99TV News

    BRS MLCs Tata Madhu and Naveen Reddy Get Court Relief, Remand Rejected

    BRS MLCs Tata Madhu

    బీఆర్‌ఎస్ ఎమ్మెల్సీలకు కోర్టులో భారీ ఊరట.. రిమాండ్ తిరస్కరణ, విడుదలకు ఆదేశాలు

    తెలంగాణ అసెంబ్లీ ఆవరణలో చోటుచేసుకున్న ఉద్రిక్తతలు, స్పీకర్‌పై అనుచిత వ్యాఖ్యల ఆరోపణలతో అరెస్టైన బీఆర్‌ఎస్ ఎమ్మెల్సీలు తాతా మధు , నవీన్ కుమార్ రెడ్డిలకు నాంపల్లి కోర్టులో భారీ ఊరట లభించింది. వారిని రిమాండ్‌కు తరలించాలన్న పోలీసుల అభ్యర్థనను న్యాయస్థానం తిరస్కరించింది. దీంతో ఇద్దరినీ విడుదల చేయాలని కోర్టు ఆదేశించింది. కోర్టు ఆదేశాల మేరకు రూ.10 వేల చొప్పున వ్యక్తిగత పూచీకత్తుతో పాటు రెండు ష్యూరిటీలు సమర్పించాలని ఆదేశించింది. ష్యూరిటీలు సమర్పించిన అనంతరం ఇద్దరు ఎమ్మెల్సీలను పోలీసులు విడుదల చేసినట్లు తాజా సమాచారం.

    తెలంగాణ అసెంబ్లీ వర్షాకాల సమావేశాల తొలిరోజు బీఆర్‌ఎస్‌ నేతలు కాంగ్రెస్ ప్రభుత్వ 1000 రోజుల పాలనకు వ్యతిరేకంగా నిరసన చేపట్టారు. నల్ల టీషర్టులు ధరించిన బీఆర్‌ఎస్‌ ఎమ్మెల్యేలు, ఎమ్మెల్సీలు అసెంబ్లీ ప్రాంగణంలోకి వెళ్లేందుకు ప్రయత్నించడంతో పోలీసులతో ఉద్రిక్తత చోటుచేసుకుంది. ఈ క్రమంలో ఇరువర్గాల మధ్య తోపులాట, వాగ్వాదం చోటుచేసుకుంది. ఈ ఘటనకు కొనసాగింపుగా అసెంబ్లీ స్పీకర్ గడ్డం ప్రసాద్ కుమార్ పై తాతా మధు అనుచిత వ్యాఖ్యలు చేశారనే ఆరోపణలు తెరపైకి వచ్చాయి. స్పీకర్ కార్యాలయానికి చెందిన ఓఎస్డీ ఫిర్యాదు ఆధారంగా సైఫాబాద్ పోలీస్ స్టేషన్‌లో కేసు నమోదు చేసినట్లు పోలీసులు తెలిపారు.

    పోలీసుల వివరాల ప్రకారం క్రైమ్ నంబర్ 364/2026 కింద భారతీయ న్యాయ సంహితలోని సెక్షన్ 352, 3(5)తో పాటు ఎస్సీ, ఎస్టీ అట్రాసిటీస్ నిరోధక చట్టంలోని పలు సెక్షన్ల కింద కేసు నమోదు చేశారు. స్పీకర్ ఎస్సీ సామాజిక వర్గానికి చెందిన వ్యక్తి కావడంతో ఆయనను లక్ష్యంగా చేసుకుని అవమానకర వ్యాఖ్యలు చేశారన్నది ఫిర్యాదులోని ప్రధాన ఆరోపణగా ఉంది. తాతా మధు మాత్రం తాను స్పీకర్‌ను ఉద్దేశించి ఎలాంటి అనుచిత వ్యాఖ్యలు చేయలేదని వివరణ ఇచ్చారు. తనపై అనని మాటలను ఆపాదించవద్దని, తన వ్యాఖ్యలను వేరే విధంగా భావించినట్లయితే వాటిని ఉపసంహరించుకుంటున్నానని పేర్కొన్నారు.

    కేసు నమోదైన నేపథ్యంలో పోలీసులు మంగళవారం ఉదయం తాతా మధు, నవీన్ కుమార్ రెడ్డిలను అదుపులోకి తీసుకున్నారు. తాతా మధును న్యూ ఎమ్మెల్యే క్వార్టర్స్ నుంచి, నవీన్ కుమార్ రెడ్డిని కోకాపేట నుంచి పోలీసులు అదుపులోకి తీసుకున్నట్లు సమాచారం. అనంతరం వారిని నారాయణగూడ పోలీస్ స్టేషన్‌కు తరలించి విచారించారు. వైద్య పరీక్షల కోసం కింగ్ కోఠి ప్రభుత్వ ఆసుపత్రికి కూడా తీసుకెళ్లినట్లు సమాచారం. ఆ తర్వాత నాంపల్లి కోర్టులో హాజరుపరిచేందుకు పోలీసులు చర్యలు చేపట్టారు.

    విచారణ అనంతరం ఇద్దరు ఎమ్మెల్సీలను నాంపల్లి కోర్టులో హాజరుపరిచిన పోలీసులు.. వారిని రిమాండ్‌కు పంపించాలని న్యాయస్థానాన్ని కోరారు. కేసులో ఉన్న ఆరోపణలు, దర్యాప్తు అవసరం తదితర అంశాలను పోలీసులు కోర్టు దృష్టికి తీసుకెళ్లినట్లు సమాచారం. అయితే పోలీసుల రిమాండ్ అభ్యర్థనను న్యాయస్థానం తిరస్కరించింది. ఇరువర్గాల వాదనలు విన్న అనంతరం నాంపల్లి కోర్టు.. తాతా మధు, నవీన్ కుమార్ రెడ్డిలను రిమాండ్‌కు పంపాల్సిన అవసరం లేదని స్పష్టం చేసింది.

    ఇద్దరూ రూ.10 వేల చొప్పున వ్యక్తిగత పూచీకత్తు, అలాగే రెండు ష్యూరిటీలు సమర్పించాలని న్యాయస్థానం ఆదేశించింది. ష్యూరిటీలు సమర్పించిన అనంతరం వారిని వెంటనే విడుదల చేయాలని పోలీసులను ఆదేశించింది. కోర్టు ఆదేశాల మేరకు ఇద్దరు ఎమ్మెల్సీలను విడుదల చేశారు.