ఆర్టిఫిషియల్‌ ఇంటెలిజెన్స్‌ (AI) సాంకేతికతను ఉపయోగించి నకిలీ పుస్తకాలు సృష్టించి, వాటిని ప్రభుత్వ గ్రంథాలయాలకు సరఫరా చేసినట్లు తమిళనాడులో తీవ్ర ఆరోపణలు వెల్లువెత్తుతున్నాయి. ఈ వ్యవహారాన్ని దేశంలోనే తొలి ‘ఏఐ స్కామ్‌’గా ఆ రాష్ట్ర పాఠశాల విద్యాశాఖ మంత్రి ఏ. రాజ్‌మోహన్‌ అభివర్ణించారు. కోయంబత్తూరులోని పెరియార్‌ అరివులగం గ్రంథాలయంలో ఈ వ్యవహారం వెలుగులోకి రావడంతో రాష్ట్రవ్యాప్తంగా పుస్తకాల కొనుగోళ్లపై విచారణకు ప్రభుత్వం ఆదేశించింది. అవకతవకలు జరిగాయనే ఆరోపణలపై డైరెక్టరేట్‌ ఆఫ్‌ విజిలెన్స్‌ అండ్‌ యాంటీ కరప్షన్‌ (DVAC) కూడా దర్యాప్తు ప్రారంభించింది.
1,800 పుస్తకాలపై అనుమానాలు.. రచయిత పెరుమాళ్‌ మురుగన్‌ బయటపెట్టిన అంశాలు
కోయంబత్తూరులోని పెరియార్‌ అరివులగం గ్రంథాలయంలో సుమారు 1,800 పుస్తకాలపై ప్రముఖ తమిళ రచయిత పెరుమాళ్‌ మురుగన్‌ అనుమానాలు వ్యక్తం చేశారు. కొన్ని పుస్తకాల్లో వ్యాకరణ దోషాలు, చారిత్రక తప్పిదాలు, సందేహాస్పదమైన రచయితల పేర్లు ఉన్నాయని ఆయన తన వ్యాసంలో ప్రస్తావించారు. పుస్తకాల నాణ్యత, వాటి ధరలు, ప్రచురణకర్తల విశ్వసనీయతపైనా ప్రశ్నలు లేవనెత్తారు.
ఈ ఆరోపణలపై స్పందించిన పాఠశాల విద్యాశాఖ మంత్రి రాజ్‌మోహన్‌.. పుస్తకాల కొనుగోలులో భారీ అక్రమాలు జరిగి ఉండవచ్చని ఆరోపించారు. కొన్ని పుస్తకాలు ఏఐ ద్వారా రూపొందించిన కంటెంట్‌తో తయారైనట్లు ప్రాథమిక పరిశీలనలో అనుమానాలు వ్యక్తమయ్యాయని తెలిపారు.
పుస్తకాల్లో కనిపించిన వింత తప్పులు
వివాదాస్పద పుస్తకాల్లో చరిత్రకు సంబంధించిన తప్పులు ఉన్నాయని ప్రభుత్వం చెబుతోంది. 1947లో తమిళనాడు తొలి ముఖ్యమంత్రిగా ‘ముత్తువేలు సుబ్బయ్య’ అనే వ్యక్తి పేరును పేర్కొనడం ఇందుకు ఉదాహరణగా చూపుతోంది. అలాగే ముఖ్యమంత్రి విజయ్‌, నటి త్రిష, సూర్య బాలు, జ్యోతి హరిహరన్‌ వంటి పేర్లను రచయితలుగా చూపిన పుస్తకాలపైనా అభ్యంతరాలు వ్యక్తమయ్యాయి.
కొన్ని పుస్తకాల్లోని విషయాలు ఏఐ ద్వారా రూపొందించినవిగా అనుమానిస్తున్నట్లు అధికారులు చెబుతున్నారు. లార్జ్‌ లాంగ్వేజ్‌ మోడల్స్‌ (LLMs) సహాయంతో వ్యాసాలు, కథలు, ఇతర రచనలు సృష్టించి, వాటిని వేర్వేరు రచయితల పేర్లతో పుస్తకాలుగా ముద్రించి సరఫరా చేసినట్లు ఆరోపణలు ఉన్నాయి.
జీన్‌ డ్రెజ్‌ పేరుతోనూ పుస్తకం?
ఈ వివాదంలో మరో ఆసక్తికర అంశం ప్రముఖ బెల్జియం ఆర్థికవేత్త జీన్‌ డ్రెజ్‌ పేరు. ‘Democracy and People’s Rights in the Contemporary World’ అనే పుస్తకాన్ని ఆయన రచించినట్లుగా ప్రచురించినట్లు ఆరోపణలు వచ్చాయి. అయితే, తాను అలాంటి పుస్తకాన్ని రాయలేదని, అది నకిలీ ప్రచురణ అయి ఉండవచ్చని ఆయన ఓ ఆంగ్ల పత్రికకు ఈమెయిల్‌ ద్వారా స్పందించినట్లు కథనాలు వెల్లడించాయి.
ఈ పరిణామం పుస్తకాల రచయితల అసలు గుర్తింపు, ప్రచురణకర్తల వివరాలు, వాటి కొనుగోలు ప్రక్రియపై మరిన్ని ప్రశ్నలను లేవనెత్తింది.
రాష్ట్రవ్యాప్తంగా విచారణ.. కొనుగోలు ఆర్డర్ల రద్దుకు నిర్ణయం
పెరియార్‌ అరివులగం గ్రంథాలయానికే ఈ వ్యవహారం పరిమితం కాలేదని ప్రభుత్వం భావిస్తోంది. చెన్నైలోని అన్నా సెంటెనరీ లైబ్రరీ, కొన్నెమరా పబ్లిక్‌ లైబ్రరీ, మదురైలోని కలైంజర్‌ సెంటెనరీ లైబ్రరీ సహా ఇతర గ్రంథాలయాల్లోనూ అనుమానాస్పద పుస్తకాల కొనుగోళ్లపై పరిశీలన జరుగుతోంది.
రాష్ట్రవ్యాప్తంగా గ్రంథాలయాల్లోని పుస్తకాల కొనుగోలు రికార్డులు, బిల్లులు, చెల్లింపులను పరిశీలించాలని ప్రభుత్వం ఆదేశించింది. అనుమానాస్పద పుస్తకాలను వేరు చేసి భద్రపరచాలని సూచించింది. నవంబరు 10న మంత్రి రాజ్‌మోహన్‌ ఇప్పటివరకు ఇచ్చిన పుస్తకాల కొనుగోలు ఆర్డర్లన్నింటినీ రద్దు చేయనున్నట్లు ప్రకటించారు. పండితులు, ప్రచురణకర్తల సంఘాలతో సంప్రదించి పారదర్శకమైన కొత్త విధానాన్ని రూపొందిస్తామని తెలిపారు.
డీఎంకే ఎదురుదాడి.. విచారణకు సిద్ధమంటూ ప్రకటన
ఈ ఆరోపణలపై డీఎంకే కూడా స్పందించింది. పుస్తకాల కొనుగోలు వ్యవహారంలో అవకతవకలు జరిగాయని ఆరోపిస్తూ ఆ పార్టీకి చెందిన నాయకుడు డీవీఏసీకి ఫిర్యాదు చేశారు. ప్రస్తుత టీవీకే ప్రభుత్వం కూడా పుస్తకాల కొనుగోలు, పరిశీలన ప్రక్రియలో తన బాధ్యతను స్పష్టం చేయాలని డీఎంకే ప్రశ్నించింది.
పుస్తకాలు ఎప్పుడు కొనుగోలు చేశారు? ఎవరు ఆర్డర్లు ఇచ్చారు? వాటిని ఎవరు పరిశీలించి ఆమోదించారు? అనే అంశాలపై సమగ్ర విచారణ జరగాలని కోరింది. విచారణను ఎదుర్కొనేందుకు తాము సిద్ధంగా ఉన్నామని డీఎంకే నేతలు పేర్కొన్నారు.
అసలు నిజం తేల్చనున్న దర్యాప్తు
ప్రస్తుతం డీవీఏసీ అధికారులు పుస్తకాల కొనుగోలు ప్రక్రియకు సంబంధించిన రికార్డులు, ఆర్థిక లావాదేవీలను పరిశీలిస్తున్నారు. ఏ ప్రచురణ సంస్థలు పుస్తకాలను సరఫరా చేశాయి? వాటి ధరలను ఎవరు నిర్ణయించారు? రచయితల పేర్లు నిజమైనవేనా? ఏఐతో రూపొందించిన కంటెంట్‌ను పుస్తకాలుగా ముద్రించారా? అనే అంశాలపై విచారణ కొనసాగుతోంది.
ఈ వ్యవహారంలో అవినీతి జరిగిందని తుది నిర్ధారణ కావాలంటే దర్యాప్తు ఫలితాలు వెలువడాల్సి ఉంది. ఆరోపణలు నిజమని తేలితే ప్రజాధనానికి జరిగిన నష్టాన్ని తిరిగి రాబట్టడంతో పాటు బాధ్యులపై చర్యలు తీసుకునే అవకాశం ఉంది. సాంకేతికతను ఉపయోగించి జ్ఞానాన్ని విస్తరించాల్సిన చోట, అదే సాంకేతికతను దుర్వినియోగం చేశారనే ఆరోపణలు తమిళనాడులో ఇప్పుడు తీవ్ర చర్చకు దారితీశాయి.