మద్రాస్ హైకోర్టులో ఎంకే స్టాలిన్ పిటిషన్ కొట్టివేత
కొలత్తూరు ఎన్నికల్లో ఈవీఎం, వీవీప్యాట్ ధ్రువీకరణపై దాఖలైన పిటిషన్ విచారణార్హం కాదన్న హైకోర్టు
తమిళనాడు మాజీ ముఖ్యమంత్రి, డీఎంకే అధినేత ఎంకే స్టాలిన్కు మద్రాస్ హైకోర్టులో గురువారం ఎదురుదెబ్బ తగిలింది. కొలత్తూరు అసెంబ్లీ ఎన్నికల్లో ఈవీఎంలు, వీవీప్యాట్ ధ్రువీకరణలో అవకతవకలు జరిగాయంటూ ఆయన దాఖలు చేసిన పిటిషన్ను హైకోర్టు కొట్టివేసింది.
చీఫ్ జస్టిస్ ఎస్ఏ ధర్మాధికారి, జస్టిస్ జి అరుల్ మురుగన్లతో కూడిన ధర్మాసనం ఈ పిటిషన్ను విచారణకు స్వీకరించలేమని పేర్కొంది. పిటిషన్ ‘నాట్ మెయింటెయినబుల్’ అని ధర్మాసనం వ్యాఖ్యానించింది. దీంతో కొలత్తూరు ఎన్నికల ఫలితాలను ఈవీఎంల ఆధారంగా సవాలు చేస్తూ స్టాలిన్ చేసిన ప్రయత్నానికి ప్రస్తుతానికి బ్రేక్ పడింది.
2026 తమిళనాడు అసెంబ్లీ ఎన్నికల్లో కొలత్తూరు నియోజకవర్గం నుంచి పోటీ చేసిన స్టాలిన్ను తమిళగ వెట్రి కళగం అభ్యర్థి వీఎస్ బాబు ఓడించారు. బాబుకు 82,997 ఓట్లు రాగా, స్టాలిన్కు 74,202 ఓట్లు వచ్చాయి. బాబు 8,795 ఓట్ల మెజారిటీతో గెలిచారు. ఫలితాలు మే 4న వెలువడగా, మే 7న 14 ఈవీఎంల బర్న్ట్ మెమొరీ, మైక్రో కంట్రోలర్ పరిశీలన కోరుతూ స్టాలిన్ ఎన్నికల సంఘానికి దరఖాస్తు చేశారు.
హైకోర్టులో స్టాలిన్ తరఫున సీనియర్ న్యాయవాది కపిల్ సిబల్ వాదనలు వినిపించారు. నియోజకవర్గంలోని మొత్తం 286 ఈవీఎంలలో 14 యంత్రాలను మాత్రమే పరిశీలించారని, ఆ ప్రక్రియ జూలై 29న జరిగిందని ఆయన కోర్టు దృష్టికి తీసుకెళ్లారు. పరిశీలన సమయంలో 2 ఈవీఎంలు పనిచేయలేదని, మరో యంత్రానికి సంబంధించిన బ్యాలెట్ యూనిట్, కంట్రోల్ యూనిట్లపై అడ్రస్ ట్యాగ్లు, సీల్ల విషయంలో లోపాలు కనిపించాయని స్టాలిన్ పక్షం వాదించింది.
HIGHLIGHTS
- కొలత్తూరు ఫలితాలపై స్టాలిన్ పిటిషన్ కొట్టివేత
- బాబు 8,795 ఓట్ల మెజారిటీతో విజయం
- 14 ఈవీఎంల పరిశీలనపై వివాదం
- ధర్మాసనం పిటిషన్ విచారణార్హం కాదని పేర్కొంది
ఎన్నికల సంఘం తరఫున సీనియర్ న్యాయవాది దామా శేషాద్రి నాయుడు వాదనలు వినిపించారు. స్టాలిన్ దాఖలు చేసిన పిటిషన్ను హైకోర్టు విచారించడానికి వీల్లేదని ఆయన కోర్టుకు తెలిపారు. ఎన్నికల ప్రక్రియ, ఈవీఎం ధ్రువీకరణకు సంబంధించిన నిబంధనలను పరిగణనలోకి తీసుకుని పిటిషన్ను కొట్టివేయాలని ఈసీ కోరింది. ఈ వాదనలను పరిశీలించిన తర్వాత ధర్మాసనం స్టాలిన్ అభ్యర్థనను తిరస్కరించింది.
స్టాలిన్ తన పిటిషన్లో కొలత్తూరు నియోజకవర్గంలోని మొత్తం 286 ఈవీఎంలను పరిశీలించాలని, 100 శాతం వీవీప్యాట్ స్లిప్పులను లెక్కించాలని కోరారు. ఈవీఎంల పరిశీలనలో బయటపడినట్లు పేర్కొన్న లోపాల నేపథ్యంలో వీఎస్ బాబు ఎన్నికను చెల్లనిదిగా ప్రకటించాలని, తనను విజేతగా ప్రకటించాలని కూడా అభ్యర్థించారు. అయితే ఆ అభ్యర్థనలపై హైకోర్టు అనుకూలంగా స్పందించలేదు.
హైకోర్టు నిర్ణయంతో కొలత్తూరు ఫలితాలపై న్యాయపరమైన పోరాటంలో స్టాలిన్కు తక్షణ ఉపశమనం లభించలేదు. తదుపరి న్యాయపరమైన అవకాశాలపై స్టాలిన్ పక్షం నిర్ణయం తీసుకోవాల్సి ఉంది. ఈ వ్యవహారంలో అప్పీల్ దాఖలు చేస్తారా, లేక ఇతర చట్టపరమైన మార్గాలను పరిశీలిస్తారా అన్నది తర్వాతి దశగా ఉండనుంది.
