హైదరాబాద్ రియల్ ఎస్టేట్‌లో మందగమనం.. సెప్టెంబర్‌లో 15 శాతం తగ్గిన రిజిస్ట్రేషన్లు!
హైదరాబాద్ రియల్ ఎస్టేట్ మార్కెట్‌లో సెప్టెంబర్ 2026లో గృహాల రిజిస్ట్రేషన్లు తగ్గాయి. గత ఏడాది ఇదే నెలతో పోలిస్తే నివాస గృహాల రిజిస్ట్రేషన్లు 15 శాతం క్షీణించాయి. అయితే, అధిక విలువ కలిగిన ప్రీమియం ఇళ్ల విభాగం మొత్తం లావాదేవీల విలువకు మద్దతుగా నిలిచింది.
నైట్ ఫ్రాంక్ ఇండియా, తెలంగాణ రిజిస్ట్రేషన్ల శాఖ గణాంకాల ప్రకారం.. హైదరాబాద్, మేడ్చల్‌-మల్కాజిగిరి, రంగారెడ్డి, సంగారెడ్డి జిల్లాల పరిధిలో సెప్టెంబర్‌లో 5,620 ఇళ్ల రిజిస్ట్రేషన్లు జరిగాయి. గతేడాది ఇదే నెలలో ఈ సంఖ్య 6,612గా ఉంది. లావాదేవీల విలువ కూడా రూ.4,804 కోట్ల నుంచి రూ.4,487 కోట్లకు తగ్గింది.
రూ.50 లక్షల లోపు ఇళ్ల రిజిస్ట్రేషన్లు 20 శాతం, రూ.50 లక్షల నుంచి రూ.కోటి మధ్య ఇళ్ల రిజిస్ట్రేషన్లు 6 శాతం తగ్గాయి. కోటి రూపాయలకు పైబడిన ఇళ్ల రిజిస్ట్రేషన్లు 12 శాతం తగ్గినప్పటికీ, మొత్తం లావాదేవీల విలువలో వాటి వాటా 54 శాతం నుంచి 56 శాతానికి పెరిగింది.
అయితే, జనవరి నుంచి సెప్టెంబర్ వరకు మొత్తం 55,715 ఇళ్ల రిజిస్ట్రేషన్లు నమోదయ్యాయి. ఈ కాలంలో లావాదేవీల విలువ గతేడాదితో పోలిస్తే 4 శాతం పెరిగి రూ.39,910 కోట్లకు చేరింది. సెప్టెంబర్‌లో మందగమనం కనిపించినా, తొమ్మిది నెలల గణాంకాలు మార్కెట్‌లో మొత్తం లావాదేవీల విలువ పెరిగినట్లు సూచిస్తున్నాయి.