కలకత్తా ఫుట్బాల్ లీగ్ ప్రీమియర్ డివిజన్లో జరిగిన కోల్కతా డెర్బీలో ఈస్ట్ బెంగాల్ రిజర్వ్ ఆటగాళ్లు సత్తా చాటారు. స్టార్ ఆటగాళ్లతో బరిలోకి దిగిన మోహన్ బగాన్ సూపర్ జెయింట్ను 1-1తో నిలువరించారు. బరాసత్ స్టేడియంలో సోమవారం జరిగిన ఈ మ్యాచ్లో రెండు జట్లు చెరో గోల్ సాధించడంతో పోరు డ్రాగా ముగిసింది.
స్టార్ జట్టుకు షాక్..
మోహన్ బగాన్ తరఫున రాహుల్ భేకే, మెహతాబ్ సింగ్, సుభాషిష్ బోస్, అపుయియా, సహల్ అబ్దుల్ సమద్, మన్వీర్ సింగ్ వంటి కీలక ఆటగాళ్లు బరిలోకి దిగారు. మరోవైపు ఈస్ట్ బెంగాల్ తమ రిజర్వ్ ఆటగాళ్లపైనే నమ్మకం పెట్టుకుంది. అయినప్పటికీ యువ ఆటగాళ్లు ఏమాత్రం బెదరకుండా పోరాడారు.
మ్యాచ్ ఆరంభంలో మోహన్ బగాన్ ఆధిపత్యం ప్రదర్శించింది. ఈస్ట్ బెంగాల్ రక్షణను ఛేదించేందుకు పలుమార్లు ప్రయత్నించిన ఆ జట్టుకు 39వ నిమిషంలో ఫలితం దక్కింది. మన్వీర్ సింగ్ లాంగ్ బాల్ను అందుకుని గోల్ చేయడంతో మోహన్ బగాన్ 1-0 ఆధిక్యంలోకి వెళ్లింది.
రెండో అర్ధభాగంలో ఈస్ట్ బెంగాల్ దూకుడు
విరామం తర్వాత ఈస్ట్ బెంగాల్ ఆట పూర్తిగా మారిపోయింది. యువ ఆటగాళ్లు వేగంగా దాడులు చేస్తూ మోహన్ బగాన్ రక్షణపై ఒత్తిడి పెంచారు. కొన్ని మంచి అవకాశాలు లభించినప్పటికీ వాటిని గోల్స్గా మలచలేకపోయారు. ఒక దశలో మోహన్ బగాన్ రక్షణలో సమన్వయ లోపంతో ఈస్ట్ బెంగాల్కు ఖాళీ గోల్ అవకాశం కూడా వచ్చింది.
54వ నిమిషంలో మొహమ్మద్ బిలాల్ మైదానంలోకి రావడం ఈస్ట్ బెంగాల్కు మరింత ఊపునిచ్చింది. ఆ తర్వాత వరుస దాడులతో ప్రత్యర్థిపై ఒత్తిడి పెంచిన ఈస్ట్ బెంగాల్ చివరకు 64వ నిమిషంలో సమం చేసింది. విజయ్ ముర్ము అందించిన కార్నర్ను బిలాల్ అద్భుతమైన హెడర్తో గోల్గా మలిచాడు.
ఈస్ట్ బెంగాల్ గ్రూప్ టాపర్
స్కోరు సమమైన తర్వాత కూడా ఈస్ట్ బెంగాల్ దూకుడు తగ్గలేదు. మరోవైపు మోహన్ బగాన్ కూడా విజయం కోసం ప్రయత్నించినా ఈస్ట్ బెంగాల్ గోల్కీపర్ గౌరవ్ షా కీలక సేవ్లతో జట్టును కాపాడాడు. చివరకు మ్యాచ్ 1-1తో ముగిసింది.
ఈ డ్రాతో ఈస్ట్ బెంగాల్ 11 మ్యాచ్ల్లో 8 విజయాలు, 3 డ్రాలతో 27 పాయింట్లు సాధించి గ్రూప్-Aలో అగ్రస్థానంలో నిలిచింది. భవానీపూర్ కూడా 27 పాయింట్లు సాధించినప్పటికీ గోల్ తేడాలో వెనుకబడింది. మోహన్ బగాన్ 23 పాయింట్లతో మూడో స్థానంలో నిలిచింది. మూడు జట్లూ సూపర్ సిక్స్ దశకు అర్హత సాధించాయి.
ఇటీవల జరిగిన డ్యూరాండ్ కప్ ఫైనల్లో మోహన్ బగాన్ను 4-1తో ఓడించిన ఈస్ట్ బెంగాల్.. ఇప్పుడు రిజర్వ్ జట్టుతోనే మరోసారి తమ ప్రత్యర్థిని నిలువరించడం విశేషం. ఈ ఫలితంతో ఈస్ట్ బెంగాల్ కోల్కతా డెర్బీలో తమ అజేయ పరంపరను 12 ఏళ్లకు పొడిగించింది.
