ప్రధాని మోదీని కలిసిన రింకూ సింగ్.. పెళ్లికి ఆహ్వానం
డిసెంబర్ 4న లక్నోలో ప్రియా సరోజ్తో వివాహం; కుటుంబంతో కలిసి పెళ్లి పత్రిక అందజేసిన టీమిండియా క్రికెటర్
టీమిండియా క్రికెటర్ రింకూ సింగ్ తన వివాహానికి హాజరు కావాలని ప్రధానమంత్రి నరేంద్ర మోదీని కుటుంబ సభ్యులతో కలిసి ఆహ్వానించాడు. సమాజ్వాదీ పార్టీ ఎంపీ ప్రియా సరోజ్తో డిసెంబర్ 4న లక్నోలో జరగనున్న వివాహానికి సంబంధించిన ఆహ్వాన పత్రికను ఆయన ప్రధానమంత్రికి అందజేశాడు.
ప్రధానిని కలిసిన విషయాన్ని రింకూ సింగ్ సామాజిక మాధ్యమాల్లో పంచుకున్నాడు. కుటుంబ సభ్యులతో కలిసి ప్రధానిని కలవడం, వివాహానికి ఆహ్వానించి ఆశీస్సులు తీసుకోవడం తమకు ప్రత్యేకమైన అనుభూతి అని రింకూ పేర్కొన్నాడు. వివాహ ఏర్పాట్లలో భాగంగా రింకూ కుటుంబం ఇప్పటికే ఉత్తరప్రదేశ్ ముఖ్యమంత్రి యోగి ఆదిత్యనాథ్ను కూడా ఆహ్వానించింది. రింకూ తల్లి బీనా దేవి, సోదరుడు సోనూ సింగ్, సోదరి నేహా సింగ్ లక్నోలోని సీఎం నివాసానికి వెళ్లి పెళ్లి పత్రిక అందజేశారు.
రింకూ సింగ్, ప్రియా సరోజ్ వివాహ వేడుక లక్నోలోని రమదా హోటల్లో జరగనుంది. క్రికెట్, రాజకీయ రంగాలకు చెందిన పలువురు ప్రముఖులు ఈ వేడుకకు హాజరయ్యే అవకాశం ఉంది. ఈ జంట నిశ్చితార్థం 2025 జూన్ 8న లక్నోలోని ది సెంట్రమ్ హోటల్లో జరిగింది. అప్పటి నుంచి వివాహ తేదీపై అభిమానులు, క్రికెట్ వర్గాల్లో ఆసక్తి నెలకొంది.
HIGHLIGHTS
- రింకూ సింగ్ ప్రధానమంత్రి నరేంద్ర మోదీని ఆహ్వానించాడు
- ప్రియా సరోజ్తో వివాహం డిసెంబర్ 4న లక్నోలో
- వేడుక లక్నోలోని రమదా హోటల్లో జరగనుంది
- 2025 జూన్ 8న నిశ్చితార్థం జరిగింది
తమ పరిచయం గురించి రింకూ గతంలో మాట్లాడినప్పుడు, కరోనా సమయంలో ఐపీఎల్ మ్యాచ్ల కోసం ముంబైలో ఉన్నప్పుడు ప్రియా ఫొటోను ఒక ఫ్యాన్ పేజీలో చూశానని చెప్పాడు. ఆమె తన ఫొటోలకు లైక్లు ఇవ్వడంతో సందేశం పంపేందుకు ధైర్యం వచ్చిందని తెలిపాడు. ఆ పరిచయం క్రమంగా సంభాషణగా మారి, తరువాత ప్రేమగా రూపుదిద్దుకుందని రింకూ వివరించాడు.
రింకూ మ్యాచ్లు ఆడుతున్నప్పుడు ప్రియా స్టేడియాలకు వచ్చి ప్రోత్సహిస్తున్న దృశ్యాలు పలుమార్లు కనిపించాయి. కోల్కతా నైట్రైడర్స్ తరఫున ఈడెన్ గార్డెన్స్లో రింకూ ఆడినప్పుడు కూడా ఆమె ప్రేక్షకుల మధ్య కనిపించారు. రాజకీయ కుటుంబ నేపథ్యం కలిగిన ప్రియా సరోజ్ సమాజ్వాదీ పార్టీ ఎంపీగా కొనసాగుతున్నారు.
క్రికెట్ పరంగా రింకూ త్వరలో మళ్లీ అంతర్జాతీయ స్థాయి పోటీల్లో బరిలోకి దిగనున్నాడు. జింబాబ్వే పర్యటనలో భారత్ తరఫున చివరిసారిగా ఆడిన అతడు, నవంబర్ 19 నుంచి 29 వరకు దోహాలో జరిగే ఏసీసీ రైజింగ్ స్టార్స్ ఆసియా కప్ కోసం భారత ‘ఏ’ జట్టు వైస్ కెప్టెన్గా ఎంపికయ్యాడు. వివాహానికి ముందు ఈ టోర్నీ అతని తదుపరి ప్రధాన క్రీడా బాధ్యతగా ఉండనుంది.
