ఓసీఐ క్రికెటర్లు పౌరసత్వంపై నిర్ణయం తీసుకోవాలని బాంబే హైకోర్టు సూచన
భారత పాస్‌పోర్ట్ నిబంధనపై 12 మంది యువ క్రికెటర్ల పిటిషన్ విచారణలో బీసీసీఐ, కేంద్రానికి నివేదిక ఆదేశం
బీసీసీఐ టోర్నమెంట్లలో ఆడేందుకు భారత పాస్‌పోర్ట్ తప్పనిసరి చేసిన నిర్ణయాన్ని సవాల్ చేసిన 12 మంది ఓసీఐ యువ క్రికెటర్ల పిటిషన్‌పై బాంబే హైకోర్టు కీలక వ్యాఖ్యలు చేసింది. భారత జట్టుకు ఆడాలనే ఆకాంక్ష ఉంటే భారత పౌరసత్వంపై దృష్టి పెట్టాలని ధర్మాసనం సూచించింది.
ప్రధాన న్యాయమూర్తి మహేశ్ చంద్ర త్రిపాఠి, జస్టిస్ అద్వైత్ సేథ్నా ధర్మాసనం విచారణలో, “భారతదేశంలో ప్రతిభావంతులైన క్రికెటర్లకు కొరత లేదు. దేశానికి ప్రాతినిధ్యం వహించాలని అంతగా అనిపిస్తే, భారత పౌరసత్వం ఎందుకు తీసుకోకూడదు?” అని వ్యాఖ్యానించింది. ఓసీఐ హోదాను కొనసాగించాలా, భారత పాస్‌పోర్ట్ కోసం దరఖాస్తు చేసుకోవాలా అనేది పిటిషనర్లే నిర్ణయించుకోవాలని కోర్టు స్పష్టం చేసింది. అయితే పౌరసత్వం మార్చుకోవాలని తాము బలవంతం చేయడం లేదని ధర్మాసనం తెలిపింది.
కవిన్ కార్తీక్ అనే ఓసీఐ కార్డు హోల్డర్ దాఖలు చేసిన పిటిషన్‌లో, యువ క్రికెటర్లు భారతదేశంలోనే నివసిస్తూ చదువుకుంటున్నారని పిటిషనర్ల తరఫు న్యాయవాది కునాల్ చీమా కోర్టుకు తెలిపారు. వారు అంతర్జాతీయ జట్టులో చోటు కోరడం లేదని, దేశవాళీ టోర్నమెంట్లలో పాల్గొనే అవకాశమే కోరుతున్నారని వాదించారు. దేశవాళీ క్రికెట్‌లో ఆడితే ఇండియన్ ప్రీమియర్ లీగ్‌లో అర్హత సాధించే మార్గం ఉంటుందని ఆయన వివరించారు.
HIGHLIGHTS
- 12 మంది ఓసీఐ యువ క్రికెటర్లు పిటిషన్ దాఖలు చేశారు
- బీసీసీఐ 2023లో భారత పాస్‌పోర్ట్ నిబంధన అమలు చేసింది
- తదుపరి విచారణ నవంబర్ 25కి వాయిదా
- కేంద్రం ఇంకా అఫిడవిట్ దాఖలు చేయాల్సి ఉంది
బీసీసీఐ తరఫున సీనియర్ న్యాయవాది డాక్టర్ బీరేంద్ర సరాఫ్ వాదిస్తూ, పౌరసత్వ సవరణ చట్టం ప్రకారం ఓసీఐ కార్డుదారులు అంతర్జాతీయ స్థాయిలో భారత్‌కు ప్రాతినిధ్యం వహించలేరని చెప్పారు. క్రికెట్‌ను వారు జీవనోపాధిగా హక్కుగా చూపలేరని కూడా ఆయన కోర్టుకు తెలిపారు. 2023కు ముందు ఓసీఐ కార్డుదారులు దేశవాళీ క్రికెట్‌లో పాల్గొన్నారని పిటిషనర్లు పేర్కొన్నప్పటికీ, కొత్త నిబంధనల అమలుపై బీసీసీఐ తన నిర్ణయాన్ని సమర్థించింది.
ఇరుపక్షాల వాదనలు విన్న ధర్మాసనం, భారత పౌరసత్వం కోసం ఇప్పటికే దరఖాస్తు చేసిన ఓసీఐ కార్డుదారుల అప్లికేషన్ల ప్రస్తుత స్థితిపై నివేదిక ఇవ్వాలని బీసీసీఐ, కేంద్ర ప్రభుత్వం, పిటిషనర్లను ఆదేశించింది. కేంద్ర ప్రభుత్వం ఈ విషయంలో ఇంకా అఫిడవిట్ దాఖలు చేయాల్సి ఉంది. కేసు తదుపరి విచారణను కోర్టు నవంబర్ 25కి వాయిదా వేసింది.