్‌జీత్ సెహ్రావత్ సహ ఇంచార్జ్‌లుగా నియమితులయ్యారు.

    మాజీ కేంద్ర మంత్రి స్మృతి ఇరానీకి ఛత్తీస్‌గఢ్, హర్యానా రాష్ట్రాల ఇంచార్జ్ బాధ్యతలు అప్పగించారు. ఢిల్లీకి డాక్టర్ వినయ్ సహస్రబుద్ధే ఇంచార్జ్‌గా, జాంయాంగ్ త్సేరింగ్ నామ్‌గ్యాల్, దర్శనాబెన్ జర్దోష్ కో ఇంచార్జ్‌లుగా నియమితులయ్యారు. గుజరాత్‌కు తరుణ్ చుగ్, హిమాచల్ ప్రదేశ్‌కు శ్రీకాంత్ శర్మ, మధ్యప్రదేశ్‌కు మాజీ ముఖ్యమంత్రి బిప్లబ్ కుమార్ దేవ్ బాధ్యతలు చేపట్టనున్నారు.

    ఈ నియామకాలు రాష్ట్ర స్థాయి నాయకత్వం, జాతీయ కమాండ్ మధ్య సమన్వయాన్ని బలోపేతం చేసే చర్యగా పార్టీ వర్గాలు పేర్కొన్నాయి. నియమితులైన ఇంచార్జ్‌లు త్వరలో ఆయా రాష్ట్రాల కోర్ కమిటీలు, జిల్లా స్థాయి నేతలతో సమావేశాలు నిర్వహించి ఎన్నికల ప్రణాళికలు, సంస్థాగత పరిస్థితులపై సమీక్షించనున్నారు. తదుపరి దశలో అభ్యర్థుల ఎంపిక, ప్రచార వ్యూహం, బూత్ స్థాయి సమన్వయంపై నిర్ణయాలు వెలువడనున్నాయి.